தமிழ் தொழிலதிபரை மிரட்டி பணம் பறிப்பு : சம்பத் மனம்பேரிக்கு எதிராக பிடியாணை பிறப்பிப்பு
Sumithiran
in சட்டம் மற்றும் ஒழுங்கு
16 ஆண்டுகளுக்கு முன்பு தொழிலதிபர் ஒருவரை மிரட்டி அரிசி பாரவூர்தியை கொள்ளையடித்ததாக குற்றம் சாட்டப்பட்ட முன்னாள் உள்ளூராட்சி மன்ற உறுப்பினர் சம்பத் மனம்பேரியை உடனடியாகக் கைது செய்து முற்படுத்த உத்தரவிட்ட கொழும்பு உயர் நீதிமன்ற நீதிபதி ரஷாந்த கொடவெல, இன்று (30) அதற்கான பிடியாணையை பிறப்பித்தார்.
2009 ஓகஸ்ட் 12 ஆம் திகதி அல்லது அதற்கு அருகில் நாரஹேன்பிட்ட சந்திக்கு அருகில் கொள்ளையடிக்கும் பொதுவான நோக்கத்துடன் ஒரு சட்டவிரோதக் கூட்டத்தின் உறுப்பினர்களாகச் செயல்பட்டதாகக் கூறி, காவல்துறை அதிகாரிகள் போல் வேடமிட்டு, செல்லத்துரை குலவேந்தன் என்ற தொழிலதிபரை மிரட்டி, அவரது வசம் இருந்த சுமார் ரூ. 1 மில்லியன் மதிப்புள்ள அரிசி பாரவூர்தி, பணம் மற்றும் கைபேசி ஆகியவற்றைக் கொள்ளையடித்ததாக 7 குற்றச்சாட்டுகளின் கீழ் சட்டமா அதிபர் பிரதிவாதிகளுக்கு எதிராக வழக்குத் தொடர்ந்துள்ளார்.
சட்டமா அதிபர் வழக்கு
சம்பத் மனம்பேரி மற்றும் நெரஞ்சன் பெரேரா ஆகியோரைத் தவிர, மேலும் நான்கு பிரதிவாதிகள் மீது சட்டமா அதிபர் வழக்குத் தொடர்ந்துள்ளார்.
வழக்கு விசாரணைக்கு எடுத்துக்கொள்ளப்பட்டபோது, பிரதிவாதி சம்பத் மனம்பேரி சார்பில் முன்னிலையான வழக்கறிஞர் கல்ப பெரேரா, தனது கட்சிக்காரர் தற்போது வேறொரு வழக்கு தொடர்பாக விளக்கமறியலில் உள்ளதாகவும், எனவே இன்று (30)நீதிமன்றத்தில் முன்னிலையாகவில்லை என்றும் கூறினார்.
சிறையில் இருப்பதாக நீதவானுக்கு அறிவிப்பு
அவர் சிறையில் இருப்பதாக நீதவானுக்கு தெரிவிக்கப்பட்டது. அதன்படி, குற்றம் சாட்டப்பட்டவர் குறித்த அறிக்கையை வழங்குமாறு உயர் நீதிமன்ற நீதிபதி சிறைச்சாலைக்கு உத்தரவிட்டார்.
நான்காவது பிரதிவாதியான நெரஞ்சன் பெரேரா சார்பில் முன்னிலையான வழக்கறிஞர் ராகுல் ஜெயதிலக, தனது கட்சிக்காரர் ஐஸ் என்ற போதைப்பொருளை வைத்திருந்ததற்காக மாத்தறை நீதவான் நீதிமன்றத்தால் காவலில் வைக்கப்பட்டுள்ளதாகத் தெரிவித்தார்.
முன்வைக்கப்பட்ட உண்மைகளைக் கருத்தில் கொண்டு, தொடர்புடைய உத்தரவுகளைப் பிறப்பித்த நீதிபதி, குற்றம் சாட்டப்பட்டவரை நீதிமன்றத்தில் முற்படுத்துமாறு சிறைச்சாலை அத்தியட்சகருக்கு உத்தரவிட்டு, வழக்கை மீண்டும் விசாரிக்க உத்தரவிட்டார்.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்...! |
