துப்பாக்கி முனையில் கடத்தல் முயற்சி: சந்தேக நபர் கைது
அம்பாந்தோட்டை(Hambantota) - வலஸ்முல்ல பிரதேசத்தில் துப்பாக்கி முனையில் அச்சுறுத்தி யுவதி ஒருவரை கடத்திச் செல்ல முற்பட்ட நபரொருவர் கைது செய்யப்பட்டுள்ளார்.
இந்த கைது நடவடிக்கை நேற்றிரவு(07.11.2024) இடம்பெற்றுள்ளது.
கைது நடவடிக்கை
சம்பவம் தொடர்பில் தெரியவருகையில், குறித்த சந்தேக நபர் நேற்று (07) இரவு வலஸ்முல்ல பொலிஸ் பிரிவுக்குட்பட்ட ஹொரேவெல பகுதியில் உள்ள வீடொன்றிற்குள் அத்துமீறி நுழைந்து, வீட்டில் இருந்தவர்களை துப்பாக்கி முனையில் அச்சுறுத்தி யுவதியை கடத்திச் செல்ல முற்பட்டுள்ளார்.
இதையடுத்து, 119 என்ற காவல்துறையினரின் அவசர இலக்கத்திற்கு சம்பவம் தொடர்பில் தகவல் வழங்கப்பட்டுள்ளது.
இதனை தொடர்ந்து சம்பவ இடத்திற்கு விரைந்த காவல்துறையினர் 2 நாட்டுத் துப்பாக்கிகள், 2 தடைசெய்யப்பட்ட கத்திகள், இரும்பு கம்பிகள் மற்றும் இரும்புத் துண்டுகள் உள்ளிட்டவற்றை வைத்திருந்த சந்தேகநபரை பெரும் முயற்சிகளை மேற்கொண்டு கைது செய்ததாக தெரிவித்துள்ளனர்.
மேலதிக விசாரணை
இதன்போது, தெனியாய பிரதேசத்தை சேர்ந்த 22 வயதுடைய சந்தேக நபரே கைது செய்யப்பட்டுள்ளார்.
அவர், குறித்த சிறுமியுடன் காதல் உறவில் ஈடுபட்டு வந்த நிலையில், சிறுமியுடனான தொடர்பை சில மாதங்களுக்கு முன்னர் துண்டித்துவிட்டதாக தெரியவருகிறது.
மேலும், இந்த சம்பவம் தொடர்பிலான மேலதிக விசாரணைகளை வலஸ்முல்ல காவல்துறையினர் மேற்கொண்டு வருகின்றனர்.
| செய்திகளை உடனுக்குடன் தெரிந்து கொள்ள IBC தமிழ் WHATSAPP இல் இணைந்து கொள்ளுங்கள்...! |
