முல்லைத்தீவில் பெருக்கெடுத்துள்ள ஆறு : அபாயத்தை எதிர்நோக்கியுள்ள கிராமம்
முல்லைத்தீவு (Mullaitivu) மாவட்டத்தில் பெய்துவரும் கன மழை காரணமாக பறங்கி ஆறு பெருக்கெடுத்து பாய்வதனால் கிராமம் ஒன்ற தனிமைப்படும் அபாயத்தை எதிர்நோக்கியுள்ளது.
முல்லைத்தீவு - மாந்தை கிழக்கு பிரதேச செயலகப் பிரிவிற்குட்பட்ட சிறாட்டிகுளம் கிராமத்திற்குச் செல்லும் வீதியை மூடி பறங்கி ஆற்று நீர் பாய்வதனால் சிறாட்டிகுளம் கிராமமே குறித்த அபாயத்திற்குள்ளாகியுள்ளதாக தெரிவிக்கப்படுகின்றது.
அத்துடன் பறங்கிய ஆற்றின் நீர்வரத்து அதிகரிக்குமிடத்து சிறாட்டிகுளம் கிராமத்துக்கான போக்குவரத்து முற்றாகத் தடைப்படும் என எச்சரிக்கப்பட்டுள்ளது.
நாடாளுமன்ற உறுப்பினர் விஜயம்
இந்த நிலையில் குறித்த பகுதிக்கு வன்னி மாவட்ட நாடாளுமன்ற உறுப்பினர் துரைராசா ரவிகரன் (T. Raviharan) நேற்று (23) களவிஜயமொன்றை மேற்கொண்டு அந்த கிராம மக்கள் எதிர்நோக்கும் பிரச்சினைகள் தொடர்பில் கேட்டறிந்தார்.
இவ்வாறு பறங்கியாறு பெருக்கெடுத்துப் பாய்வதனால் சிறாட்டி குளத்திலிருந்து நட்டாங்கண்டல் பாடசாலைக்கு கல்விகற்பதற்காக செல்லும் மாணவர்கள் பலத்த இடர்பாடுகளுக்கு முகங்கொடுக்கவேண்டிய சூழல் ஏற்பட்டுள்ளதாக சுட்டிக்காட்டப்பட்டுள்ளது.
அத்துடன் குருதிமாற்று சிகிச்சை பெற்றுவரும் சிறிநீரக நோயாளர்களும், ஏனைய மருத்துவ சேவைகளைப் பெறச் செல்பவர்களும் பலத்த இன்னல்களுக்கு முகங்கொடுக்கவேண்டிய நிலை ஏற்பட்டுள்ளதாக தெரிவிக்கப்பட்டுள்ளது.
கிராம மக்களின் கோரிக்கை
சிறாட்டிகுளம் கிராம மக்களின் அன்றாட செயற்பாடுகளும் இதனால் மிகமோசமாகப் பாதிக்கப்பட்டுள்ளதாக குறிப்பிட்டுள்ளனர்.
இது தொடர்பில் முல்லைத்தீவு மாவட்ட அனர்த்த முகாமைத்துவ நிலையத்திற்கும், மந்தை கிழக்கு பிரதேச செயலாளருக்கும் நாடாளுமன்ற உறுப்பினர் தெரியப்படுத்தியிருந்தார்.
மேலும் சிறாட்டிகுளம் வீதியை சீரமைப்புச் செய்துதருமாறு கிராம மக்களால் நடாளுமன்ற உறுப்பினரிடம் கோரிக்கை முன்வைக்கப்பட்ட நிலையில் இது தொடர்பில் உரிய நடவடிக்கை மேற்கொள்ள முயற்சிகள் மேற்கொள்ளப்படுமென அவர் தெரிவித்தமை குறிப்பிடத்தக்கது.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்...! |
புங்குடுதீவு 1ம் வட்டாரம், புங்குடுதீவு, India, Lausanne, Switzerland
09 Aug, 2025
