உலக வங்கியிடமிருந்து கிடைக்கும் நிதி! வெளிவிவகார அமைச்சருக்கு கிடைத்த வெற்றி
அடுத்த மாதங்களில் சுமார் 700 மில்லியன் அமெரிக்க டொலர்களை உலக வங்கி இலங்கைக்கு வழங்கும் என கொழும்பில் உள்ள உலக வங்கியின் இலங்கைக்கான முகாமையாளர் சியோ காந்தா உறுதியளித்துள்ளார்.
சர்வதேச நாணய நிதியம், ஏனைய சர்வதேச நிறுவனங்கள் மற்றும் நன்கொடை நாடுகள் நீண்ட கால உதவிகளை வழங்கும் வரை உலக வங்கியின் உதவியை வெளிவிவகார அமைச்சர் பீரிஸ் கோரியமைக்கு அமைய அவர் இதனை தெரிவித்துள்ளார்.
வெளிவிவகார அமைச்சருடன் இடம்பெற்ற சந்திப்பு
கொழும்பில் உள்ள உலக வங்கியின் நாட்டு முகாமையாளர் சியோ காந்தா, வெளிவிவகார அமைச்சர் பேராசிரியர் ஜி.எல். பீரிஸை கடந்த 9 ஆம் திகதி வெளிவிவகார அமைச்சில் சந்தித்தார்.
இச் சந்திப்பின் போதே குறுகிய கால நிதி உதவியை வழங்குமாறு வெளிவிவகார அமைச்சர் கோரிக்கை விடுத்திருந்தார்.
மேலும், வரவுசெலவுத் திட்டத்தில் வரவு செலவுத் திட்டப் பற்றாக்குறை குறைவடையவுள்ள பிரச்சினைகளின் தீவிரத்தன்மையை அமைச்சர் இதன்போது வலியுறுத்தினார்.
நீண்ட கால தீர்வுகள் அமையும் வரை உலக வங்கியின் குறுகிய கால நிதி உதவி பெரிதும் வரவேற்கப்படும் என அமைச்சர் மேலும் தெரிவித்தார்.
