நேபாளுக்கு விஜயம் செய்யவுள்ள அலி சப்ரி : அந்த நாட்டு அதிபரை சந்திக்கவுள்ளதாகவும் தகவல்!

Ali Sabry Sri Lanka Nepal Ministry of Foreign Affairs - sri lanka

By Eunice Ruth Dec 19, 2023 03:08 PM GMT

Eunice Ruth

in அரசியல்

Report

சிறிலங்கா வெளிவிவகார அமைச்சர் அலி சப்ரி நாளை (20) நேபாளின் தலைநகரமான காத்மண்டுவுக்கு உத்தியோகப்பூர்வ பயணமொன்றை மேற்கொள்ளவுள்ளார்.

வெளிவிவகார அமைச்சர்கள் மட்டத்திலான இலங்கை - நேபாள கூட்டு ஆணைக்குழுவின் ஆரம்ப அமர்வில் கலந்து கொள்வதற்காக இந்த பயணம் மேற்கொள்ளப்படவுள்ளதாக தெரிவிக்கப்பட்டுள்ளது.

இலங்கை - நேபாள கூட்டு ஆணைக்குழுவின் ஆரம்ப அமர்வில் இலங்கை சார்பில் கலந்து கொள்ளவிருக்கும் உயர்மட்டக் குழுவுக்குத் அலி சப்ரி தலைமை தாங்கவுள்ளார்.

இலங்கை-நேபாள கூட்டு ஆணைக்குழு

அத்துடன், நேபாள வெளிவிவகார அமைச்சர் நாராயண் பிரகாஷ் சவுத்துடன் இணைந்து இலங்கை-நேபாள கூட்டு ஆணைக்குழுவின் ஆரம்ப அமர்வுக்கு அலி சப்ரி இணைத்தலைமை தாங்கவுள்ளதாக வெளிவிவகார அமைச்சு வெளியிட்டுள்ள அறிக்கையில் குறிப்பிடப்பட்டுள்ளது.

நேபாளுக்கு விஜயம் செய்யவுள்ள அலி சப்ரி : அந்த நாட்டு அதிபரை சந்திக்கவுள்ளதாகவும் தகவல்! | Foreign Minister Ali Sabry Visit Kathmandu Nepal

இந்த அமர்வில் வர்த்தகம், முதலீடு, சுற்றுலா, கல்வி, பாதுகாப்பு, கலாசாரம் மற்றும் மக்கள் தொடர்பு ஆகியவை உள்ளிட்ட பல்வேறு துறைகளிலும் இலங்கை-நேபாளம் ஆகிய இருநாடுகளுக்கும் இடையில் நிலவும் ஒத்துழைப்பு குறித்து விரிவாக ஆராயப்படவுள்ளது.

அத்துடன், விஞ்ஞானம், தொழில்நுட்பம் மற்றும் புத்தாக்கம் ஆகிய துறைகளில் இருதரப்பு ஒத்துழைப்பை வலுப்படுத்துவதை முன்னிறுத்திய புரிந்துணர்வு ஒப்பந்தமொன்றும் இதன் போது கைச்சாத்திடப்படவுள்ளது.

பக்க சந்திப்புக்கள்

இதேவேளை, எதிர்வரும் வெள்ளிக்கிழமை வரை காத்மண்டுவில் தங்கியிருக்கும் அலி சப்ரி, கூட்டு ஆணைக்குழு அமர்வின் பக்க அம்சமாக நேபாள வெளியுறவுத்துறை அமைச்சர் நாராயண் பிரகாஷ் சவுத்துடன் இருதரப்புப் பேச்சுவார்த்தைகளிலும் ஈடுபடவுள்ளார்.

இதனை தொடர்ந்து, நேபாள அதிபர் ராம் சந்திர பவுடேல் மற்றும் பிரதமர் புஷ்ப கமல் தஹல் ஆகியோரையும் மரியாதை நிமித்தமாக வெளிவிவகார அமைச்சர் சந்திக்கவிருப்பதாக அமைச்சு வெளியிட்டுள்ள அறிக்கையில் குறிப்பிடப்பட்டுள்ளது.

மேலும், காத்மண்டுவுக்கான விஜயத்தின் போது அலி சப்ரி, நேபாளத்திலுள்ள புலம்பெயர் இலங்கையர்களையும் சந்திக்கவுள்ளதாக தெரிவிக்கப்பட்டுள்ளமை குறிப்பிடத்தக்கது.