சர்ச்சைக்குரிய கிரிஷ் ஒப்பந்த விவகாரம்: நாமலின் கையெழுத்தை பரிசேதனை செய்ய CIABOC கோரிக்கை

நாடாளுமன்ற உறுப்பினர் நாமல் ராஜபக்சவின்(Namal Rajapaksa) கையெழுத்து அடங்கிய ஆவணம் ஒன்றை ஆய்வு செய்வதற்காக அரசாங்கப் பகுப்பாய்வாளர் திணைக்களம் கோரிக்கை ஒன்றை முன்வைத்துள்ளதாக இலஞ்சம் அல்லது ஊழல் குற்றச்சாட்டுகளை விசாரிக்கும் ஆணைக்குழு (CIABOC) கொழும்பு நீதவான் நீதிமன்றத்தில் தெரிவித்துள்ளது.

டிரான்ஸ்வொர்க்ஸ் சதுக்கத்தில் முன்மொழியப்பட்ட கலப்புப் பயன்பாட்டு அபிவிருத்தித் திட்டத்திற்காக இந்திய நிறுவனமான கிரிஷ்-க்கு நிலம் கைமாற்றப்பட்டது தொடர்பாக ரூ. 70 மில்லியன் இலஞ்சம் வழங்கப்பட்டதாகக் கூறப்படும் குற்றச்சாட்டுகள் குறித்த விசாரணையின் ஒரு பகுதியாக இந்த விடயம் வெளிப்படுத்தப்பட்டுள்ளது.

கொழும்பு பிரதான நீதவான் முன்னிலையில் நேற்று இந்த வழக்கு விசாரணைக்கு எடுத்துக்கொள்ளப்பட்டபோது குறித்த விடயம் தெரிவிக்கப்பட்டுள்ளது.

18 தனிநபர் கடன்களை பெற்றுள்ள சஜித்: CIABOC-வின் நடவடிக்கை

விசாரணைக்கு தேவையான ஆவணம்

இதன்படி விசாரணையின் ஒரு பகுதியாக, நாடாளுமன்ற உறுப்பினர் நாமல் ராஜபக்சவினுடையது எனக் கூறப்படும் கையெழுத்து அடங்கிய ஆவணம் ஒன்று பரிசோதனைக்காக அரசாங்கப் பகுப்பாய்வாளருக்கு அனுப்பப்பட்டுள்ளதாக CIABOC தெரிவித்துள்ளது.

சட்ட நடவடிக்கைகள் தொடர்பாக விளக்கமறியலில் வைக்கப்பட்டுள்ள நாமல் மற்றும் கிரிஷ் நிறுவனத்தின் முன்னாள் பணிப்பாளர் ஜானகி சிறிவர்தனவும் சிறைச்சாலை அதிகாரிகளால் நீதிமன்றத்தில் முன்னிலைப்படுத்தப்பட்ட நிலையில் இது குறித்த சமர்ப்பனங்கள் நீதிமன்றில் முன்வைக்கப்பட்டுள்ளன.

கொழும்பு பிரதேச செயலாளர் மற்றும் முன்னாள் நில ஆணையாளர் உட்பட பல நபர்களிடமிருந்து ஏற்கனவே வாக்குமூலங்கள் பதிவு செய்யப்பட்டுள்ளதாக, இலஞ்ச ஆணைக்குழுவின் சார்பில் முன்னிலையான உதவிப் பணிப்பாளர் ஒருவர் நீதிமன்றத்தில் தெரித்துள்ளார்.

இதன்படி விசாரணைக்கு தேவையான ஆவணத்தை ஆய்வுக்காக விடுவிக்குமாறு உயர் நீதிமன்றப் பதிவாளருக்கு உத்தரவிடக் கோரி இலஞ்ச ஆணைக்குழு நீதவானிடம் கோரிக்கை விடுத்துள்ளது.

இருப்பினும், நீதிமன்றத்தில் சமர்ப்பிக்கப்பட்ட மேலதிக அறிக்கையில் இந்தக் கோரிக்கை சேர்க்கப்படவில்லை என்பதை கவனித்த நீதவான், முறையாக ஆவணப்படுத்தப்பட்ட ஒரு விண்ணப்பத்தைச் சமர்ப்பிக்குமாறு ஆணைக்குழுவிற்கு உத்தரவிட்டார்.

தனது விசாரணையின் முன்னேற்றம் குறித்து நவம்பர் 20 அன்று அறிக்கை சமர்ப்பிக்குமாறு இலஞ்ச ஆணைக்குழுவிற்கு நீதிமன்றம் உத்தரவிட்டது. 

இலங்கைத் தொழிலாளர்களைப் பணியமர்த்தும் திட்டத்திற்கு தாய்லாந்து ஒப்புதல்