வேலைநிறுத்தத்தில் குதித்த பொதுச் சேவைப் பொறியியலாளர்கள்
நாடு முழுவதும் உள்ள பொதுச் சேவைப் பொறியியலாளர்கள் இன்று (13) ஒரு நாள் அடையாள வேலைநிறுத்தத்தில் ஈடுபடவுள்ளதாக அந்த சங்கம் தெரிவித்துள்ளது.
2027ஆம் ஆண்டுக்கான வரவு-செலவுத் திட்டத்தில் தங்கள் கோரிக்கைகள் கவனத்தில் கொள்ளப்படாததைக் கண்டித்து இவ்வாறு வேலை நிறுத்தத்தில் ஈடுபடவுள்ளதாக தெரிவித்துள்ளனர்.
இலங்கை பொறியியல் சேவை அதிகாரிகளுக்கு 2012ஆம் ஆண்டு முதல் வழங்கப்பட்டு வந்த களப்பயணம் மற்றும் போக்குவரத்துப் படி, 2024ஆம் ஆண்டில் குறைக்கப்பட்டது.
வரவு செலவுத் திட்ட முன்மொழிவு
இதனை மீண்டும் பழைய நிலைக்குக் கொண்டுவர வேண்டும் என்ற கோரிக்கையை அரசாங்கம் நிறைவேற்றத் தவறியதாலேயே இந்த வேலைநிறுத்தம் மேற்கொள்ளப்படுவதாக அச்சங்கம் குறிப்பிட்டுள்ளது.
2027ஆம் ஆண்டுக்கான வரவு செலவுத் திட்ட முன்மொழிவுகளின் ஊடாக இந்தப் படியை மீண்டும் வழங்கிச் சரிசெய்வதாக அரசாங்கம் முன்னதாக உறுதியளித்திருந்தது.
எனினும், அடுத்த ஆண்டு பல முக்கிய அபிவிருத்தித் திட்டங்களைச் செயற்படுத்தத் திட்டமிடப்பட்டுள்ள போதிலும், வரவு-செலவுத் திட்டத்தில் பொதுச் சேவைப் பொறியியல் அதிகாரிகள் முற்றிலும் புறக்கணிக்கப்பட்டிருப்பது ஏமாற்றமளிப்பதாக அச்சங்கம் தெரிவித்துள்ளது.
தொடர்ச்சியான தொழிற்சங்க நடவடிக்கை
நேற்று நடைபெற்ற நிறைவேற்றுக் குழு கூட்டத்தில், இன்று சுகவீனம் காரணமாக விடுமுறை எடுப்பதன் மூலம் நாடு தழுவிய அடையாள வேலைநிறுத்தத்தில் ஈடுபட முடிவு செய்துள்ளதாகச் சங்கம் அறிவித்துள்ளது.
இந்த அடையாள வேலைநிறுத்தம் ஒரு ஆரம்பகட்ட நடவடிக்கை மட்டுமே எனவும், அரசாங்கம் தங்களின் கோரிக்கைக்கு விரைவான மற்றும் திருப்திகரமான தீர்வை வழங்கத் தவறினால், எதிர்காலத்தில் இன்னும் தீவிரமான மற்றும் தொடர்ச்சியான தொழிற்சங்க நடவடிக்கைகளை முன்னெடுக்க நேரிடும் என்றும் எச்சரித்துள்ளது.
மேலும், எதிர்காலத்தில் மேற்கொள்ளப்படும் தொழிற்சங்க நடவடிக்கைகளால் அபிவிருத்தித் திட்டங்களுக்கு ஏதேனும் பாதிப்பு ஏற்பட்டால், அதற்கு அரசாங்கமே முழுப் பொறுப்பேற்க வேண்டும் என்றும் அச்சங்கம் கூறியுள்ளமை குறிப்பிடத்தக்கது.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்...! |
இமையானன் கிழக்கு உடுப்பிட்டி, சுவிஸ், Switzerland, London East Ham, United Kingdom
14 Oct, 2026
அல்லைப்பிட்டி, பிரான்ஸ், France
12 Nov, 2011
புங்குடுதீவு, கொழும்பு, Sanaa, Yemen, சென்னை, India, Toronto, Canada, Sacramento, United States
07 Nov, 2026