வடக்கு - கிழக்கில் 2 இலட்சம் ஏக்கர் காணிகள் விரைவில் விடுவிக்கப்படும் : அமைச்சர் அறிவிப்பு

Eastern Province Northern Province of Sri Lanka Dammika Patabendi

By Theepan Oct 18, 2026 06:36 AM GMT

Theepan

in சமூகம்

Report

வடக்கு, கிழக்கு மாகாணங்களில் வனவளத் திணைக்களம் மற்றும் வனஉயிரிகள் திணைக்களத்தின் கட்டுப்பாட்டில் உள்ள சுமார் 2 இலட்சம் ஏக்கர் காணிகளை விடுவிப்பதற்கான பரிந்துரைகள் விரைவில் அமைச்சரவைக்குச் சமர்ப்பிக்கப்படவுள்ளதாக சுற்றுச்சூழல் அமைச்சர் தம்மிக்க பட்டபெந்தி தெரிவித்தார்.

வடக்கு மாகாண ஆளுநர் செயலகத்தில் வெள்ளிக்கிழமை (16) நடைபெற்ற காணிகளை விடுவிப்பது தொடர்பில் ஆராயும் விசேட கலந்துரையாடலின் போதே அவர் இதனைக் குறிப்பிட்டார்.

தொடர்ந்தும் கருத்துத் தெரிவித்த அமைச்சர், 2012ஆம் ஆண்டு புவியிடங்காட்டித் தொழில்நுட்பத்தைப் (ஜி.பி.எஸ்.) பயன்படுத்தி வடக்கு மற்றும் கிழக்கு மாகாணங்களில் பெருமளவிலான காணிகள் வனவளத் திணைக்களம் மற்றும் வனஉயிரிகள் திணைக்களத்தின் கட்டுப்பாட்டுக்குள் கொண்டுவரப்பட்டது.

அமைச்சரவையின் அனுமதி

அவற்றில் மருத்துவமனைகள், அரச திணைக்களங்களுக்குச் சொந்தமான காணிகள் மற்றும் தனியார் காணிகளும் உள்ளடங்கியுள்ளன.

வடக்கு - கிழக்கில் 2 இலட்சம் ஏக்கர் காணிகள் விரைவில் விடுவிக்கப்படும் : அமைச்சர் அறிவிப்பு | 2 Lakh Ac Land In The North East Will Be Released

இக்காணிகளை அடையாளம் கண்டு விடுவிப்பதற்காக 2025ஆம் ஆண்டு அமைச்சரவையின் அனுமதியுடன் குழுவொன்று நியமிக்கப்பட்டது, அந்தக் குழுவுக்கு ஆறு மாதங்கள் கால அவகாசம் வழங்கப்பட்டபோதும், ஓராண்டு கடந்தும் இறுதி அறிக்கை அமைச்சரவைக்குச் சமர்ப்பிக்கப்படவில்லை.

சில அதிகாரிகளிடமிருந்து போதிய ஒத்துழைப்பு கிடைக்காததால் செயன்முறையை முழுமைப்படுத்துவதில் தாமதம் ஏற்பட்டுள்ளது. எனினும், ஆய்வுகள் நிறைவடைந்து விடுவிப்பதற்குப் பரிந்துரைக்கப்பட்ட காணிகளைக்கூட இதுவரை விடுவிக்க முடியாத நிலை காணப்படுகின்றது.

மேய்ச்சல் நிலங்களை விடுவித்தல்

வடக்கு மற்றும் கிழக்கு மாகாணங்களில் இருந்து சுமார் 2 இலட்சம் ஏக்கர் காணிகளை விடுவிப்பதற்கான பரிந்துரைகளை விரைவில் அமைச்சரவைக்குச் சமர்ப்பித்து, அதன் ஒப்புதலுடன் காணிகளை விடுவிப்பதற்கான நடவடிக்கைகள் முன்னெடுக்கப்படும்.

வடக்கு மாகாணத்தில் கால்நடைகளுக்கான மேய்ச்சல் நிலங்களையும் விடுவிக்கப்பட வேண்டிய காணிகளை அடையாளம் காண வேண்டும்.

மக்களின் வாழ்விடங்கள், வாழ்வாதாரங்கள் மற்றும் அபிவிருத்தித் தேவைகள் தொடர்பான பிரச்சினைகளுக்குத் தீர்வு காண்பதற்கும், திணைக்களங்களுக்கு இடையிலான ஒருங்கிணைப்பை வலுப்படுத்துவதற்கும் உரிய நடவடிக்கைகளை முன்னெடுக்க வேண்டும்.

இக்கலந்துரையாடலில் ஆளுநரின் செயலாளர், மாகாணப் பணிப்பாளர்கள், வனவளத் திணைக்களம் மற்றும் வனஉயிரிகள் திணைக்களங்களின் உதவிப் பணிப்பாளர்கள், மாவட்ட அதிகாரிகள் உள்ளிட்டோர் கலந்துகொண்டமை குறிப்பிடத்தக்கது.