கபிலவின் மரணத்தை போன்றே எராஜின் மரணமும்! தீவிரப்படுத்தப்படும் விசாரணை

CID - Sri Lanka Police Hambantota

By Dharu Sep 03, 2026 05:47 AM GMT

Dharu

in சமூகம்

Report

கொழும்பு 5, திம்பிரிகஸ்யாயவில் உள்ள ஒரு அடுக்குமாடிக் குடியிருப்பில் மர்மமான முறையில் உயிரிழந்த ஹம்பாந்தோட்டை மாநகர சபையின் முன்னாள் மேயர் எராஜ் ரவீந்திர பெர்னாண்டோவின் உடலை, பம்பலப்பிட்டிய காவல் அதிகாரிகள் குழு நேற்று (02) கண்டெடுத்தது.

பம்பலப்பிட்டிய, ஹேவ்லாக் டவுனில் உள்ள 6-ஆம் அவென்யூ அடுக்குமாடிக் குடியிருப்பில், 9 அடி உயரமுள்ள கதவில் ரப்பர் பட்டியால் அவர் தூக்கிட்டுத் உயிரை மாய்த்துக்கொண்டதாக விசாரணையில் தெரியவந்துள்ளது.

சில மாதங்களுக்கு முன்பு ஸ்ரீலங்கன் ஏர்லைன்ஸ் நிறுவனத்தின் முன்னாள் நிர்வாக இயக்குனர் கபில சந்திரசேனவின் மரணம் நிகழ்ந்ததைப் போன்றே எராஜ் பெர்னாண்டோவின் மரணமும் நிகழ்ந்துள்ளது.

இருமுறை மேயராக பதவி

அவர் மரணித்த நேரத்தில், இந்த அடுக்குமாடிக் குடியிருப்பில் தனியாக வசித்து வந்துள்ளார்.

கபிலவின் மரணத்தை போன்றே எராஜின் மரணமும்! தீவிரப்படுத்தப்படும் விசாரணை | Like Kapila S Death Eraj S Death Is Also

அவரது மனைவியும் இரண்டு மகள்களும் கனடாவில் வசிக்கின்றனர். அவர் நீண்ட காலமாக கடுமையான மன அழுத்தத்தால் அவதிப்பட்டு வந்ததாகவும், அதற்காக மருத்துவ சிகிச்சையும் பெற்று வந்ததாகவும் காவல்துறை விசாரணையில் மேலும் தெரியவந்துள்ளது.

கொழும்பு, நாலந்தா கல்லூரியின் முன்னாள் மாணவரான எராஜ் பெர்னாண்டோ, 2011 முதல் 2021 வரை அரசியலில் தீவிரமாக ஈடுபட்டிருந்தார்.

அவர் ஹம்பாந்தோட்டையின் மேயராக இருமுறை பதவி வகித்ததோடு, 2014-ஆம் ஆண்டில் மத்தள விமான நிலையம் மற்றும் ஹம்பாந்தோட்டை துறைமுகத்தை ஆய்வு செய்ய வந்திருந்த அப்போதைய எதிர்க்கட்சியான ஐக்கிய தேசியக் கட்சியின் நாடாளுமன்ற உறுப்பினர்கள் குழுவை வெளியேற்றிய நடவடிக்கைக்குத் தலைமை தாங்கியதற்காகப் பரவலாக அறியப்பட்டார்.

ஐந்தாண்டுகள் சிறை

அப்போது, அவரும் அவரது குழுவினரும் கையில் கைத்துப்பாக்கியுடன் நாடாளுமன்ற உறுப்பினர்களைத் துரத்திச் சென்று விரட்டியடித்தனர்.

நல்லாட்சி அரசாங்கத்தின் போது நடத்தப்பட்ட விசாரணைகளில், அன்று தான் ஒரு பொம்மைத் துப்பாக்கியைக் கொண்டு வந்ததாக அவர் கூறியபோதிலும், அந்தச் சம்பவத்திற்காக அவர் குற்றவாளி எனக் கண்டறியப்பட்டு, ஐந்தாண்டுகள் சிறைத்தண்டனை விதிக்கப்பட்டார்.

இருப்பினும், அதைத் தொடர்ந்த அரசாங்க மாற்றத்தின்போது அவர் விடுவிக்கப்பட்டார். மேலும், ஹம்பாந்தோட்டை பகுதியில் நிலத்தை வலுக்கட்டாயமாகக் கையகப்படுத்தியது உள்ளிட்ட பல்வேறு சட்டவிரோத நடவடிக்கைகளில் அவர் மீது குற்றம் சாட்டப்பட்டது.

இந்த மரணம் குறித்து பம்பலப்பிட்டிய காவல்துறையினர் மேலதிக விசாரணைகளை மேற்கொண்டு வருகின்றனர்.