ட்ரம்ப்பை கொலை செய்ய திட்டம்:பாகிஸ்தானைச் சேர்ந்தவருக்கு 27 ஆண்டுகள் சிறை
அமெரிக்க ஜனாதிபதி டொனால்ட் ட்ரம்ப்பை கொலை செய்ய திட்டம் தீட்டிய குற்றத்துக்காக பாகிஸ்தானைச் சேர்ந்த ஒருவருக்கு 27 ஆண்டுகளுக்கும் மேலான சிறைத் தண்டனை விதிக்கப்பட்டுள்ளதாக வெளிநாட்டு ஊடகங்கள் செய்தி வெளியிட்டுள்ளன.
ஈரானின் இஸ்லாமியப் புரட்சிகர காவல் படைத் தளபதி காசிம் சுலைமானியை அமெரிக்கா கொன்றதற்குப் பழிவாங்கும் விதமாகவே இக் கொலை திட்டம் தீட்டப்பட்டுள்ளதாகவும் குறித்த நபருக்கு சிறைத் தண்டனை விதிக்கப்பட்டுள்ளதாகவும் நீதித்துறை நேற்று (17) தெரிவித்துள்ளது.
ஈரானுடன் தொடர்பு இருப்பதாகக் கூறப்படும் ஆசிஃப் மெர்ச்சன்ட், அமெரிக்காவில் உள்ள ஒரு அரசியல்வாதியையோ அல்லது அரசாங்க அதிகாரியையோ கொலை செய்வதற்காக ஒரு கூலிப்படையை அமர்த்த முயன்றதாக புரூக்ளின் நீதிமன்றம் கண்டறிந்தது.
பழிவாங்கும் முயற்சி
ஈரானின் வெளிநாட்டு இராணுவ நடவடிக்கைகளின் தலைவரான சுலைமானி, ஜனவரி 2020இல் பாக்தாத்தில் நடந்த அமெரிக்க ஆளில்லா விமானத் தாக்குதலில் கொல்லப்பட்டார். அவரது கொலைக்குப் பழிவாங்குவதாக ஈரானிய அதிகாரிகள் பலமுறை சூளுரைத்துள்ளனர்.

ஈரானியத் தலைநகர் தெஹ்ரானில் உள்ள தனது குடும்பத்தைப் புரட்சிகரப் பாதுகாப்புப் படையினரிடமிருந்து பாதுகாக்க, இந்தச் சதித்திட்டத்தில் ஈடுபடத் தான் நிர்பந்திக்கப்பட்டதாக மெர்ச்சன்ட் சாட்சியமளித்ததாகவும், யாரும் கொல்லப்படுவதற்கு முன்பு தான் பிடிபட்டுவிடுவேன் என்று நினைத்ததாகவும் பல ஊடகங்கள் செய்தி வெளியிட்டுள்ளன.
| செய்திகளை உடனுக்குடன் தெரிந்து கொள்ள IBC தமிழ் WHATSAPP இல் இணைந்து கொள்ளுங்கள்...! |