மக்களுக்கு வழங்கப்படவுள்ள நிவாரணம் : குறைக்கப்படும் மின் கட்டணம்
மின் கட்டணத்தை குறைப்பது தொடர்பான தீர்மானம் அடுத்த மாதம் மேற்கொள்ளப்படுமென இலங்கை பொதுப்பயன்பாடுகள் ஆணைக்குழு தெரிவித்துள்ளது.
மின் கட்டண திருத்தம் தொடர்பான யோசனையை, இலங்கை மின்சார சபை முன்வைத்துள்ள நிலையிலேயே, ஆணைக்குழு இந்த அறிவிப்பை மேற்கொண்டுள்ளது.
மின்சார சபையால் முன்வைக்கப்பட்ட தரவுகளை மீளாய்வு செய்து, குடிசார் மற்றும் பொது மக்களின் கருத்துக்களை பெற்றுக் கொண்டதன் பின்னர், இது தொடர்பான அறிக்கை மின்சார சபையிடம் சமர்ப்பிக்கப்படும் என ஆணைக்குழு குறிப்பிட்டுள்ளது.
மின் கட்டண குறைப்பு
கடந்த ஆண்டு ஒக்டோபர் மாதம் முதல் டிசம்பர் மாதம் வரையான காலப்பகுதியில் அதிகளவான மழை வீழ்ச்சி பதிவாகியுள்ள நிலையில், நீர் மின்னுற்பத்தியின் ஊடாக அதிகளவில் மின்சாரம் உற்பத்தி செய்யப்படுவதால் மின்கட்டணத்தை குறைப்பதற்கு அரசாங்கம் கொள்கை ரீதியில் தீர்மானித்துள்ளது.
இதற்கமைய, மின்கட்டண திருத்தம் தொடர்பான யோசனையை மின்சார சபை பொதுப்பயன்பாடுகள் ஆணைக்குழுவில் முன்வைத்துள்ளது.
குறைக்கப்படவுள்ள வீதம்
இதன்படி, மொத்த மின்கட்டணத்தை 3.34 வீதத்தால் குறைக்க மின்சார சபை பரிந்துரைத்துள்ளது.
30 இற்கும் குறைவான மின்னலகினை பாவிக்கும் மின்பாவனையாளர்களின் மாத கட்டணத்தை 8.3 வீதத்தாலும்,120 இற்கும் குறைவான மின்னலகை பாவிக்கும் பாவனையாளர்களின் மின்கட்டணத்தை 5 வீதத்தாலும் குறைப்பதற்கு பரிந்துரைக்கப்பட்டுள்ளது.
நகைப்புக்குரிய கட்டண குறைப்பு
இந்த நிலையில், மின்கட்டண குறைப்பு தொடர்பில் மின்சார சபை முன்வைத்துள்ள யோசனைகள் நகைப்புக்குரியது என இலங்கை பொதுப்பயன்பாடுகள் ஆணைக்குழுவின் முன்னாள் தலைவர் ஜனக ரத்நாயக்க விமர்சித்துள்ளார்.
மின்சார சபை கடந்த ஆண்டு 60 பில்லியன் ரூபா இலாபமடைந்துள்ள நிலையில், மின்கட்டணத்தை பகுதியளவில் குறைப்பதற்கு பதிலாக ஒற்றை இலக்க வீதத்தில் குறைப்பதற்கு பரிந்துரைத்துள்ளமை இந்த ஆண்டுக்கான சிறந்த நகைச்சுவையாக கருத வேண்டும் என அவர் தெரிவித்துள்ளார்.
இந்த பின்னணியில், மின் கட்டணம் திருத்தம் தொடர்பில் மின்சார சபை முன்வைத்துள்ள தரவுகளை பரிசீலனை செய்து எதிர்வரும் மாதளமவில் மின்கட்டணத்தை குறைப்பதற்கு அனுமதி வழங்க பொதுப்பயன்பாடுகள் ஆணைக்குழு உத்தேசித்துள்ளமை குறிப்பிடத்தக்கது.
செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்...! |
