1.5 பில்லியன் ரூபாய்க்கும் அதிக பெறுமதியான போதைப்பொருள் படகில் மீட்பு!

புதிய இணைப்பு

தெற்கு ஆழ்கடலில் கடற்படையினரால் சுற்றிவளைக்கப்பட்ட மீன்பிடிப் படகில், ஒன்றரை பில்லியன் ரூபாய்க்கும் அதிக பெறுமதியான போதைப்பொருட்கள் இருந்தமை கண்டறியப்பட்டுள்ளதாகப் பாதுகாப்புப் பிரதி அமைச்சர் ஓய்வுபெற்ற மேஜர் ஜெனரல் அருண ஜயசேகர தெரிவித்துள்ளார்.

இன்று (13) குறித்த படகு காலி மீன்பிடித் துறைமுகத்திற்குக் கொண்டுவரப்பட்டதன் பின்னர், அதனை நேரில் பார்வையிட்ட போதே பிரதி அமைச்சர் இதனைக் குறிப்பிட்டார்.

அவர் மேலும் தெரிவிக்கையில், நாட்டின் தெற்குப் பகுதியிலுள்ள ஆழ்கடலில் கடற்படையினர் முன்னெடுத்த விசேட நடவடிக்கையின் போது, போதைப்பொருட்கள் எனச் சந்தேகிக்கப்படும் பொதிகளைக் கடத்திச் சென்ற 'யசிரு புதா' என்ற மீன்பிடிப் படகு கடந்த 11 ஆம் திகதி சுற்றிவளைக்கப்பட்டது.

இதன்போது, குறித்த படகிலிருந்த 5 கடற்றொழிலாளர்களும் கடற்படையினரால் கைது செய்யப்பட்டதுடன், பின்னர் அப்படகும் கடற்றொழிலாளர்களும் இன்று காலை காலி மீன்பிடித் துறைமுகத்திற்குக் கொண்டுவரப்பட்டனர்.

அங்கு மேற்கொள்ளப்பட்ட சோதனையின் போது, அதனுள் ஹெரோயின் மற்றும் ஐஸ் போதைப்பொருட்கள் இருந்தமை போதைப்பொருள் ஒழிப்புப் பணியகத்தினால் உறுதிப்படுத்தப்பட்டது.

இதற்கமைய, படகினுள் சுமார் 60 கிலோ கிராம் ஹெரோயின் போதைப்பொருளும், 50 கிலோ கிராமுக்கும் அதிகமான ஐஸ் போதைப்பொருளும் இருந்தமை போதைப்பொருள் ஒழிப்புப் பணியகத்தின் விசாரணைகளில் தெரியவந்துள்ளது.” என தெரிவித்தார்.

முதலாம் இணைப்பு 

இலங்கையின் தெற்கு ஆழ்கடலில் கடற்படையினர் முன்னெடுத்த விசேட நடவடிக்கையின் போது, போதைப்பொருட்கள் எனச் சந்தேகிக்கப்படும் பொதிகளைக் கடத்திச் சென்ற நெடுநாள் மீன்பிடிப் படகு கைப்பற்றப்பட்டு காலி துறைமுகத்திற்குக் கொண்டுவரப்பட்டுள்ளது.

குறித்த படகிலிருந்து 50 ஐஸ் போதைப்பொருள் பொதிகளும், 52 ஹெரோயின் போதைப்பொருள் பொதிகளும் மீட்கப்பட்டுள்ளதுடன், அவை ஆறு சாக்குகளில் அடைக்கப்பட்டிருந்ததாகக் கடற்படையினர் தெரிவித்துள்ளனர்.

கடற்படை மற்றும் புலனாய்வுப் பிரிவினர் இணைந்து முன்னெடுத்த நடவடிக்கையின் போதே இந்தப் போதைப்பொருள் தொகை கைப்பற்றப்பட்டுள்ளது.

விளக்கமறியலில் வைக்கப்பட்டுள்ள கஸ்ஸப்ப தேரர் உள்ளிட்ட குழுவினருக்கு மன நலப் பரிசோதனை

கைப்பற்றப்பட்டுள்ள போதைப்பொருள்

கடந்த செப்டெம்பர் 21 ஆம் திகதி மிரிஸ்ஸ மீன்பிடித் துறைமுகத்திலிருந்து கடலுக்குச் சென்றிருந்த இந்தப் படகில் போதைப்பொருட்கள் இருப்பதாகக் கிடைத்த தகவலின் அடிப்படையில் மேற்கொள்ளப்பட்ட சோதனையையடுத்து, நவம்பர் 11 ஆம் திகதி இது கைப்பற்றப்பட்டுள்ளது.

இதன்போது, படகிலிருந்த ஐந்து சந்தேகநபர்களும் கடற்படையினரால் பொறுப்பேற்கப்பட்டதாக தெரிவிக்கப்படுகின்றது.

தற்போது கைப்பற்றப்பட்டுள்ள போதைப்பொருள் தொகையின் எடை மற்றும் அளவை உறுதிப்படுத்தும் நடவடிக்கைகளைப் போதைப்பொருள் ஒழிப்புப் பணியக அதிகாரிகள் முன்னெடுத்து வருகின்றமை குறிப்பிடத்தக்கது.

நீதவானுக்கு எதிரான கருத்து: கஸ்ஸப தேரருக்கு எதிராக நடவடிக்கை எடுக்க கோரிக்கை

புதிய கல்விச் சீர்திருத்தங்கள் தொடர்பில் கல்வித் துறையினருக்கு விழிப்புணர்வு!