கொழும்பு செட்டித் தெரு கொள்ளை சம்பவம் : சந்தேக நபர்கள் கைது!

கொழும்பு செட்டித் தெரு பகுதியில் தங்கம் மற்றும் வெளிநாட்டு நாணயங்களை கொள்ளையடித்த தரப்பினரை காவல்துறையினர் கைது செய்துள்ளனர்.

ஒருகொடவத்தை பிரதேசத்தில் வசிக்கும் குழுவினரே இவ்வாறாக கைது செய்யப்பட்டுள்ளதாக தெரிவிக்கப்பட்டுள்ளது.

இந்த குழுவில் முச்சக்கரவண்டி சாரதி, அவரது உறவினர் மற்றும் முன்னாள் இராணுவ சிப்பாய் ஒருவர் உள்ளடங்குவதாக காவல்துறையினர் தெரிவித்துள்ளனர்.

கொள்ளை சம்பவம்

செட்டித்தெரு தங்க நகை விற்பனை நிலைய உரிமையாளர் ஒருவரின் தங்கம் மற்றும் வெளிநாட்டு நாணயங்கள் கொள்ளையிடப்பட்டன.

குறித்த உரிமையாளருக்கு காத்தான்குடி மற்றும் மட்டக்களப்பு ஆகிய இடங்களில் மேலும் இரண்டு தங்க நகை விற்பனை நிலையங்கள் இருப்பதாகவும் அங்கிருந்து உருக்கிய தங்க கட்டிகள் கடந்த 11 ஆம் திகதி பேருந்து மூலம் கொழும்புக்கு அனுப்பப்பட்டதாகவும் தெரிவிக்கப்பட்டது. 

இந்த நிலையில், குறித்த பேருந்தில் இருந்து தங்க கட்டிகள் அடங்கிய பொதியை செட்டித் தெருவில் உள்ள விற்பனை நிலையத்திற்கு கொண்டு வந்த ஊழியரை, முச்சக்கர வண்டியில் வந்த ஒருவர் கடத்திச் செல்வது அங்கு பொருத்தப்பட்டிருந்த சிசிரிவி கெமராவில் பதிவாகியிருந்தது.

சந்தேக நபர்கள்

பின்னர், அவரிடம் இருந்த தங்கம் மற்றும் வௌிநாட்டு நாணயங்களை கொள்ளையிட்டு அவரை கொச்சிக்கடை தேவாலயத்திற்கு அருகே வீதியில் விட்டுச் சென்றுள்ளனர்.

சம்பவம் தொடர்பில் கிடைக்கப்பெற்ற முறைப்பாட்டின் படி, புறக்கோட்டை காவல்துறையின் குற்றப் புலனாய்வுப் பிரிவினர் சிசிரிவி காட்சிகளைப் பயன்படுத்தி சந்தேக நபர்களை அடையாளம் கண்டுள்ளனர்.

இதன்போது, கைது செய்யப்பட்ட சந்தேக நபர்களில் முச்சக்கர வண்டி சாரதி பல வருடங்களாக குறித்த பகுதியில் வாடகைக்கு முச்சக்கர வண்டிகளை ஓட்டி வந்துள்ளமை தெரிய வந்துள்ளது.

முதற்கட்ட விசாரணைகள்

செட்டித் தெரு பகுதியில் உள்ள தங்க நகை விற்பனை நிலைய ஊழியர்கள் பலமுறை பேருந்துகளில் தங்க கட்டிகள் அடங்கிய பொதிகளை எடுத்து வருவதை குறித்த சாரதி அவதானித்து வந்ததாக, முதற்கட்ட விசாரணைகளில் தெரிய வந்துள்ளது. 

அத்துடன், கொள்ளையடிக்கப்பட்ட தங்கம் மற்றும் வெளிநாட்டு நாணயங்களின் பெறுமதி சுமார் ஒரு கோடியே ஐம்பது இலட்சம் ரூபாவை அண்மித்துள்ளதாக கூறப்பட்டுள்ளது.

சுமார் 19 இலட்சம் ரூபா பெறுமதியான வெளிநாட்டு நாணயங்களை கொள்ளை சம்பவத்தில் ஈடுபட்ட தரப்பினர் சமமாகப் பகிர்ந்ததோடு, திருடப்பட்ட தங்கத்தில் 92 கிராம் ஓய்வுபெற்ற இராணுவ சிப்பாயிடமும், முச்சக்கரவண்டி சாரதியின் வீட்டின் கூரையில் மறைத்து வைக்கப்பட்டிருந்த நிலையில் மற்றுமொரு தொகை தங்கமும் காவல்துறையினரால் கண்டுபிடிக்கப்பட்டுள்ளன.

இதேவேளை, சந்தேக நபர்கள் நீதிமன்றில் முன்னிலைப்படுத்தப்படவுள்ளதுடன், சம்பவம் தொடர்பான மேலதிக விசாரணைகளை புறக்கோட்டை காவல்துறையின் குற்றப் புலனாய்வுப் பிரிவினர் மேற்கொண்டு வருகின்றமை குறிப்பிடத்தக்கது.