சீரற்ற காலநிலை: மலையகம் செல்லும் சாரதிகளுக்கு காவல்துறையினர் எச்சரிக்கை
நுவரெலியா மாவட்டத்தில் அடைமழையுடன் கடும் பனிமூட்டம் காணப்படுவதனால் வாகன சாரதிகள் மிகவும் அவதானமாக தங்களது வாகனங்களை செலுத்த வேண்டும் என போக்குவரத்துக்கு பொறுப்பான காவல்துறையினர் எச்சரிக்கை விடுத்துள்ளனர்.
நாட்டில் நிலவிவரும் சீரற்ற காலநிலையினை தொடர்ந்து மத்திய மலைநாட்டின் பல பிரதேசங்களில் தொடர்ச்சியாக மழையுடன் கூடிய காலநிலை நிலவி வருகிறது.
ஹட்டன் - கொழும்பு பிரதான வீதியில் பிட்டவல, கினிகத்தேனை, தியகல, வட்டவளை, ரொசல்ல, ஹட்டன் உள்ளிட்ட பிரதேசங்களிலும்.
ஹட்டன் - நுவரெலியா பிரதான வீதியில் குடாகம, கொட்டகலை, சென்கிளையார், தலவாக்கலை, லிந்துலை, சமர்செட், நானுஓயா ரதல்ல உள்ளிட்ட பிரதேசங்களில் கடும் பனிமூட்டம் காணப்படுவாதனால் இந்த வீதிகளில் பயணிக்கும் வாகன சாரதிகள் மிகவும் அவதானமாக வாகனங்களை செலுத்துமாறு காவல்துறையினர் எச்சரிக்கை விடுத்துள்ளனர்.
பனிமூட்டம் காணப்படும் பிரதேசங்களில் பயணிக்கும் போது தமக்குரிய பக்கத்தில் வாகனத்தின் முகப்பு விளக்குகளை ஒளிரச் செய்தவாறு பயணிப்பதன் மூலம் வாகன விபத்துக்களை தவிர்த்துக் கொள்ளலாம் என காவல்துறையினர் சுட்டிக்காட்டியுள்ளனர்.
பனிமூட்டம் காரணமாக ஹட்டன் - கொழும்பு மற்றும் ஹட்டன் - நுவரெலியா பிரதான வீதிகள் உள்ளிட்ட பல வீதிகளில் வாகனப் போக்குவரத்து ஸ்தம்பிதம் அடைந்துள்ளது.
இது தொடர்பான மேலும் பல செய்திகளை இன்றைய காலை நேர செய்தி தொகுப்பில் காண்க.
