மொட்டு கட்சியுடன் கூட்டணி வைக்க தயாரில்லை: மைத்திரி திட்டவட்டம்
சிறிலங்கா பொதுஜன பெரமுனவுடன் சிறிலங்கா சுதந்திர கட்சி கூட்டணி அமைக்காதென அதன் தலைவரும் முன்னாள் அதிபருமான மைத்திரிபால சிறிசேன தெரிவித்துள்ளார்.
சுதந்திரக் கட்சியின் மத்திய செயற்குழு கூட்டம் இன்று(7) நடைபெற்ற நிலையில், அதன் பின்னர் ஊடகங்களுக்கு கருத்து தெரிவிக்கும் போதே, அவர் இதனை தெரிவித்துள்ளார்.
சிறிலங்கா சுதந்திர கட்சியுடன் கூட்டணி அமைப்பது தொடர்பில் இதுவரை எந்தவொரு பேச்சுவார்த்தையும் முன்னெடுக்கப்படவில்லை என சிறிலங்கா பொதுஜன பெரமுனவின் தலைவர் மகிந்த ராஜபக்ச அண்மையில் தெரிவித்திருந்தார்.
தேர்தல் விஞ்ஞாபனம்
இந்த நிலையில், சிறிலங்கா பொதுஜன பெரமுனவுடன் ஒன்றிணைவதற்கான எந்தவொரு திட்டமும் இல்லை என சுதந்திர கட்சியின் தலைவர் மைத்திரிபால சிறிசேன தெரிவித்துள்ளார்.
அத்துடன், இலங்கையில் நடைபெறவுள்ள தேர்தலை இலக்காகக் கொண்டு தேர்தல் விஞ்ஞாபனமொன்றை முன்வைப்பதற்கும் மாவட்ட மற்றும் தொகுதி மட்டத்தில் அமைப்பு செயற்பாடுகளை விரிவுபடுத்துவதற்கும் கலந்துரையாடப்பட்டு வருவதாகவும் அவர் கூறியுள்ளார்.
