தேரர்களின் தாய்லாந்து போதைப்பொருள் கடத்தல்! விசாரணையில் கண்டறியப்பட்ட முக்கிய சூத்திரதாரி
தாய்லாந்திலிருந்து நாட்டிற்குள் குஷ் மற்றும் ஹாஷ் போதைப்பொருட்களைக் கொண்டுவந்த சம்பவம் தொடர்பாகக் கைது செய்யப்பட்ட இருபத்து மூன்று தேரர்களையும் மே 12ஆம் திகதி வரை விளக்கமறியலில் வைக்குமாறு நீர்கொழும்பு மேலதிக நீதவான் சுபானி அபேசேகரா உத்தரவு பிறப்பித்துள்ளார்.
குறித்த வழக்கு நேற்று விசாரணைக்கு எடுத்துக்கொள்ளப்பட்ட நிலையிலேயே இந்த உத்தரவை நீதவான் பிறப்பித்துள்ளார்.
தாய்லாந்துக்குச் சுற்றுப்பயணம் மேற்கொண்டிருந்த குறித்த தரப்பினரின் பயணப் பைகளில் 112 கிலோகிராம் 'குஷ்' மற்றும் 'ஹாஷ்' போதைப்பொருட்கள் கண்டெடுக்கப்பட்டதைத் தொடர்ந்து, ஏப்ரல் 25 ஆம் திகதி நாட்டிற்கு வந்தடைந்தபோது கட்டுநாயக்க விமான நிலையத்தில் வைத்து கைது செய்யப்பட்டனர்.
போதைப்பொருட்கள் அடங்கிய பெட்டி
அவர்களிடம் நடத்தப்பட்ட விசாரணையின் போது, இந்த சட்டவிரோதச் செயலை அமிதானந்தா என்ற தேரர் திட்டமிட்டு அரங்கேற்றியது தெரியவந்துள்ளது.
பின்னர், கம்பஹா பகுதியில் உள்ள ஒரு கோவிலில் பதுங்கியிருந்தபோது, அமிதானந்தா என்ற துறவியும் கைது செய்யப்பட்டார்.
இதன்படி நீர்கொழும்பு மேலதிக நீதிபதி சுபானி அபேசேகரா முன்னிலையில் சட்ட நடவடிக்கைகள் அழைக்கப்பட்டபோது, இந்த போதைப்பொருள் கடத்தலில் ஈடுபட்ட பல முக்கிய சூத்திரதாரிகள் அடையாளம் காணப்பட்டுள்ளதாகக் கூறி, காவல்துறை போதைப்பொருள் தடுப்புப் பிரிவு அதிகாரிகள் ஒரு மேலதிக விசாரணை அறிக்கையைச் சமர்ப்பித்தனர்.
நீதிமன்றுக்கு சமர்ப்பித்த அறிக்கையின் படி,
“ இந்தத் தேரர்கள் அனைவரும் வணக்கத்திற்குரிய அங்குனுகோலா அமிதானந்த தேரரால் நடத்தப்படும் ஒரு வாட்ஸ்அப் குழுவின் மூலம் ஒன்று சேர்க்கப்பட்டுள்ளனர். இந்தத் தேரர்களுக்கு , தாய்லாந்தில் உள்ள தம்மா என்று அழைக்கப்படும் தம்மரக்கித்தா என்ற தேரர் தங்குமிடம் வழங்கியுள்ளார்.
பின்னர், அதே தம்மரக்கித்தா என்ற தேரர் , ஏப்ரல் 25 ஆம் திகதி நாட்டுக்கு திரும்புவதற்காக, போதைப்பொருட்கள் அடங்கிய ஒரு பெட்டியை இந்தத் தேரர்களிடம் கொடுத்துள்ளார்.
இந்த கைது பின்னணியில், எமது விசாரணையில் அம்பகஸ்முல்லாவைச் சேர்ந்த புண்யரத்னா என்ற மற்றொரு தேரர் அடையாளம் காணப்பட்டார்.
கடத்தலின் முக்கிய சூத்திரதாரி
புண்யா என்ற அந்தத் தேரர்தான் இந்த போதைப்பொருள் கடத்தலின் முக்கிய சூத்திரதாரி. நாங்கள் தற்போது அந்தத் துறவியைக் கண்டுபிடிக்க விசாரித்து வருகிறோம்.
ஏனெனில், சந்திரகுமார ஜெயலத் என்ற என்பவருடன் இணைந்து இந்த போதைப்பொருட்களை விநியோகித்தவர் அந்தத் துறவிதான்.
சந்திரகுமாரா என்ற நபர் 6 கிராம் ஐஸ் போதைப்பொருளுடன் கைது செய்யப்பட்டு கடுவெல நீதவான் நீதிமன்றத்தில் முன்னிலைப்படுத்தப்பட்டுள்ளார்.
அதன் பின்னர் காவலில் வைப்பதற்கான உத்தரவு பெறப்பட்டுள்ளது” என்றுள்ளது.
மேலும், மேலதிக விசாரணைகள் தொடர்பான தகவல்களை மீண்டும் வழங்கிய புலனாய்வு அதிகாரி,
“ இந்த போதைப்பொருள் கடத்தல் நடவடிக்கையில் தற்போது ஈடுபட்டுள்ளதாக அறியப்படும் முக்கிய சூத்திரதாரிகள், இதற்கு முன்னர் போதைப்பொருட்கள் அடங்கிய 12 சூட்கேஸ்களை நாட்டிற்குள் கொண்டு வந்துள்ளனர்.
நான் முன்னர் குறிப்பிட்ட வணக்கத்திற்குரிய புண்யரத்ன தேரரின் வழிகாட்டுதலின் கீழ், போதைப்பொருள் அடங்கிய 12 சூட்கேஸ்கள் முந்தைய ஒரு சந்தர்ப்பத்தில் இந்த நாட்டிற்குள் கொண்டுவரப்பட்டுள்ளன.
தற்போதைய விசாரணை
மேலும், இந்த பயணத்திற்காக பிக்குகளை அழைத்துச் செல்லத் தேவையான விமான டிக்கெட்டுகளை வாங்குவதற்காக வணக்கத்திற்குரிய புண்யரத்ன சந்திரகுமாரருக்கு 5 மில்லியன் ரூபாய் வழங்கியுள்ளார்.
சந்திரகுமார 3.2 மில்லியன் ரூபாய்க்கு விமான டிக்கெட்டுகளை வாங்கியுள்ளார். மீதமுள்ள பணத்தைக் கொண்டு, போதைப்பொருள் அடங்கிய சூட்கேஸ்களை இந்த நாட்டிற்குள் கொண்டு வந்த பிறகு அவற்றை சேமித்து வைப்பதற்காக ஒரு வீட்டையும் வாங்கியுள்ளார்.
மேலும், தற்போதைய விசாரணையின் போது, இந்த தேரர்களைத் தொடர்புகொள்வதற்காக புண்யரத்ன தேரர் அங்குனுகோல அமிதானந்த தேரருக்கு 80,000 ரூபாய் வழங்கியுள்ளார் என்பதும் தெரியவந்துள்ளது” என்றார்.
| செய்திகளை உடனுக்குடன் தெரிந்து கொள்ள IBC தமிழ் WHATSAPP இல் இணைந்து கொள்ளுங்கள்...! |
புங்குடுதீவு 3ம் வட்டாரம், Herzogenbuchsee, Switzerland, Toronto, Canada, கரவெட்டி
05 Oct, 2022
