தீவிரமடையும் பசிலை நாடுகடத்தும் நடவடிக்கை! அமெரிக்காவை சென்றடைந்த இரகசிய கடிதம்
முன்னாள் அமைச்சர் பசில் ராஜபக்சவைவை அமெரிக்காவிலிருந்து இலங்கைக்கு நாடு கடத்தும் செயல்முறை இறுதி செய்யப்பட்டுள்ளதாக வெளியாகிய தகவல் மீது இலங்கை அரசியலின் முழு கவணமும் திரும்பியுள்ளது.
இந்த விடயத்தை காவல்துறை வட்டாரங்கள் தலைமையக வட்டாரங்கள் நேற்று தெரிவித்திருந்தன.
இந்நிலையில் இந்த தகவலுக்கு மேலதிகமாக, இலங்கை வெளியுறவு அமைச்சகம் விசேட நடவடிக்கை ஒன்றை முன்னெடுத்துள்ளதாக தெரியவருகிறது.
அமெரிக்காவில் வசிக்கும் ராஜபக்ச குடும்பம்
அமெரிக்காவில் வசிக்கும் ராஜபக்ச குடும்ப உறுப்பினர்களுக்கு எதிரான ஊழல் குற்றச்சாட்டுகள் தொடர்பாக, இலங்கை வெளியுறவு அமைச்சகத்திற்கும் அமெரிக்க வெளியுறவுத் துறையின் சட்டத் துறைக்கும் இடையே முத்திரையிடப்பட்ட கடிதப் பரிமாற்றங்கள் நடைபெற்றுள்ளதாக சுட்டிக்காட்டப்பட்டுள்ளது.
எந்தவொரு ஒப்படைப்புக்குமான சட்ட அடிப்படை, 1999 செப்டம்பர் 30 அன்று அமெரிக்காவில் கையெழுத்திடப்பட்ட இலங்கைக்கும் அமெரிக்காவிற்கும் இடையிலான இருதரப்பு உடன்படிக்கையாகும்.
இந்த உடன்படிக்கை இரட்டைக் குற்றத்தன்மை என்ற கோட்பாட்டைப் பின்பற்றுகிறது. அதாவது, ஒருவரின் அடிப்படை நடத்தை இரு நாடுகளிலும் குற்றமாக அமைகிறது என்பதை அதிகாரிகள் நிரூபிக்க வேண்டும் என்பதே இந்த சட்டத்தின் அடிப்படையாகும்.
இதன்படி ராஜபக்ச ஒரு அமெரிக்கக் குடிமகன் என்ற தகுதி மட்டுமே, அந்த உடன்படிக்கையின் விதிகளின் கீழ், ஒரு முறையான கோரிக்கையிலிருந்து அவருக்கு விலக்கு அளிக்காது.
இரண்டு தனித்தனி குற்றவியல் வழக்குகள் தொடர்பாக முன்னாள் அமைச்சர் பசில் ராஜபக்ச நீதிமன்றத்தில் முன்னிலையாக தவறியதால், பல நீதிமன்றங்கள் அவருக்கு எதிரான கைது பிடியாணைகளை மீண்டும் பிறப்பித்துள்ளன.
முறையான சர்வதேச செயல்முறை
காவல்துறை நிதிக்குற்றப் புலனாய்வுப் பிரிவால் தாக்கல் செய்யப்பட்ட இந்த வழக்கில், பசில் ராஜபக்ச மற்றும் மனைவி திஸ்ஸ கலப்பத்தியின் சகோதரி என நீதிமன்ற அறிக்கைகளில் அடையாளம் காணப்பட்ட அயோமா கலப்பத்தி, முதிதா ஜெயகோடி உள்ளிட்ட பல சந்தேகநபர்களின் பெயர்கள் குறிப்பிடப்பட்டுள்ளன.
குறிப்பாக , அமெரிக்க உதவியை நாடுவதானது ஒரு முறையான சர்வதேச செயல்முறையைத் தொடங்குவதற்கு மட்டுமே வழிவகுக்கும் என்றும், அது தானாகவே ராஜபக்சவின் கைதுக்கோ அல்லது இலங்கைக்குத் திரும்புவதற்கோ வழிவகுக்காது என்றும் அதிகாரிகள் ஒப்புக்கொண்டனர்.
இதன்படி இலங்கை அதிகாரிகள் நீதிமன்ற உத்தரவுகள், கூறப்படும் குற்றங்களின் விவரங்கள் மற்றும் பிற துணை ஆவணங்களை உரிய தூதரக மற்றும் நீதித்துறை வழிமுறைகள் மூலம் சமர்ப்பிக்க வேண்டும்.
அதன்பிறகு, எந்தவொரு கோரிக்கையும் அமெரிக்கச் சட்டம் மற்றும் பொருந்தக்கூடிய சட்ட ஏற்பாடுகளின் கீழ் சம்பந்தப்பட்ட அமெரிக்க அதிகாரிகளால் பரிசீலிக்கப்படும்.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்...! |
