அநுரவின் சதியை முறியடிக்க சஜித்திற்கு பொன்னான வாய்ப்பு : என்கிறார் கம்மன்பில

அரசியலமைப்புச் சபையின் மூன்று சுயாதீன உறுப்பினர்களின் பதவிக்காலம் 2026 ஜனவரி 18 அன்று முடிவடையும் வரை, கணக்காய்வாளர் நாயகத்தை (Auditor General) நியமிப்பதைத் ஜனாதிபதி அனுரகுமார திஸாநாயக்க தவிர்த்து வருவதாக முன்னாள் நாடாளுமன்ற உறுப்பினர் உதய கம்மன்பில குற்றம் சுமத்தியுள்ளார்.

இது தொடர்பில் அவர் வெளியிட்டுள்ள அறிக்கையில் குறிப்பிடப்பட்டுள்ளதாவது:

ஜனாதிபதி அநுரவின் திட்டம்

தனது விருப்பத்திற்குரிய ஒருவரை கணக்காய்வாளர் நாயகமாக நியமிப்பதற்காக, அரசியலமைப்புச் சபையின் ஆதரவைப் பெற்றுக்கொள்ளவே ஜனாதிபதி இவ்வாறு காத்திருக்கிறார் என்பது தெளிவாகத் தெரிகிறது. அரசியலமைப்புச் சபைக்கு தனது ஆதரவாளர்களை சுயாதீன உறுப்பினர்களாக நியமிப்பதன் மூலம், அச்சபையில் பெரும்பான்மையைத் தனது கட்டுப்பாட்டிற்குள் கொண்டுவர ஜனாதிபதி திட்டமிட்டுள்ளதாகவும் கம்மன்பில மேலும் சாடியுள்ளார்.

எவ்வாறாயினும், ஜனாதிபதியின் இந்த “மாபெரும் சதித்திட்டத்தை” தோற்கடிப்பதற்கு எதிர்க்கட்சித் தலைவருக்கு ஒரு பொன்னான வாய்ப்பு இருப்பதாக அவர் சுட்டிக்காட்டியுள்ளார்.

 * அரசியலமைப்பின் 41E உறுப்புரை: இதன்படி, அரசியலமைப்புச் சபையின் உறுப்பினர்களின் பதவிக்காலம் முடிவடைந்தாலும், புதிய உறுப்பினர்கள் பதவியேற்கும் வரை பழைய உறுப்பினர்கள் பதவியில் நீடிக்க முடியும்.

ஜனாதிபதியின் திட்டத்தை சஜித் தோற்கடிக்க முடியும்

* எதிர்க்கட்சித் தலைவர் இதுவரை நடைமுறையில் இருந்த வழமைகளில் இருந்து விலகி, அரசியலமைப்பை முழுமையாகப் பின்பற்றுவதற்குச் சம்மதித்தால் ஜனாதிபதியின் திட்டத்தைத் தோற்கடிக்க முடியும்.

 சுயாதீன உறுப்பினர்களின் நியமனம்

அரசியலமைப்பின் 41A(1)(e)(iii) உறுப்புரையின்படி, மூன்று சுயாதீன நபர்கள் பிரதமர் மற்றும் எதிர்க்கட்சித் தலைவரின் ஒருமித்த உடன்பாட்டின் மூலம் பரிந்துரைக்கப்பட வேண்டும்.

இருப்பினும், இதுவரை பின்பற்றப்பட்டு வந்த நடைமுறையின்படி:

* ஒரு பெயர் இருவராலும் கூட்டாகத் தீர்மானிக்கப்படும்.

* ஏனைய இரண்டு பெயர்களில் ஒன்றை பிரதமரும் மற்றொன்றை எதிர்க்கட்சித் தலைவரும் தனித்தனியாகப் பரிந்துரைப்பார்கள்.

இந்த நடைமுறையை மாற்றி, மூன்று பெயர்களும் இருவராலும் கூட்டாகவே முன்மொழியப்பட வேண்டும் என்பதில் எதிர்க்கட்சித் தலைவர் உறுதியாக இருந்தால், உண்மையான சுயாதீனமான நபர்களை அரசியலமைப்புச் சபைக்கு நியமிக்க முடியும் என கம்மன்பில தெரிவித்துள்ளார்.

எதிர்க்கட்சித் தலைவர் இந்த முன்மொழிவுக்கு உடன்படாவிட்டால், பிரதமர் தனது தேசிய மக்கள் சக்தி (NPP) ஆதரவாளர் ஒருவரை சபைக்கு நியமிப்பார் என்றும், அதன் மூலம் உயர் நீதிமன்ற நீதிபதிகள், கணக்காய்வாளர் நாயகம், சட்டமா அதிபர் மற்றும் சுயாதீன ஆணைக்குழுக்களின் உறுப்பினர்களாகத் தனது விருப்பத்திற்குரியவர்களை நியமித்து, ஒட்டுமொத்த அரச இயந்திரத்தையும் ஜனாதிபதி அரசியலமயமாக்கக்கூடும் என்றும் உதய கம்மன்பில எச்சரித்துள்ளார்.

சர்வதேச யுத்த குற்றவியல் நீதிமன்றில் டக்ளஸ்...! சீறும் கஜேந்திரகுமார் அணி

ஜொன்ஸ்டன் பெர்னாண்டோ தலைமறைவு! காவல்துறை வலைவீச்சு