எரிபொருள் ஒதுக்கீடு தொடர்பில் கஞ்சன வெளியிட்ட தகவல்!

நாட்டில் தற்போதைய எரிபொருள் ஒதுக்கீட்டை அதிகரிக்க முடியாது என எரிசக்தி அமைச்சர் கஞ்சன விஜேசேகர தெரிவித்துள்ளார்.

மேலும், இலங்கைக்கான எரிபொருள் இறக்குமதியை பாதிக்கும் அந்நியச் செலாவணி நெருக்கடி காரணமாகவே இந்த ஒதுக்கீட்டை அதிகரிக்க முடியாது எனவும் சுட்டிக்காட்டியுள்ளார்.

இன்றைய நாடாளுமன்ற அமர்வின் போதே அவர் மேற்கண்டவாறு கூறினார்.

இது குறித்து அவர் மேலும் தெரிவிக்கையில், "அந்நிய செலாவணி நெருக்கடி ஓரளவு தணிக்கப்பட்டவுடன் எரிபொருள் ஒதுக்கீட்டை அதிகரிக்க எதிர்பார்க்கப்படுகிறது இலங்கையின் நாளாந்த எரிபொருள் நுகர்வு 3000 லீட்டர்கள் என தரவு பகுப்பாய்வு வெளிப்படுத்தியுள்ளது.

தேசிய எரிபொருள் அனுமதிச் சீட்டு

இதில் 10% லங்கா ஐஓசி நிறுவனத்தினாலும், மீதமுள்ள 90% இலங்கை பெட்ரோலியக் கூட்டுத்தாபனத்தாலும் (CPC) வழங்கப்படுகிறது தேசிய எரிபொருள் அனுமதிச் சீட்டுக்காக இதுவரை 6.2 மில்லியன் வாகனங்கள் பதிவு செய்யப்பட்டுள்ளன.

பதிவு செய்யப்பட்ட வாகனங்களில் 1.1 மில்லியன் முச்சக்கர வண்டிகள், 3.6 மில்லியன் மோட்டார் சைக்கிள்கள் மற்றும் 1.5 மில்லியன் மற்ற வாகனங்கள் ஆகும்.

எரிசக்தி அமைச்சு தற்போது பொது போக்குவரத்தை சீராக்குவதில் கவனம் செலுத்தி வருகிறது, இதன் மூலம் பேருந்துகள் மற்றும் தொடருந்துகளுக்கான எரிபொருள் விநியோகத்திற்கு முன்னுரிமை அளித்துள்ளது.

ஒவ்வொரு வகை வாகனங்களின் தினசரி உபயோகத்தையும் கண்காணித்து கண்டறிந்து, தற்போதைய எரிபொருள் ஒதுக்கீட்டின் கீழ் வரையறுக்கப்பட்ட எரிபொருள் தற்போது வழங்கப்படுகிறது" என்றார்.

முச்சக்கர வண்டிகளுக்கான எரிபொருள் வழங்கும் முறை

அதேவேளை, முச்சக்கர வண்டிகளுக்கான எரிபொருள் வழங்கும் முறை குறித்து எதிர்க்கட்சித் தலைவர் சஜித் பிரேமதாச இதன் போது கேள்வி எழுப்பியிருந்தார்.

அதற்கு பதில் வழங்கிய அமைச்சர் கஞ்சன, போக்குவரத்து அமைச்சரின் பங்குபற்றுதலுடன் நடத்தப்பட்ட கலந்துரையாடலில், முச்சக்கர வண்டி சங்கங்கள் எரிபொருள் ஒதுக்கீட்டை அதிகரிக்குமாறு கோரிக்கை விடுத்திருந்த போதிலும் அது தொடர்பில் இணக்கப்பாடு எட்டப்படவில்லை.

முச்சக்கர வண்டிகளுக்கான எரிபொருள் ஒதுக்கீட்டை அதிகரிப்பதற்கான சாத்தியக்கூறுகளை ஆராய மாத்திரமே உடன்படிக்கை மேற்கொள்ளப்பட்டுள்ளது என தெரிவித்தார் .

முச்சக்கர வண்டிகளுக்கு தனித்தனியாக எரிபொருளை வழங்குவதற்கு குறிப்பிட்ட சில பிரதேசங்களில் குறிப்பிட்ட எரிபொருள் நிரப்பு நிலையங்கள் ஒதுக்கப்படவில்லை என அமைச்சர் கஞ்சன மேலும் தெரிவித்தார்.

முச்சக்கர வண்டிகள் வழமையான நடைமுறையாக நாட்டிலுள்ள எந்தவொரு எரிபொருள் நிரப்பு நிலையத்திலும் தமக்குத் தேவையான எரிபொருளைப் பெற்றுக்கொள்ள முடியும் எனவும் சுட்டிக்காட்டியுள்ளார்.