வீடொன்றிற்குள் புதையல் வேட்டை...! மூவர் கைது - தொடரும் விசாரணை

Sri Lanka Police Sri Lanka Sri Lanka Police Investigation Law and Order

By Shalini Balachandran Jul 15, 2026 12:12 AM GMT

Shalini Balachandran

in சமூகம்

Report

வீடொன்றிற்குள் புதையல் தோண்டிய குற்றச்சாட்டில் மூவர் கைது செய்யப்பட்டுள்ளனர்.

வீட்டின் உரிமையாளர், மற்றொரு பெண் மற்றும் ஒரு ஆண் ஆகியோரே இவ்வாறு கைது செய்யப்பட்டுள்ளனர்.

குறித்த கைது நடவடிக்கை நேற்று (14-07-2026) முன்னெடுக்கப்பட்டுள்ளதாகத் தம்புத்தேகம காவல்துறையினர் தெரிவித்துள்ளனர்.

புலனாய்வு விசாரணை

சம்பவம் தொடர்பில் மேலும் தெரியவருகையில், தம்புத்தேகம, பிலிபேவ பகுதியில் உள்ள வயல்வெளியின் மத்தியில் அமைந்துள்ள காணி ஒன்றில் உள்ள வீட்டிலேயே இந்த புதையல் தோண்டும் நடவடிக்கை முன்னெடுக்கப்பட்டுள்ளது.

அந்த வீட்டின் சமையலறையினுள் 4.5 x 5.5 அடி அளவிலும் சுமார் 20 அடி ஆழத்திலும் சுரங்கம் போன்ற குழி ஒன்று தோண்டப்பட்டுள்ளது.

வீடொன்றிற்குள் புதையல் வேட்டை...! மூவர் கைது - தொடரும் விசாரணை | Three Arrested For Treasure Hunting

அதிலிருந்து எடுக்கப்பட்ட மண், வீட்டின் அறை ஒன்றிற்குள் இரகசியமாக மறைத்து வைக்கப்பட்டிருந்த நிலையிலேயே காவல்துறையினரின் முதற்கட்ட விசாரணை முன்னெடுக்கப்பட்டுள்ளது.

காவல்துறையின் புலனாய்வு விசாரணைகளின்படி, கைது செய்யப்பட்டுள்ள சந்தேகநபரான பெண்ணும் மற்றைய ஆணும் இந்த புதையல் தோண்டும் பணிக்காகப் பணம் செலவிட்டுள்ளனர்.

முதற்கட்ட விசாரணை

சம்பவத்துடன் தொடர்புடைய சந்தேகநபர்களிடமிருந்து நீர் மோட்டார், நீர் குழாய், கம்பி சுருள், மண்வெட்டி மற்றும் மண் தோண்டுவதற்கும் மண்ணை வெளியேற்றுவதற்கும் பயன்படுத்தப்படும் பல உபகரணங்கள் காவல்துறையினரால் கைப்பற்றப்பட்டுள்ளன.

இந்த புதையல் தோண்டும் பணிக்கான ஆலோசனைகளை வழங்கி அதனை வழிநடத்தியதாகக் கூறப்படும் முக்கிய சந்தேகநபர் கல்கமுவ, எஹெட்டுவெவ காவல் அதிகாரப் பிரிவில் வசிக்கும் ஒருவர் என அடையாளம் காணப்பட்டுள்ளதுடன், அவரையும் கைது செய்வதற்கான நடவடிக்கைகள் எடுக்கப்பட்டு வருவதாகக் காவல்துறையினர் தெரிவித்துள்ளனர்.