லண்டன் வாசிகளை அதிர்ச்சியடைய வைத்த கொலை!
பிரித்தானிய தலைநகர் லண்டன் குறைடன் பகுதியில் 15 வயதான பாடசாலை மாணவி ஒருவர் பரபரப்பான காலை வேளையில் கத்தியால் குத்திக் கொலைசெய்யப்பட்ட சம்பவம் அதிர்ச்சியை ஏற்படுத்தியுள்ளது.
குறித்த சிறுமி கத்தியால் குத்தப்பட்ட ஒரு மணி நேரத்தின் பின்னர் இந்தக் கொலையுடன் சம்பந்தப்பட்டதாகக் கருதப்படும் இளைஞர் ஒருவர் கைது செய்யப்பட்டதாக லண்டன் காவற்துறை அறிவித்துள்ளது.
அதிர்ச்சியடைய வைத்த கொலை
நேற்று (27) பரபரப்பான காலை வேளையில் இடம்பெற்ற இந்தக் கத்திக்குத்துச் சம்பவம் லண்டன் வாசிகளை அதிர்ச்சியடைய செய்துள்ளது.
பரபரப்பு மற்றும் காலை வேளை போக்குவரத்து நெரிசல் நிலவிய போது 15 வயது சிறுமி கத்தியால் குத்தப்பட்ட இந்தச் சம்பவம் இடம்பெற்றதாக லண்டன் பெருநகர காவல்துறை தெரிவித்துள்ளது.
இந்தச் சம்பவம் காலை 8.30 மணிக்கு முன்னர் இடம்பெற்றதையடுத்த தெற்கு லண்டனில் உள்ள வெல்லஸ்லி வீதிக்கு காவற்துறையினர் விரைந்து சென்றிருந்தனர்.
இதே போலவே லண்டன் அம்புலன்ஸ் எனப்படும் நோயாளர் காவு வண்டிச் சேவையில் இருந்து மூன்று வண்டிகளுடன் மருத்துவ குழுவும் அந்த இடத்துக்கு விரைந்து சென்றிருந்தது.
பதினாறாவது கொலை
இதற்கும் அப்பால் ஏயார் அம்புலன்ஸ் எனப்படும் உலங்கு வானூர்தியொன்றும் அந்த இடத்துக்கு அனுப்பப்பட்டபோதிலும் தாக்குதலுக்கு உள்ளான மாணவியின் உயிரை காத்துக்கொள்ள முடியவில்லை.
இந்த ஆண்டு மட்டும் லண்டனில் கொலை செய்யப்பட்ட பதினாறாவது நபராக குறித்த மாணவி பதிவாகியுள்ளார்.
இந்த 16 பேரில் 13 பேர் கத்தியால் குத்தப்பட்டு பலியாகியுள்ளனர்.
