யாழில் நிலைமை மோசம் - பிரபல பாடசாலை மாணவர்கள் போதைப்பொருளுடன் கைது
மாணவர்கள் மதுபானம் மற்றும் போதைப் பொருளுடன் கைது
யாழ்ப்பாணத்தில் பிரபல பாடசாலை ஒன்றில் பயிலும் மாணவர்கள் நால்வர் மதுபானம் மற்றும் மாவா போதைப் பொருளுடன் கைது செய்யப்பட்டனர் என்று காவல்துறையினர் தெரிவித்தனர்.
“இன்று நண்பகல் யாழ்ப்பாணம் பிறவுண் வீதி ஆலய கேணியடியில் மாணவர்கள் போதைப்பொருள் பயன்பாட்டில் ஈடுபட்டுள்ளனர் என்று காவல்துறை புலனாய்வு பிரிவினருக்கு தகவல் கிடைத்தது. அங்கு சென்ற காவல்துறை புலனாய்வு பிரிவினர் மாணவர் ஒருவர் மாவா போதைப்பொருளை உடமையில் வைத்திருந்த நிலையில் கைது செய்தனர். ஏனைய மூவரும் மதுபானம் அருந்தியவாறு இருந்தனர்.
நண்பரின் பிறந்தநாள் கொண்டாட்டம்
நால்வரை கைது செய்து யாழ்ப்பாணம் மூத்த காவல்துறை அத்தியட்சகரின் முன்னிலையில் முற்படுத்தப்பட்டனர். தனியார் கல்வி நிலையம் ஒன்றிற்கு வருகை தந்ததாகவும் நண்பரின் பிறந்தநாள் கொண்டாட்டத்தில் மதுபானம் அருந்தியதாகவும் மாணவர்கள் விசாரணையில் தெரிவித்தனர்.
அவர்கள் க.பொ.த சாதாரணதரத்தை முடித்து தற்போது உயர்தரத்தில் கல்விபயிலும் 17, 18 வயதுடையவர்கள் என விசாரணையில் கண்டறியப்பட்டது.
பெற்றோர் அழைப்பு
மாணவர்களின் பெற்றோரை அழைத்து மூத்த காவல்துறைஅத்தியட்சகர், பிள்ளைகள் தொடர்பில் கண்காணிப்பு இல்லையா என எச்சரித்தார்.
பாடசாலையில் பயிலும் மாணவர்களை நீதிமன்றில் முற்படுத்தி தண்டனை பெற்றுக்கொடுப்பதனால் ஏற்படும் பாதகநிலை தொடர்பில் எடுத்துரைத்த மூத்த அவர், அவர்களை எச்சரித்து பெற்றோரிடம் ஒப்படைத்தார்.
