அடுத்த ஆண்டு முதல் அரச ஊழியர்களுக்கான சம்பளம் மற்றும் கொடுப்பனவுகள் அதிகரிப்பு

Government Employee Government Of Sri Lanka Salary

By Dharu Nov 12, 2026 12:36 PM GMT

Dharu

in அரசியல்

Report

2027 ஆம் ஆண்டுக்கான வரவு செலவுத் திட்டத்தின் ஊடாக அரச ஊழியர்களுக்குச் சம்பள உயர்வு, கொடுப்பனவு அதிகரிப்பு மற்றும் மேலதிக ஓய்வூதியச் சலுகைகள் உள்ளிட்ட பல நிவாரணத் திட்டங்களை அரசாங்கம் முன்மொழிந்துள்ளது.

2025 ஆம் ஆண்டு அறிமுகப்படுத்தப்பட்ட அரச ஊழியர்களின் சம்பள உயர்வின் இறுதிக்கட்டத்தை நடைமுறைப்படுத்துவதற்காக 110 பில்லியன் ரூபா ஒதுக்கப்பட்டுள்ளதாக ஜனாதிபதி அநுர குமார திசாநாயக்க அறிவித்துள்ளார்.

இதற்கு மேலதிகமாக, 2027 வரவு செலவுத் திட்டத்தில் பின்வரும் சலுகைகளும் முன்மொழியப்பட்டுள்ளன:

அதிகரிக்கப்பட்ட தொகை

வைத்தியர்கள்: இடையூறு, வரையறுக்கப்பட்ட மற்றும் போக்குவரத்து (DAT) கொடுப்பனவு 70,000 ரூபாவிலிருந்து 95,000 ரூபாவாக அதிகரிக்கப்பட்டுள்ளது.
தாதியர்கள் மற்றும் துணை மருத்துவப் பணியாளர்கள்: விசேட கடமைக் கொடுப்பனவு 6,000 ரூபாவிலிருந்து 12,000 ரூபாவாக இரட்டிப்பாக்கப்பட்டுள்ளது.
பல்கலைக்கழக விரிவுரையாளர்கள்: மாதாந்த கல்விசார் கொடுப்பனவு 25,000 ரூபாவினால் அதிகரிக்கப்பட்டுள்ளது.
காவல்துறை உத்தியோகத்தர்கள்: உணவு மற்றும் தங்குமிட வசதிகளுக்காக மாதாந்தம் மேலதிகமாக 10,000 ரூபா கொடுப்பனவு வழங்கப்படும்.
சிறைச்சாலை உத்தியோகத்தர்கள்: இடர் கொடுப்பனவு 8,000 ரூபாவிலிருந்து 16,000 ரூபாவாக இரட்டிப்பாக்கப்பட்டுள்ளது.
கிராம உத்தியோகத்தர்கள்: பயணக் கொடுப்பனவு 1,600 ரூபாவிலிருந்து 4,000 ரூபாவாக அதிகரிக்கப்பட்டுள்ளது.
நிறைவேற்று அதிகாரிகள்: தகுதியுடைய போக்குவரத்துக் கொடுப்பனவு 50,000 ரூபாவிலிருந்து 100,000 ரூபாவாக இரட்டிப்பாக்கப்பட்டுள்ளது.
முப்படையினர்: நாளாந்த உணவுக் கொடுப்பனவு அதிகரிக்கப்பட்டுள்ளது.
ஓய்வூதியதாரர்கள்: 2020 மற்றும் 2024 ஆம் ஆண்டுகளுக்கு இடையில் ஓய்வுபெற்றவர்களுக்கு மாதாந்தம் 2,500 ரூபா மேலதிக இடைக்காலக் கொடுப்பனவு வழங்கப்படும்.

இந்தக் கொடுப்பனவு அதிகரிப்புகளில் பெரும்பாலானவை 2027 ஏப்ரல் அல்லது ஜூலை மாதங்களில் அமுலுக்கு வரும் எனத் தெரிவிக்கப்பட்டுள்ளது.

அதேவேளை, குறிப்பிட்ட சில அதிகரிப்புகள் இரண்டு கட்டங்களாக நடைமுறைப்படுத்தப்பட்டு, எஞ்சிய தொகை 2028 ஆம் ஆண்டில் வழங்கப்படும் என ஜனாதிபதியால் அறிவிக்கப்பட்டுள்ளது.