நெருக்கடியை உருவாக்கியவர்கள் பெரமுனவின் உறுப்பினர்களே..! அம்பலப்படுத்திய பெரமுனவின் பொதுச்செயலாளர் சாகர காரியவசம்

சிறிலங்கா பொதுஜன பெரமுனவின் ஒருசில உறுப்பினர்கள் பொருளாதார நெருக்கடியை அரசியல் நெருக்கடியாக மாற்றியமைத்தார்கள் என சிறிலங்கா பொதுஜன பெரமுனவின் பொதுச்செயலாளர் சாகர காரியவசம் தெரிவித்தார்.

சிறிலங்கா பொதுஜன பெரமுனவின் காரியாலயத்தில் நேற்று (28) இடம்பெற்ற ஊடகவியலாளர் சந்திப்பில் கருத்துரைக்கும் போதே அவர் இதனை குறிப்பிட்டுள்ளார்.

கொரோனா தொற்றிலிருந்து மக்களை பாத்துக்க முன்னுரிமை வழங்கிய கோட்டாபய

தொடர்ந்து கருத்துரைத்த அவர், " நாட்டு மக்கள் பாரிய எதிர்பார்ப்பிற்கு மத்தியில் முன்னாள் அதிபர் கோட்டபய ராஜபக்ச தலைமையில் மூன்றில் இரண்டு பெரும்பான்மையுடனான அரசாங்கத்தை தோற்றுவித்தார்கள்.

உலகலாளிய ரீதியில் தாக்கத்தை ஏற்படுத்திய கொரோனா தொற்று கடந்த இரண்டு வருடகாலமாக இலங்கைக்கு பாதிப்பை ஏற்படுத்தியது. கொரோனா தாக்கத்திற்கு மத்தியில் பொருளாதாரத்தை பாதுகாப்பதா அல்லது நாட்டு மக்களை பாதுகாப்பதா என்ற இக்கட்டான நிலை தோற்றம் பெற்றது.

கொரோனா தாக்கத்திலிருந்து நாட்டு மக்களை பாதுகாப்பதற்கு முன்னுரிமை வழங்க வேண்டும்,பொருளாதார பாதிப்பை ஒருமித்த வகையில் எதிர்கொள்வோம் என முன்னாள் அதிபர் கோட்டபய ராஜபக்ச அமைச்சரவையில் குறிப்பிட்டு. மக்களை பாதுகாக்கும் நடவடிக்கைகளை துரிதப்படுத்துமாறு பணிப்புரை வழங்கினார்.

அரசியல் நெருக்கடியை உருவாக்கியது பெரமுனவின் சில உறுப்பினர்களே

கொரோனா தாக்கத்தலிருந்து நாட்டு மக்களை பாதுகாக்கும் திட்டம் வெற்றிப் பெற்றது இருப்பினும் பொருளாதார நெருக்கடி தீவிரமடைந்தது.

சிறிலங்கா பொதுஜன பெரமுனவின் ஒருசில உறுப்பினர்கள் பொருளாதார நெருக்கடியை அரசியல் நெருக்கடியாக மாற்றியமைத்தார்கள்.

பொதுஜன பெரமுன் தலைமையிலான அரசாங்கத்தை பலவீனப்படுத்த எதிர்க்கட்சியினர் அவதானம் செலுத்தயதை காட்டிலும் எம்மவர்களே அருகில் இருந்துக்கொண்டு அரசியல் சூழ்ச்சியினால் அரசாங்கத்தை பலவீனப்படுத்தினார்கள் என்பதை நாட்டு மக்கள் தற்போது விளங்கிக்கொண்டுள்ளார்கள்.

ராஜபக்சர்கள் மீண்டும் ஆட்சியதிகாரத்தை வெகுவிரைவில் கைப்பற்றுவார்கள். தேசிய பொருளாதாரத்தை நிச்சயம் மேம்படுத்துவோம். சுபீட்சமான எதிர்கால கொள்கை திட்டத்தை நிறைவேற்றுவதே எமது பிரதான இலக்கு " எனக் குறிப்பிட்டார்.