சிறுமிகள் மீது அத்துமீறல் : இலங்கையில் பிறந்த பௌத்த பிக்குவிற்கு அவுஸ்ரேலியாவில் 13 வருட சிறை

 மெல்போர்னில் உள்ள ஒரு கோவிலில் ஆறு சிறுமிகளைப் பாலியல் அத்துமீறலுக்கு உற்படுத்திய குற்றத்திற்காக, இலங்கையில் பிறந்த பௌத்த பிக்கு ஒருவருக்கு அவுஸ்திரேலியாவில் 13 ஆண்டுகள் மற்றும் இரண்டு மாதங்கள் சிறைத்தண்டனை விதிக்கப்பட்டுள்ளது.

மெல்போர்னின் தென்கிழக்குப் பகுதியில் உள்ள 'தம்ம சரண' (Dhamma Sarana) கோவிலின் தலைமை பிக்குவாகப் பணியாற்றிய 71 வயதான நௌதுன்னே விஜித்த (Naotunne Vijitha) என்பவருக்கு, விக்டோரியா கவுண்டி நீதிமன்றம் இன்று வியாழக்கிழமை (8) இந்தத் தண்டனையை விதித்ததாக தெரிவிக்கப்படுகிறது.

நம்பிக்கை மோசமான துரோகம்

இலங்கை பௌத்த சமூகத்தில் தனக்கு இருந்த மதிப்பிற்குரிய பதவியைத் தவறாகப் பயன்படுத்தி இக்குற்றங்களைச் செய்ததன் மூலம், அவர் நம்பிக்கையை மோசமாகத் துரோகம் செய்துள்ளதாக அந்நாட்டு  நீதிபதி பர்தீப் திவானா (Pardeep Tiwana) குறிப்பிட்டார்.

சிறுவர் மீது பாலியல் ரீதியாக ஊடுருவும் செயலில் ஈடுபட்டது தொடர்பான ஒன்பது குற்றச்சாட்டுகள் மற்றும் சிறுவருடன் கண்ணியமற்ற செயலில் ஈடுபட்டது தொடர்பான எட்டு குற்றச்சாட்டுகள் உட்பட மொத்தம் 17 குற்றச்சாட்டுகளில் பௌத்த பிக்கு குற்றவாளி எனத் தீர்ப்பளிக்கப்பட்டது.

மெல்போர்னின் ஸ்பிரிங்வேல் (Springvale) மற்றும் கீஸ்பரோ (Keysborough) பகுதிகளில் இயங்கி வந்த அந்தக் கோவிலில், 1994 மற்றும் 2002 ஆண்டுகளுக்கு இடைப்பட்ட காலத்தில் இக்குற்றங்கள் நிகழ்ந்தன.

சிறுமிகளைத் தனது இருப்பிடத்திற்குத் தொடர்ந்து வரவழைத்து பாலியல் ரீதியாகத் அத்துமீறலுக்கு உள்ளாக்கியதாகவும் , சில சமயங்களில் அவர்களின் பெற்றோர் அருகிலுள்ள அறைகளில் இருந்தபோதே இச்செயல்களைச் செய்ததாகவும் நீதிமன்றத்தில் தெரிவிக்கப்பட்டது.

பாதிக்கப்பட்ட சிறுமிகள் தங்கள் குடும்பத்தினருடன் மத நடவடிக்கைகளில் பங்கேற்க அந்தக் கோவிலுக்குச் சென்றிருந்தனர்.

தண்டனையை அறிவிக்கும்போது, ​​கோவிலில் தங்கள் குழந்தைகள் பாதுகாப்பாக இருப்பதாக நம்பிய பெற்றோர்கள் அவர் மீது வைத்திருந்த நம்பிக்கையை அந்தப் பிக்கு தவறாகப் பயன்படுத்திக்கொண்டதாக நீதிபதி திவானா கூறினார்.

2023-ல் விஜித்த மீது குற்றச்சாட்டுகள் பதிவு

இக்குற்றங்கள் பாதிக்கப்பட்டவர்களுக்கு நீடித்த உளவியல் பாதிப்பை ஏற்படுத்தியுள்ளதாகவும், அவர்களில் சிலர் பௌத்த மத நடைமுறைகள் தொடர்பான மன உளைச்சலைத் தொடர்ந்து அனுபவித்து வருவதாகவும் நீதிபதி தெரிவித்தார்.

துன்புறுத்தல் சம்பவங்கள் நடந்து பல ஆண்டுகளுக்குப் பிறகே பாதிக்கப்பட்ட பெண்கள் காவல்துறையிடம் புகார் அளித்ததாகவும், அதன் விளைவாக 2023-ல் தேரர் மீது குற்றச்சாட்டுகள் பதிவு செய்யப்பட்டதாகவும் நீதிமன்றத்தில் கூறப்பட்டது.

விசாரணையின் போது அவர் குற்றச்சாட்டுகளை மறுத்தார்; அத்தகைய சம்பவங்கள் எதுவும் நடக்கவில்லை என்று அவரது வழக்கறிஞர்கள் வாதிட்டனர். மேலும், புகார் அளித்தவர்களில் சிலரை அவருக்கு நினைவில் இல்லை என்றும் அவர்கள் கூறினர்.

பிணை (parole) பெறுவதற்குத் தகுதி பெறுவதற்கு முன்பு, விஜித்த குறைந்தது ஒன்பது ஆண்டுகள் மற்றும் நான்கு மாதங்கள் சிறைத்தண்டனையை அனுபவிக்க வேண்டும்

 தீர்ப்புக்குப் பிறகு நீதிமன்றத்தில் இருந்த தனது ஆதரவாளர்களைப் பார்த்து அந்தப் பிக்கு புன்னகைத்து கையை அசைத்தபோது, ​​பாதிக்கப்பட்டவர்களில் பலர் கோபத்தை வெளிப்படுத்தியதாக  செய்தி வெளியிட்டுள்ளது.

தண்டனைக்கு பிறகு நாடு கடத்தப்படுவார்

தேரர்  இலங்கையில் பிறந்தவர் என்றும், தனது 15 வயதில் பௌத்த துறவறத்தில் சேர்ந்தார் என்றும் நீதிமன்றத்தில் தெரிவிக்கப்பட்டது. பின்னர் அவர் சுவீடனுக்கு குடிபெயர்ந்து, அங்கு குடியுரிமை பெற்றார். அதன்பிறகு, 1994-ல் தம்ம சரண கோயிலின் தலைமைத் துறவியாவதற்காக அவுஸ்திரேலியாவுக்குக் குடிபெயர்ந்தார்.

தனது சிறைத் தண்டனையை முடித்த பிறகு தேரர் நாடு கடத்தப்படலாம். அவர் சுவீடனுக்குத் திரும்பத் தயாராக இருப்பதாக நீதிமன்றத்தில் தெரிவிக்கப்பட்டது.

அவர் மறதி நோயால் பாதிக்கப்பட்டுள்ளார் என்பது உட்பட, அவரது உடல்நிலை குறித்து அவரது வழக்கறிஞர்கள் முன்னதாகவே கவலைகளை எழுப்பியிருந்தனர்.