PTA தொடர்பான அநுர அரசின் நகர்வு: நீதியமைச்சரின் விசேட அறிவிப்பு!
புதிய பயங்கரவாதத் தடுப்புச் சட்டமூலம் தொடர்பாக பொதுமக்கள் தங்கள் கருத்துக்களையும் பரிந்துரைகளையும் எதிர்வரும் பெப்ரவரி மாதம் 28 ஆம் திகதிக்கு முன்னர் வழங்குமாறு நீதி அமைச்சர், சட்டத்தரணி ஹர்ஷன நாணயக்கார கோரியுள்ளார்.
இது தொடர்புடைய புதிய சட்டமூலம் மூன்று மொழிகளிலும் வரைவு செய்யப்பட்டு நீதி அமைச்சின் இணையதளத்தில் வெளியிடப்பட்டுள்ளது.
புதிய பயங்கரவாதத் தடுப்புச் சட்டமூலம் தொடர்பாக ஊடகங்களுக்கு விசேட அறிக்கையொன்றை வெளியிட்ட நீதி அமைச்சர் சட்டத்தரணி ஹர்ஷன நாணயக்கார நேற்று (19.12.2025) இந்தக் கருத்துக்களைத் தெரிவித்தார்.
பயங்கரவாத தடைச் சட்டம்
மேலும் அவர், “தற்போதைய அரசாங்கம் ஆட்சிக்கு வருவதற்கு முன்பு, ஏற்கனவே உள்ள பயங்கரவாதச் சட்டத்தை இரத்து செய்து, மனித உரிமைகள் மற்றும் பேச்சு சுதந்திரத்தைப் பாதுகாக்கும் புதிய சட்டமூலத்தை இயற்றுவதாக நாங்கள் உறுதியளித்தோம்.
அதன்படி, பழைய சட்டத்தை இரத்து செய்து பயங்கரவாதம் குறித்த புதிய சட்டத்தை வரைவதற்காக ஜனாதிபதி சட்டத்தரணி ரியன்சி ஹர்சகுலரத்ன தலைமையில் 17 அறிஞர்கள் குழு நியமிக்கப்பட்டது.
அந்தக் குழு பதினொரு மாத காலப்பகுதியில் மூன்று மொழிகளிலும் சட்டமூலத்தை வரைந்து எனக்கு வழங்கியது. இது இப்போது நீதி மற்றும் தேசிய ஒருங்கிணைப்பு அமைச்சகத்தின் அதிகாரப்பூர்வ இணையதளத்தில் வெளியிடப்பட்டுள்ளது.
இது நமது நாட்டிற்கு மிகவும் முக்கியத்துவம் வாய்ந்த மிகவும் நுட்பமான மற்றும் உணர்திறன் மிக்க சட்டமூலம் என்பதால், அமைச்சரவை அல்லது நாடாளுமன்றத்தில் நேரடியாக சமர்ப்பிக்கப்படுவதற்கு முன்பு பொதுமக்களுக்கு அதன் கருத்துக்களைத் தெரிவிக்க வேண்டும் என்று நாங்கள் நம்புகிறோம்.
புதிய வரைவு
அதன்படி, வரைவு ஏற்கனவே இணையதளத்தில் வெளியிடப்பட்டுள்ளது. வரைவு சட்டமூலம் தொடர்பில் பொதுமக்கள் தங்கள் கருத்துக்களை எதிர்வரும் பெப்ரவரி மாதம் 28 ஆம் திகதி வரை தெரிவிக்கலாம்.
வரைவு சட்டமூலத்துக்கு புதிய யோசனைகள் மற்றும் பரிந்துரைகளைச் சமர்ப்பிப்பதற்கான வாய்ப்பு அந்தக் காலகட்டத்தில் திறந்திருக்கும்.
இது தொடர்பாக ஆர்வமுள்ள அனைத்து தரப்பினரும் தங்கள் கருத்துகளையும் பரிந்துரைகளையும் சமர்ப்பிக்குமாறு கேட்டுக்கொள்கிறோம்.
இது தொடர்பாக சமர்ப்பிக்கப்பட்ட யோசனைகள் மற்றும் பரிந்துரைகள் மீது நேர்மறையான நடவடிக்கை எடுக்க நாங்கள் தயாராக உள்ளோம்.
தற்போது, பொது மக்களும் சிவில் சமூக அமைப்புகளும் யோசனைகளையும் பரிந்துரைகளையும் சமர்ப்பித்துள்ளன. எனவே, இந்த வரைவு இறுதி வரைவு அல்ல. புதிய யோசனைகள் மற்றும் பரிந்துரைகள் அதே குழுவால் மறுபரிசீலனை செய்யப்பட்டு ஆக்கப்பூர்வமாக செயல்படும்.
இறுதி வரைவைத் தயாரிப்பதற்காக நேர்மறையான யோசனைகள் மற்றும் பரிந்துரைகளை நீதி அமைச்சின் செயலாளருக்கு அனுப்புமாறு கேட்டுக்கொள்கிறோம்.
நீதி மற்றும் தேசிய ஒருங்கிணைப்பு அமைச்சின் இணையதளமான www.moj.gov.lk இல் வரைவு சட்டமூலத்தின் சிங்களம், தமிழ் மற்றும் ஆங்கில பதிப்புகள் வெளியிடப்பட்டுள்ளன.” என குறிப்பிட்டுள்ளார்.
| செய்திகளை உடனுக்குடன் தெரிந்து கொள்ள IBC தமிழ் WHATSAPP இல் இணைந்து கொள்ளுங்கள்...! |
புலம்பெயர்தலின் வழியாக ஈழப் போராட்டத்திற்குத் துணைநின்ற தமிழர்கள்… 23 மணி நேரம் முன்
அங்கீகரிக்கப்படாத தேசத்தின் அங்கீகரிக்கப்பட்ட இராஜதந்திரி
5 நாட்கள் முன்
யாழ்ப்பாணம், யாழ் அச்சுவேலி தோப்பு, Jaffna, பேர்ண், Switzerland
19 Nov, 2025
அச்சுவேலி, Woodbridge, Canada
18 Dec, 2010
புங்குடுதீவு 3ம் வட்டாரம், யாழ்ப்பாணம், நீர்கொழும்பு, பிரான்ஸ், France
16 Dec, 2016
