ஈரானுடன் வர்த்தகத் தொடர்பு இல்லை.! அமெரிக்க தடைகளுக்கு சீனா பதில்
ஈரானிடம் இருந்து கச்சா எண்ணெய் கொள்முதல் செய்ததாகக் கூறி, அமெரிக்கா தனது துணை நிறுவனம் ஒன்றின் மீது பொருளாதாரத் தடைகளை விதித்துள்ள நிலையில், ஈரானுடன் தாம் எவ்வித வர்த்தகத் தொடர்பையும் கொண்டிருக்கவில்லை என்று சீனாவின் மிகப்பெரிய எண்ணெய் சுத்திகரிப்பு நிறுவனமான 'ஹெங்லி பெட்ரோகெமிக்கல்' திட்டவட்டமாக மறுத்துள்ளது.
இது குறித்து பங்குச் சந்தை தாக்கல் ஒன்றில் விளக்கம் அளித்துள்ள அந்த நிறுவனம், தங்களுக்கு கச்சா எண்ணெய் வழங்கும் அனைத்து விநியோகஸ்தர்களும் அமெரிக்கத் தடைகளுக்கு உட்பட்ட நாடுகளிலிருந்து எண்ணெய் வழங்கப்படவில்லை என்பதை உறுதிப்படுத்தியுள்ளதாகவும் தெரிவித்துள்ளது.
அமெரிக்காவின் தடை
மேலும், அமெரிக்காவின் இந்தத் தடைகளுக்கு எவ்வித சட்டபூர்வமான அல்லது உண்மைத் தன்மையிலான ஆதாரங்களும் இல்லை என்று ஹெங்லி நிறுவனம் சுட்டிக்காட்டியுள்ளது.
Image Credit: Reuters
எவ்வாறாயினும், தற்போது விதிக்கப்பட்டுள்ள இந்தத் தடைகளால் தங்களது செயல்பாடுகள் பாதிக்கப்படாது என்றும், அடுத்த மூன்று மாதங்களுக்குத் தேவையான கச்சா எண்ணெய் கையிருப்பு நிறுவனத்திடம் உள்ளதாகவும் ஹெங்லி நிறுவனம் குறிப்பிட்டுள்ளது.
இதேவேளை, தங்களுக்கு விதிக்கப்பட்டுள்ள இந்தக் கட்டுப்பாடுகளை நீக்குவதற்குத் தேவையான அனைத்து முயற்சிகளையும் முன்னெடுக்கப் போவதாகத் தெரிவித்துள்ள அந்த நிறுவனம், தங்களது கச்சா எண்ணெய் கொள்முதல் நடவடிக்கைகள் வழக்கம் போலவே எவ்வித தடையுமின்றி நடைபெற்று வருவதாகவும் கூறியுள்ளது.
செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்...! |
