பருத்தித்துறை கடலில் கைதான 12 இந்திய கடற்தொழிலாளர்கள் விடுதலை
பருத்தித்துறை கடற்பரப்பில் கைதான பன்னிரண்டு இந்திய கடற்தொழிலாளர்களும் நிபந்தனையின் அடிப்படையில் பருத்தித்துறை நீதிமன்றத்தினால் விடுவிக்கப்பட்டுள்ளனர்.
கடந்த டிசம்பர் மாதம் 9ஆம் திகதி கைதான இந்திய மீனவர்களின் வழக்கு நேற்று (12) விசாரணைக்கு எடுத்துக்கொள்ளப்பட்ட போதே இந்த தீர்ப்பு வழங்கப்பட்டுள்ளது.
வழக்கில் படகின் உரிமையாளரை பிரதான சந்தேக நபராக இணைத்துக் கொள்ள வேண்டும் என்பது தொடர்பாக சட்டமா அதிபர் திணைக்களத்தை சேர்ந்த அரச சட்டவாளர் நிஷாந் நாகரட்ணம் நீதிமன்றில் முன்னிலையாகி கோரிக்கை விடுத்திருந்தார்.
பிரதான சந்தேக நபர்
படகின் உரிமையாளரை பிரதான சந்தேக நபராக சேர்க்க முடியும், எனவும் இது 2018ம் ஆண்டு திருத்தப்பட்ட புதிய கடற்றொழில், வெளிநாட்டு படகுகளுக்கான சட்டத்தில் இணைக்கப்பட்டுள்ளதாகவும் அவர் மன்றுக்கு உரைத்திருந்தார்.
தவிரவும், சட்டமா அதிபர் திணைக்கள அரச சட்டத்தரணி நிஷாந் நாகரட்ணம் 2018ம் ஆண்டு திருத்தப்பட்ட சட்டம் தொடர்பில் மன்றுக்குரைத்த விடயதானங்களை ஆராய்ந்த பருத்தித்துறை நீதவான் குறித்த விண்ணப்பத்தை இன்று (13) கட்டளையாக்கி உத்தரவிட்டார்.
சாதாரண சிறைத் தண்டனை
இதன் போது படகின் உரிமையாளரை முதலாவது சந்தேக நபராக குறிப்பிட்டு அவருக்கான அழைப்பாணையை இலங்கை நீதித்துறை ஊடாக அனுப்புவதற்கும் நீதவான் கிரிசாந்தன் பொன்னுத்துரை கட்டளை பிறப்பித்து உத்தரவிட்டார்.
பின்னர், நீரியல் வளத்துறையால் 12 மீனவர்களுக்கு எதிராக சுமத்தப்பட்ட மூன்று குற்றச்சாட்டுகள் அடங்கிய குற்றப்பத்திரம் தாக்கல் செய்யப்பட்டிருந்தது.
மூன்று குற்றச்சாட்டுகளையும் மீனவர்கள் ஏற்றுக் கொண்டதன் அடிப்படையில் மூன்று குற்றச்சாட்டுக்கும் தலா ஆறுமாத சாதாரண சிறைத் தண்டனை என்னும் அடிப்படையில், 18 மாத சாதாரண சிறைத் தண்டனை விதித்த பருத்துத்துறை நீதவான் நீதிமன்ற நீதிவான் கிருஷாந்தன் பொன்னுத்துரை அதனை பத்து வருடங்களுக்கு ஒத்திவைத்து தீர்ப்பளித்துள்ளமை குறிப்பிடத்தக்கது.
புங்குடுதீவு 11ம் வட்டாரம், புங்குடுதீவு 10ம் வட்டாரம், சுவிஸ், Switzerland, கொழும்பு
12 Mar, 2026
