மீண்டும் தாய்நாடு திரும்பும் கோட்டாபய - முகநூல் ஊடாக ஹாஸ் டாக் பரப்புரை; கசிந்த தகவல்!
சிறிலங்காவின் முன்னாள் அதிபர் கோட்டாபய ராஜபக்ச நாடு திரும்பும் போது அவரை வரவேற்க பிரமாண்டமான ஏற்பாடுகள் செய்யப்பட்டு வருவதாக தகவல் வெளியாகியுள்ளது.
இவ்வாறான நிலையில், சமூக வலைத்தளங்கள் ஊடாக கோட்டாபயவுக்கு ஆதரவானவர்கள் இதற்கான ஏற்பாடுகளையும் பரப்புரைகளையும் செய்து வருவதாகவும் தெரிவிக்கப்பட்டுள்ளது.
மேலும் முகநூல் ஊடாக #BringBackGota மற்றும் #BringHomeGota என்ற ஹாஸ் டாக் மூலம் இந்த பரப்புரைகள் முன்னெடுக்கப்பட்டு வருகின்றன.
கோட்டாபயவை வரவேற்கத் தயாராகும் பெரும் திரளானோர்
கோட்டாபய எதிர்வரும் 24 ஆம் திகதி கட்டுநாயக்க விமானம் நிலையம் ஊடாக நாட்டுக்கு வரும் போது, அவரை வரவேற்க பெருந்திரளானோர் விமான நிலையத்திற்கு செல்லவும் திட்டமிடப்பட்டுள்ளது எனவும் செய்தி வெளியாகியுள்ளது.
தற்போது தாய்லாந்தின் பாங்கொக்கில் தங்கியிருக்கும் கோட்டாபய ராஜபக்ச எதிர்வரும் 24 ஆம் திகதி இலங்கை திரும்பவுள்ளார் என அவரது உறவினரான உதயங்க வீரதுங்க அண்மையில் தகவல் வெளியிட்டிருந்தார் என்பதும் குறிப்பிடத்தக்கது.
