தொடரும் கனமழை : பல நீர்த்தேக்கங்களின் வான் கதவுகள் திறப்பு! விடுக்கப்பட்டுள்ள எச்சரிக்கை

நாட்டடில் நிலவும் தொடர்ச்சியான பலத்த மழை காரணமாக பல பிரதான நீர்த்தேக்கங்களின் நீர்மட்டம் கணிசமாக உயர்ந்துள்ளதால், அவற்றுள் பல நீர்த்தேக்கங்களின் வான் கதவுகள் திறக்கப்பட்டுள்ளதாக நீர்ப்பாசனத் திணைக்களம் தெரிவித்துள்ளது.

இதற்கமைய, தெதுரு ஓயா, ராஜங்கனை, குக்குளே கங்கை மற்றும் கலாவாவி ஆகிய நீர்த்தேக்கங்களிலிருந்து நீர் வெளியேற்றப்பட்டு வருகின்றது.

இந்தநிலையில், குறித்த நீர்த்தேக்கங்களுக்குக் கீழே அமைந்துள்ள ஆறுகள் மற்றும் ஓடைகளுக்கு அருகில் வசிக்கும் மக்கள் மிகுந்த அவதானத்துடன் செயற்படுமாறு கேட்டுக்கொள்ளப்பட்டுள்ளனர்.

யாழ். உள்ளிட்ட பகுதி மக்களுக்கு முக்கிய அறிவித்தல்: திடீரெனப் பெய்யும் கன மழை

வான் கதவுகள் திறக்கப்படும் 

தெதுரு ஓயா நீர்த்தேக்கத்தின் நீர்மட்டத்தைக் கட்டுப்படுத்தும் நோக்கில், அதன் எட்டு வான் கதவுகள் இரண்டு அடி வீதம் திறக்கப்பட்டுள்ளன. இதன் மூலம் தெதுரு ஓயாவுக்கு வினாடிக்கு 10,400 கன அடி நீர் வெளியிடப்படுகிறது.

நீர்த்தேக்கத்தின் நீர்ப்பிடிப்புப் பகுதிக்குக் கிடைக்கும் மழைவீழ்ச்சி மற்றும் நீர்த்தேக்கத்திற்குள் வரும் நீரின் அளவைப் பொறுத்து எதிர்வரும் காலங்களில் வான் கதவுகள் திறக்கப்படும் அளவு மாறக்கூடும் என நீர்ப்பாசனத் திணைக்களம் சுட்டிக்காட்டியுள்ளது.

இதேவேளை, ராஜங்கனை நீர்த்தேக்கத்தின் ஆறு வான் கதவுகள் திறக்கப்பட்டு கலா ஓயாவுக்கு வினாடிக்கு 3,800 கன அடிக்கும் அதிகமான நீர் வெளியேற்றப்பட்டு வருகிறது.

இந்த நீர் வெளியேற்றம் காலை 9 மணியளவில் வினாடிக்கு 8,000 கன அடியாக அதிகரிக்கப்படும் என எதிர்பார்க்கப்படுவதுடன் வானிலை நிலவரத்திற்கு ஏற்ப இத்தீர்மானம் மாற்றமடையக்கூடும்.

மேலும், குக்குளே கங்கை நீர்த்தேக்கத்தின் நீர்ப்பிடிப்புப் பகுதிகளில் பெய்துவரும் மழையைக் கருத்திற்கொண்டு அதன் ஒரு வான் கதவு திறக்கப்பட்டுள்ளது. அதன் மூலம் வினாடிக்கு 45 கன மீற்றர் நீரும், மின் உற்பத்தியின் போது வினாடிக்கு 48 கன மீற்றர் நீரும் வெளியேற்றப்படுகின்றன.

வங்காள விரிகுடாவில் தீவிர புயல் அபாயம்! விடுக்கப்பட்ட எச்சரிக்கை

நீர்ப்பாசனத் திணைக்களம்

அதற்கமைய, நீர்த்தேக்கத்திலிருந்து குடா ஓயாவுக்கு வெளியேற்றப்படும் மொத்த நீரின் அளவு வினாடிக்கு 93 கன மீற்றராக உள்ளதாக நீர்த்தேக்கப் பொறுப்பதிகாரி தெரிவித்துள்ளார்.

அதுமட்டுமின்றி, அதிக மழை காரணமாக கலாவாவியின் நீர்மட்டமும் உயர்ந்துள்ளது. மேல் நீர்ப்பிடிப்புப் பகுதியில் பெய்துவரும் மழையின் காரணமாக தம்புள்ள ஓயா ஊடாக கலாவெவுக்கு வினாடிக்கு 5,500 கன அடிக்கு நெருக்கமான நீர் வந்து சேருவதுடன், தற்போது அதன் நீர் கொள்ளளவு அதிகரித்துள்ளது.

கலாவாவி வான் பாயும் அபாயத்தைக் கருத்திற்கொண்டு அதன் அவசர வான் கதவுகள் இரண்டும் ஆறு அங்குலம் வீதம் திறக்கப்பட்டு, அதன் மூலம் கலா ஓயாவுக்கு வினாடிக்கு 511 கன அடி நீர் வெளியேற்றப்பட்டு வருவதாகக் குறிப்பிடப்பட்டுள்ளது.

இந்தச் சூழ்நிலையைக் கருத்திற்கொண்டு, குறித்த நீர்த்தேக்கங்களின் கீழ் பகுதிகளில் வசிக்கும் பொதுமக்கள் நீர் நிலைகளில் ஏற்படும் நீர்மட்ட மாற்றங்கள் குறித்து விழிப்புடன் இருக்குமாறு அறிவுறுத்தப்பட்டுள்ளனர்.

அத்துடன், வான் கதவுகள் திறப்பு மற்றும் நீர் வெளியேற்றம் தொடர்பில் நீர்ப்பாசனத் திணைக்களம் மற்றும் அனர்த்த முகாமைத்துவப் பிரிவுகளினால் வெளியிடப்படும் உத்தியோகபூர்வ அறிவிப்புகளைப் பின்பற்றிச் செயற்படுமாறு பொதுமக்களுக்கு மேலதிகமாக அறிவுறுத்தப்பட்டுள்ளது.

பொய் அறிக்கை: செம்மணியில் உண்மையில் என்ன நடந்தது...! அரசுக்கு தமிழ்த்தரப்பு அழுத்தம்