1500 நாட்கள் போராட்டம்: இன்னும் தீர்வின்றி தொடரும் மயிலத்தமடு - மாதவனை பண்ணையாளர்களின் கோரிக்கை

மயிலத்தமடு - மாதவனை மேய்ச்சல் தரைப் பண்ணையாளர்கள் 1,500 நாட்களுக்கும் மேலாக பல்வேறு வெகுஜனப் போராட்டங்களை முன்னெடுத்து வரும் நிலையில், அவர்களது உரிமைப் போராட்டம் பல்வேறு தரப்பினராலும் கையாளப்பட்டு, நியாயமான கோரிக்கைகள் மலினப்படுத்தப்பட்டுள்ளதாக குற்றம் சுமத்தப்பட்டுள்ளது.

தமிழ் தேசிய மக்கள் முன்னணியின் தேசிய அமைப்பாளர் தர்மலிங்கம் சுரேஷினால் குறித்த விடயம் தெரிவிக்கப்பட்டுள்ளது.

இதன் காரணமாக, பண்ணையாளர்கள் இன்று வரை எந்தவொரு நிரந்தரத் தீர்வும் இன்றி நடுத்தெருவில் விடப்பட்டுள்ளதாகவும் அவர் குறிப்பிட்டுள்ளார்.

தமிழ் தேசிய மக்கள் முன்னணியின் தேசிய அமைப்பாளர் தர்மலிங்கம் சுரேஷ், நேற்று ஞாயிற்றுக்கிழமை (04) வெளியிட்ட ஊடக அறிக்கையிலேயே இவ்வாறு தெரிவித்துள்ளார்.

அந்த அறிக்கையில் மேலும் தெரிவிக்கப்பட்டுள்ளதாவது: “மட்டக்களப்பு மாவட்டத்தின் எந்தவொரு பிரதேச செயலகப் பிரிவிலும் திபுலபொத்தானை என்ற பெயரில் கிராமம் எதுவும் இல்லை.

எனினும், தற்போது பெரியமாதவனைப் பகுதி திபுலபொத்தானை என அழைக்கப்பட்டு, ஆக்கிரமிப்புக்கு உட்படுத்தப்பட்டு வருவதாக குற்றஞ்சாட்டப்பட்டுள்ளது.

பல நூற்றாண்டுகளாக மேய்ச்சல் தரையாகப் பயன்படுத்தப்பட்டு வந்த மயிலத்தமடு - மாதவனை பகுதிகள் தற்போது சேனைப் பயிர்ச்செய்கைக்காக ஆக்கிரமிக்கப்பட்டு பயன்படுத்தப்பட்டு வருவதாகவும், அங்கு மேய்ச்சலில் ஈடுபடும் கால்நடைகள் மீது துப்பாக்கிச் சூடு நடத்தி, அவற்றை மேய்ச்சலுக்கு விடாமல் அச்சுறுத்தல்கள் விடுக்கப்படுவதாகவும் அந்த அறிக்கையில் தெரிவிக்கப்பட்டுள்ளது.

இந்நிலையில், ‘நல்லிணக்கம்’ என்ற பெயரில் இரு தரப்பினரையும் ஒரே மேய்ச்சல் நிலத்தைப் பயன்படுத்த அனுமதிப்பது, பண்ணையாளர்களை அப்பகுதியிலிருந்து படிப்படியாக வெளியேற்றுவதற்கான நடவடிக்கையாக அமையக்கூடும்.

இந்த நிலை தொடருமானால், எதிர்காலத்தில் கால்நடை வளம் பெருமளவில் பாதிக்கப்படும் அபாயம் காணப்படுவதாகவும் அந்த அறிக்கையில் குறிப்பிடப்பட்டுள்ளது.

அதேவேளை, பண்ணையாளர்களின் பிரச்சினைகளைப் பயன்படுத்தி தமது சுயநல நோக்கங்களுக்காக சிலர் செயற்பட்டுள்ளதாகவும் தர்மலிங்கம் சுரேஷ் குற்றஞ்சாட்டியுள்ளார்.

எனவே, மயிலத்தமடு - மாதவனை மேய்ச்சல் தரைப் பண்ணையாளர்களின் வாழ்வாதாரத்தையும் கால்நடை வளத்தையும் பாதுகாக்கும் வகையில் நிரந்தரமானதும் நியாயமானதுமான தீர்வு உடனடியாக வழங்கப்பட வேண்டும்" எனவும் அவர் வலியுறுத்தியுள்ளார்.

ஜோசப் பரராஜசிங்கம் படுகொலையுடன் கருணாவின் தொடர்பு...! உண்மைகளை உடைத்த நேரடி சாட்சி

சட்டவிரோத விகாரைக்குள் சட்டவிரோத கட்டிடங்கள்: தையிட்டியில் புதிய சர்ச்சை