வெளியான பரீட்சை பெறுபேறுகள் : பெற்றோர்களுக்கு விடுக்கப்பட்டுள்ள கோரிக்கை
நடைபெற்று முடிந்த க.பொ.த சாதாரண தர பரீட்சையில் தங்கள் பிள்ளைகள் சிறந்த பெறுபேறுகளைப் பெற்றுள்ளனர் என்பதை சமூக வலைத்தளங்களில் அளவுக்கு அதிகமாகப் பகிர்வதைப் பெற்றோர் தவிர்க்க வேண்டும் என சிறுவர் மற்றும் இளைஞர் உளநல நிபுணர் மியுர சந்திரதாச தெரிவித்துள்ளார்.
சாதாரண தர பரீட்சை பெறுபேறுகள் வெளியாகியுள்ள சூழலில், மாணவர்களின் மனநிலை மற்றும் எதிர்காலக் கல்வி நடவடிக்கைகள் குறித்து அவதானம் செலுத்த வேண்டும் என அவர் மேலும் சுட்டிக்காட்டியுள்ளார்.
அதன்படி, அனைத்து மாணவர்களினதும் உளநலனைப் பாதுகாக்கும் நோக்கில் உளநல நிபுணர் சில முக்கிய ஆலோசனைகளையும் முன்வைத்துள்ளார்.
சமூக வலைத்தளங்களில் பகிர்தல்
அந்தவகையில், தங்கள் பிள்ளைகள் பரீட்சையில் சிறந்த பெறுபேறுகளைப் பெற்றுள்ளனர் என்பதற்காக, அதனைச் சமூக வலைத்தளங்களில் அளவுக்கு அதிகமாகப் பகிர்வதைப் பெற்றோர் தவிர்க்க வேண்டும்.
இத்தகைய பதிவுகள், எதிர்பார்த்த முடிவுகளைப் பெற முடியாமல் ஏமாற்றமடைந்துள்ள மற்ற மாணவர்களுக்கு மேலும் மன உளைச்சலையும் துக்கத்தையும் ஏற்படுத்தக்கூடும்.
அத்துடன், பிள்ளைகள் நல்ல பெறுபேறுகளை பெற்றிருந்தால், அவர்களைப் பாராட்டி, அவர்களின் எதிர்கால நோக்கங்களுக்குத் தேவையான முறையான வழிகாட்டல்களை பெற்றோர் வழங்க வேண்டும்.
பரீட்சை முடிவுகள்
இந்த பரீட்சையில் எதிர்பார்த்த பலன் கிடைக்கவில்லை அல்லது தேர்ச்சி பெறவில்லை என்பதற்காக மாணவர்கள் எவ்விதத்திலும் மனச்சோர்வடையக் கூடாது உலகில் ஒவ்வொருவருக்கும் பொருத்தமான தளம் அல்லது துறை நிச்சயம் இருக்கிறது.
பரீட்சையில் பின்னடைவைச் சந்தித்த மாணவர்கள், இது குறித்து நன்கு அறிந்த நிபுணர்கள் அல்லது பெரியவர்களிடம் ஆலோசனைகளைக் கேட்டு, தங்களுக்குப் பொருத்தமான அடுத்தகட்ட கல்வி அல்லது தொழிற்துறை சார்ந்த பாதைகளைத் தேர்ந்தெடுத்து முன்னோக்கி நகர வேண்டும்.
இலங்கையின் சாதாரண தரப் பரீட்சை முடிவுகளின் பின்னணியில், பரீட்சை முடிவுகள் எவ்வாறாக அமைந்திருந்தாலும் பிள்ளைகளின் மனநிலையைப் புரிந்துகொண்டு பெற்றோர்கள் அவர்களுக்குப் பக்கபலமாக இருக்கவேண்டும்.“ என குறிப்பிட்டார்.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்...! |
