எரிபொருள் நெருக்கடி -சிறைச்சாலைகளையும் பாதித்தது
எரிபொருள் நெருக்கடி
எரிபொருள் நெருக்கடி காரணமாக சிறைச்சாலைகளை நடத்துவதில் சிறைச்சாலை அதிகாரிகள் பல சிக்கல்களை எதிர்கொண்டுள்ளதாக சிறைச்சாலை வட்டாரங்கள் தெரிவிக்கின்றன.
சிறைச்சாலை பேருந்துகளுக்கு எரிபொருள் பெற்றுக்கொடுக்கும் எரிபொருள் நிரப்பு நிலையங்களுக்கு எரிபொருள் இல்லாததாலும், சில சிறைச்சாலை பேருந்துகள் எரிபொருளை பெற்றுக்கொள்ள முடியாமல் சிறைச்சாலை மைதானத்தில் நிறுத்தப்பட்டுள்ளதாலும் இந்த நிலை ஏற்பட்டுள்ளதாக சிறைச்சாலை வட்டாரங்கள் தெரிவிக்கின்றன.
கைதிகளை அழைத்து வருவதில் பாரிய சிக்கல்
இந்நிலைமையால் நீதிமன்றங்களால் விளக்கமறியலில் வைக்கப்பட்டுள்ள கைதிகளை சிறைச்சாலைகளுக்கு அழைத்து வருவதில் சிறைச்சாலை அதிகாரிகள் பல சிக்கல்களை எதிர்நோக்கியதோடு, சிறைச்சாலை நோயாளிகளை மருத்துவ மனைகளுக்கு அழைத்துச் செல்ல முடியாத நிலையும் ஏற்பட்டுள்ளது.
சிறைச்சாலை பேருந்துகளுக்கு எரிபொருள் வழங்குவதற்கு உரிய முறைமை எதுவும் தயாரிக்கப்படவில்லை எனவும் சிறைச்சாலை வட்டாரங்கள் தெரிவிக்கின்றன.
எரிபொருள் நெருக்கடி காரணமாக சிறைச்சாலை அதிகாரிகள், கட்டுப்பாட்டாளர்கள் மற்றும் ஊழியர்கள் கடமைக்கு சமூகமளிப்பதில் பல பிரச்சினைகளை எதிர்நோக்கி வருகின்றனர். சிறை அதிகாரிகள், ஜெயிலர்கள் மற்றும் வார்டன்கள் அத்தியாவசிய சேவைகளாக நியமிக்கப்படவில்லை.
சிறைச்சாலை ஊடகப் பேச்சாளர் சந்தன ஏக்கநாயக்க இது தொடர்பாக தெரிவிக்கையில்,
முன்னுரிமை அளிக்குமாறு கோரிக்கை
“எரிபொருள் நெருக்கடி என்பது அனைவருக்கும் பொதுவான பிரச்சினை. ஆனால் சிறைச்சாலைகளில் எரிபொருளை மட்டுப்படுத்தி பணிகள் நடைபெற்று வருகின்றன. வேலை நடைபெறுகிறது. பிரச்சனைகள் ஏற்பட்டாலும், சிறைப் பணிகள் நிர்வகிக்கப்படுகின்றன.
பெட்ரோல் நிலையங்களில் இருந்து எரிபொருளை பெறுவதற்கு முன்னுரிமை அளிக்குமாறு சிறைச்சாலை அதிகாரிகளுக்கு அறிவித்துள்ளோம். விளக்கமறியலில் வைக்கப்படும் கைதிகளை காவல்துறையினர் சிறைக்கு அழைத்துச் செல்கின்றனர். சிறைகளில் உள்ள கைதிகளை நீதிமன்றத்திற்கு அழைத்துச் செல்லாமல், வீடியோ தொழில்நுட்பத்தின் உதவியுடன் நடவடிக்கைகள் மேற்கொள்ளப்படுகின்றன என்றார்.