சீனக் கப்பல் விவகாரம் - இந்தியா, அமெரிக்காவுக்கு காட்டமான செய்தி

யுவான் வாங் - 5 கப்பல் விவகாரத்தில் இந்தியாவும் அமெரிக்காவும் அழுத்தம் பிரயோகிப்பதை அவதானிக்க முடிகிறது.

இவ்விரு நாடுகளின் தேவைகளுக்காக இலங்கையின் வெளிவிவகாரக் கொள்கையினை மாற்றியமைத்துக்கொள்ள முடியாது என முன்னாள் அமைச்சரும் ஆளும் கட்சி நாடாளுமன்ற உறுப்பினருமான ரியல் அட்மிரல் சரத் வீரசேகர தெரிவித்தார்.

சர்வதேச அளவில் பேசுபொருளாக மாறியுள்ள இந்தக் கப்பல் விவகாரம் தொடர்பில் தென்னிலங்கை ஊடகம் ஒன்று வினவிய போதே அவர் மேற்கண்டவாறு கூறியுள்ளார்.

மேலும் கருத்து தெரிவித்த அவர்,

“யுவான் வாங் - 05 கண்காணிப்பு கப்பல் ஹம்பாந்தோட்டை துறைமுகத்திற்கு வருகை தருவதை இந்தியா கடுமையாக எதிர்க்கிறது.

இந்தியா மற்றும் அமெரிக்காவின் யுத்தக் கப்பல்கள் இலங்கைக்கு வருகை தரும் போது சீனா ஒருபோதும் எதிர்ப்பு தெரிவிக்கவில்லை.

சீனக் கப்பல் உளவு பார்ப்பதற்காகவே ஹம்பாந்தோட்டை துறைமுகத்திற்கு வருகை தருகிறது என இந்தியா குறிப்பிடுவது அடிப்படையற்றதாகும்.

இந்தியாவுக்கு பதில்

சீனாவின் கப்பல் இந்தியாவை உளவு பார்ப்பதற்கு ஹம்பாந்தோட்டை துறைமுகத்திற்கு வருகை தர வேண்டிய தேவை கிடையாது.

ஹம்பாந்தோட்டை துறைமுகத்திற்கு வருகை தராமல் கடற்பரப்பில் இருந்தவாறே இந்தியாவை உளவு பார்க்க முடியும். ஆகவே இந்தக் கப்பல் விவகாரத்தில் இந்தியாவின் நிலைப்பாட்டை ஏற்றுக்கொள்ள முடியாது” என்றார்.