ஈஸ்டர் தாக்குதல் : மறு விசாரணை நடத்த அமெரிக்கா மறுப்பு : காலம் கடந்து வெளிவரும் தகவல்
2019 ஏப்ரல் 21 அன்று இலங்கையில் நடத்தப்பட்ட ஈஸ்டர் ஞாயிறு தொடர் குண்டுவெடிப்புகள் குறித்து புதிய அல்லது மேலதிக சுதந்திரமான விசாரணையை நடத்த அமெரிக்க அரசாங்கம் மறுத்துவிட்டது.
அமெரிக்க வெளியுறவுத் துறையின் பயங்கரவாத எதிர்ப்புக்கான பதில் முதன்மை பிரதி ஒருங்கிணைப்பாளர் கிறிஸ்டோபர் ஏ. லேண்ட்பெர்க், அமெரிக்காவிற்கான இலங்கைத் தூதர் மஹிந்த சமரசிங்கவிற்கு அனுப்பிய ஒரு உத்தியோகபூர்வ மின்னஞ்சலில், ஈஸ்டர் ஞாயிறு தொடர் பயங்கரவாதத் தாக்குதல்கள் குறித்து மேலதிக விசாரணை நடத்த வேண்டும் என்ற இலங்கை அரசாங்கத்தின் கோரிக்கையை அமெரிக்க அரசாங்கம் நிராகரிப்பதாகத் தெரிவித்துள்ளார்.
மற்றொரு விசாரணையை
தாக்குதல்கள் நடந்த தருணத்திலிருந்து அது தொடர்பான விசாரணை மற்றும் சட்ட நடவடிக்கைகளுக்கு அமெரிக்கா அதிகபட்ச ஆதரவை வழங்கியுள்ளதால், மற்றொரு மேலதிக விசாரணையை நடத்த வேண்டிய அவசியமில்லை என்று அமெரிக்க அரசாங்கம் சுட்டிக்காட்டுகிறது.
அமெரிக்க வெளியுறவுத் துறை, தனது கடிதத்தில், தாக்குதல்களைத் தொடர்ந்து இலங்கைக்கு வழங்கப்பட்ட விசாரணை ஒத்துழைப்பு குறித்த விரிவான விவரத்தை வழங்கியுள்ளது.
தாக்குதல்கள் நடந்த ஒரு வாரத்திற்குள், 33 அமெரிக்க கூட்டாட்சி புலனாய்வுப் பணியக (FBI) அதிகாரிகள் கொண்ட குழு ஒன்று கொழும்புக்கு வந்தடைந்தது. அவர்கள், இலங்கை குற்றப் புலனாய்வுத் திணைக்களத்துடன் (CID) இணைந்து, சான்றுகளைச் சேகரித்தல், பாதிக்கப்பட்டவர்கள் மற்றும் சாட்சிகளிடமிருந்து வாக்குமூலங்களைப் பதிவு செய்தல், மற்றும் சாதனங்களைப் பகுப்பாய்வு செய்தல் போன்ற பணிகளில் ஈடுபட்டனர்.
தாக்குதல்களைத் தொடர்ந்த மாதங்களில், அமெரிக்கத் தூதரும் FBI சட்டத் தூதரும், அப்போதைய ஜனாதிபதி, பிரதமர் மற்றும் பாதுகாப்பு அமைச்சருக்கு விசாரணையின் முன்னேற்றம் குறித்துத் தொடர்ந்து விளக்கமளித்து வந்தனர்.
மூன்று சந்தேக நபர்கள் மீது குற்றச்சாட்டு
இந்தக் கூட்டு விசாரணைகளின் விளைவாக, தாக்குதல்களில் ஐந்து அமெரிக்கக் குடிமக்கள் உட்பட 269 பேர் உயிரிழக்கக் காரணமான மூன்று சந்தேக நபர்கள் மீது, அமெரிக்க நீதித் திணைக்களம் 2021 ஜனவரியில் குற்றவியல் குற்றச்சாட்டுகளைப் பதிவு செய்தது.
தாக்குதல்கள் தொடர்பான விசாரணைகளுக்கு மேலதிகமாக, அமெரிக்க நீதித் திணைக்களமும் பயங்கரவாதத் தடுப்புப் பணியகமும், பயங்கரவாத வழக்குகளை விசாரிக்கும் இலங்கை அரசாங்க வழக்கறிஞர்களுக்குத் தொடர்ச்சியான பயிற்சியையும் வழிகாட்டுதலையும் வழங்கி வருகின்றன. மேலும், பல ஆண்டுகளாக சர்வதேச போதைப்பொருள் மற்றும் சட்ட அமலாக்க முகமை (INL) மூலம் நீதித்துறை மற்றும் வழக்குரைஞர் சார்ந்த உதவிகளையும் வழங்கி வருகின்றன.
அமெரிக்க வெளியுறவுத் துறை
பயங்கரவாத எதிர்ப்பு ஒத்துழைப்பை விரிவுபடுத்துவதற்கான ஒரு முன்மொழிவு 2022 பெப்ரவரி 8 அன்று இலங்கைத் தரப்பிடம் சமர்ப்பிக்கப்பட்டதாக அமெரிக்க வெளியுறவுத் துறை மேலும் குறிப்பிடுகிறது.
இலங்கை சட்டமா அதிபரால் கோரப்படும் எந்தவொரு மேலதிக உதவி கோரிக்கைகளையும் பரிசீலிக்கத் தயாராக இருப்பதாகவும் அக்கடிதம் கூறுகிறது.
ஈஸ்டர் தாக்குதல்களை நடத்திய குற்றவாளிகளை நீதியின் முன் நிறுத்துவதற்கும், பயங்கரவாத எதிர்ப்பு ஒத்துழைப்பை வலுப்படுத்துவதற்கும் தனது தொடர்ச்சியான உறுதிப்பாட்டை அமெரிக்கா வலியுறுத்தியுள்ளது.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்...! |
பருத்தித்துறை, London, United Kingdom
19 Oct, 2025
பர்மா, Burma, யாழ்ப்பாணம், கொழும்பு, Minnesota, United States, நியூ யோர்க், United States
05 Nov, 2025
