ரணில் ராஜபக்ச அரசாங்கம் தேவையில்லை : மக்களை போராட வலியுறுத்தும் செந்தில் வேல்
மக்கள் நலன் இல்லாத ரணில் ராஜபக்ச அரசாங்கம் தேவையில்லை எனவும் இந்த அரசாங்கம் வீட்டுக்கு அனுப்பப்பட வேண்டும் எனவும் புதிய மார்க்சிச லெனின் கட்சியின் பொதுச்செயலாளர் சி. கா. செந்தில் வேல் தெரிவித்தார்.
யாழ்ப்பாணத்தில் இன்றைய தினம்(15) இடம்பெற்ற ஊடகவியலாளர் சந்திப்பில் இதனைத் தெரிவித்த அவர், மக்கள் வீதிகளில் இறங்கி இந்த அரசாங்கத்துக்கு எதிராக போராட வேண்டும் எனக் கூறியுள்ளர்.
யானை பசிக்கு சோளப்பொறி
மேலும் கருத்து வெளியிட்ட அவர், “அதிபர் ரணில் விக்ரமசிங்கவினால் கொண்டுவரப்பட்ட வரவு செலவுத்திட்டத்தில் மக்கள் நலன் சார்ந்த எந்தத் திட்டங்களும் இல்லை. யானை பசிக்கு சோளப்பொறி என்ற கதை போல் அவரது வரவு செலவுத்திட்ட அமைந்துள்ளது.
எந்த வித திட்டமிடலும் இல்லாமல் இந்த அரசாங்கம் புதிய வரவு செலவுத்திட்டத்தில் மக்களை ஏமாற்ற நினைக்கின்றது.
மக்கள் நலன் சார்ந்த வரவு செலவுத்திட்டம்
ஆண்டாண்டு காலமாக, கே ஆர் ஜெயவர்த்தனவின் ஆட்சிக் காலத்தில் இருந்து மக்கள் நலன் சார்ந்த இந்த வரவு செலவுத்திட்டம் இதுவரை சமர்ப்பிக்கப்படவில்லை. மாறாக இவர்கள் தனியார் நிறுவனங்களை வளைத்துப் போடுவதற்கும் அவர்களை ஊக்குவிக்கவுமே இந்தத் திட்டங்களை கொண்டு வருகின்றார்கள்.
இந்த அரசாங்கம், சர்வதேச நாணய நிதியத்தை திருப்திப்படுத்துவதற்காக புதிய வரவு செலவுத்திட்டத்தை தயாரித்துள்ளதே ஒழிய, இது மக்கள் நலன் சார்ந்த வரவு செலவுத்திட்டமாக இருக்கவில்லை” - என்றார்.
