தமிழர் மரபுகளைப் பேணிக்காக்க அணிதிரளுங்கள் - யாழ். பல்கலை மாணவர் ஒன்றியம் அழைப்பு

 பௌத்த பேரினவாதத்தின் ஆதிக்கம் அதிகரித்துவரும் நிலையில் எமக்கான உரிமைகளை மீட்டெடுக்கவும் எமது மரபுகளை பேணிக்காக்கவும் மக்கள் அனைவரும் குருந்தூர்மலைக்கு நாளை வருகை தந்து பொங்கல் விழாவில் பங்கேற்குமாறு யாழ்ப்பாணப் பல்கலைக்கழக மாணவர் ஒன்றியம் அழைப்பு விடுத்துள்ளது.

இது தொடர்பில் யாழ்ப்பாண பல்கலைக்கழக மாணவர் ஒன்றியம் வெளியிட்ட அறிக்கையில் குறிப்பிடப்பட்டுள்ளதாவது,

" குருந்தூர்மலை ஆதிசிவன் ஐயனார் ஆலயத்தில் நாளை வெள்ளிக்கிழமை (18.08.2023) காலை பொங்கல் வழிபாடு இடம்பெறவுள்ளதாக ஆலய நிர்வாகத்தினர் அறிவித்திருந்தனர்.

இந்த விடயமானது நீதிமன்றில் சமர்ப்பிக்கப்பட்டநிலையில் சைவவழிபாடுகளை மேற்கொள்வதற்கு தடையில்லை என்று தொல்லியல் திணைக்களம் அறிவித்திருந்தது.

நீதிமன்று அனுமதி

பொங்கல் வழிபாட்டை தடுப்பதற்கு அரச தரப்பினர் மற்றும் தமிழ்ச் சமூக விரோதத் தரப்புகளால் இறுதிவரை பல முயற்சிகள் மேற்கொள்ளப்பட்டிருந்த போதும், " பொங்கல் வழிபாட்டைத் தடுப்பதற்கு அதிகாரம் இல்லை " என்று முல்லைத்தீவு நீதிமன்று கட்டளை பிறப்பித்துள்ளது.

அத்துடன் சிறிலங்கா காவல்துறையினரின் தடையுத்தரவுக் கோரிக்கையையும் முல்லைத்தீவு நீதவான் நீதிமன்று நிராகரித்து தீர்ப்பளித்துள்ளமை குறிப்பிடத்தக்கது.

மக்களுக்கான அழைப்பு

எனவே பேரினவாத சக்திகளின் ஆதிக்கம் அதிகரித்துவரும் இந் நிலையில் எமக்கான உரிமைகளை மீட்டெடுக்கவும் எமது மரபுகளை பேணிக்காக்கவும் மக்கள் அனைவரும் குருந்தூர்மலைக்கு நாளை வருகை தந்து பொங்கல் விழாவை சிறப்பிக்குமாறு உரிமையுடன் கேட்டுக்கொள்கின்றோம்.

வடக்கும் கிழக்கும் தமிழர் தாயகம்

வடக்கும் கிழக்கும் தமிழர் தாயகம் ஆகும்.

இங்கே எமது வரலாறுகளை மறைக்கும், மழுங்கடிக்கும் செயற்பாடுகளை நாம் வன்மையாகக் கண்டிக்கிறோம் " - என மேலும் தெரிவிக்கப்பட்டுள்ளது.