தமிழருக்கான அரசியல் தீர்வு - ரணில் சொல்வதெல்லாம் பொய்

தமிழருக்கான அரசியல் தீர்வு விடயத்தில் அதிபர் ரணில் உரையாற்றும் ஒவ்வொரு முறையும் பொய்களையே கூறுகின்றார் என்றும் அரசியல் தீர்வு விடயத்தில் ஒவ்வொரு தைப்பொங்கல், தீபாவளி, புத்தாண்டில் தீர்வு என்று பொய் சொல்லி ஏமாற்றுகின்றார் என்றும் தமிழ்த் தேசியக் கூட்டமைப்பு நாடாளுமன்ற உறுப்பினர் வினோநோகராதலிங்கம் தெரிவித்தார்.

அண்மையில் அதிபர் நாட்டு மக்களுக்கு நிகழ்த்திய உரை மீதான விவாதத்தில் கலந்து கொண்டு உரையாற்றும் போது மேற்கண்டவாறு தெரிவித்த அவர் மேலும் தெரிவிக்கையில்,

ஜெனிவா கூட்டத்தொடர்

“ஜெனிவாவில் 53 ஆவது மனித உரிமைகள் பேரவை கூட்டத்தொடர் தற்போது நடைபெறுகின்றது. அந்த சபையின் பிரதி ஆணையாளரின் உரையில் இந்த அரசாங்கம் தொடர்ந்தும் பொறுப்பு கூறலை உறுதிப்படுத்தாமல் தண்டனையில் இருந்து விடுபடும் போக்கு முடிவுக்கு கொண்டுவரப்படாமல், தொடர்ச்சியாக கடந்தகால விடயங்களை அலட்சியப்படுத்தும் போக்கை கண்டித்து உரையாற்றியுள்ளார்.

அந்த உரை தொடர்பில் தமிழ் மக்கள் சார்பில் பாராட்டுக்களை கூறிக்கொள்கின்றோம்.

இதேவேளை சர்வதேச விசாரணை பொறிமுறை விடயத்தில் தொடர்ந்தும் அரசாங்கம் ஏமாற்றுமாக இருந்தால் அந்த பொறிக்குள் இந்த அரசாங்கம் அகப்படுவதை தடுக்க முடியாது என்பதனையும் அவர் குறிப்பிட்டுள்ளார்.

ஐநா மனித உரிமைகள் ஆணையகம் கடந்த காலங்களில் எடுத்த முடிவுகளை நிறைவேற்றாமல் அரசாங்கம் இருக்குமாக இருந்தால் அதற்கான தண்டனை நிச்சயமாக கிடைக்கும். அதற்கு நாங்கள் பக்க பலமாக இருப்போம் என்பதனையும் சுட்டிக்காட்டியுள்ளார்.

இந்நிலையில் ஜெனிவாவுக்கான இலங்கையின் வதிவிடப் பிரதிநிதி அதற்கு பதிலளிக்கையில் இங்கே அனைத்தும் சுமுகமாக நடைபெறுகின்றது என்றும் இராணுவத்தினரிடம் இருக்கும் காணிகளில் 98 வீதம் விடுவிக்கப்பட்டுள்ளதாகவும் தெரிவிக்கப்பட்டுள்ளது.

தமிழரின் காணிகள் தற்போதும் இராணுவத்திடம்

ஆனால் வன்னியில் 98 வீதமான காணிகள் இன்னும் இராணுவத்திடமே இருக்கின்றன. சிறியளவிலான காணிகளே விடுவிக்கப்பட்டுள்ளன. இதேவேளை மக்கள் இன்னும் மீளவும் குடியேறாது தவித்துக்கொண்டுள்ளனர். அரச படைகள் தேசிய பாதுகாப்பு என்ற ஒற்றை வசனத்தில் அங்கே இருப்பதை காணக்கூடியதாக உள்ளது.

அதிபர் உரையாற்றும் ஒவ்வொரு முறையும் பொய்களையே கூறுகின்றார். அதேபோன்று ஜெனிவாவில் உள்ள வதிவிடப் பிரதிநிதியும் பொய்களையே கூறுகின்றார். எவ்வாறாயினும் மனித உரிமைகள் ஆணையகத்தையோ, சர்வதேச சமூகத்தை எந்த வகையிலும் ஏமாற்ற முடியாது என்பதனை கூறுகின்றேன். அடிக்கடி அதிபர் உரையாற்றுகின்றார். ஆனால் அவர் கூறுபவை நடைமுறைப்படு த்தப்படுவதில்லை” என்றார்.