கைகலப்பில் ஈடுபட்ட குற்றச்சாட்டு : யாழ். பல்கலை மாணவர்கள் 21 பேருக்கு விளக்கமறியல்!
சக மாணவர்கள் மீது தாக்குதல் நடத்திய குற்றச்சாட்டில் யாழ். பல்கலைக்கழக மாணவர்கள் 21 பேர் விளக்கமறியலில் வைக்கப்பட்டுள்ளனர்.
யாழ்ப்பாணம் நீதவான் நீதிமன்றம் நேற்று (20) இந்த உத்தரவைப் பிறப்பித்துள்ளது.
சம்பவம் தொடர்பில் மேலும் தெரியவருவதாவது, யாழ்ப்பாணப் பல்கலைக்கழகத்தின் முகாமைத்துவ பீட மாணவர்கள் ஐவர் மீது நேற்றுமுன்தினம் (19) இரவு பல மாணவர்கள் இணைந்து மூர்க்கத்தனமாகத் தாக்குதல் நடத்தியதுடன் வெட்டுக் காயங்களையும் ஏற்படுத்தியுள்ளனர்.
யாழ். போதனா வைத்தியசாலை
இதையடுத்து காயமடைந்த ஐந்து மாணவர்களும் யாழ். போதனா வைத்தியசாலையில் நேற்றுமுன்தினம் இரவு சிகிச்சைக்காகச் சேர்க்கப்பட்டுள்ளனர்.

இந்தச் சம்பவம் தொடர்பில் கோப்பாய் காவல்துறையினருக்குத் தகவல் வழங்கப்பட்டதைத் தொடர்ந்து, தாக்கி காயப்படுத்திய குற்றச்சாட்டில் ஒருவரையும் பொது இடத்தில் கைகலப்பில் ஈடுபட்ட குற்றச்சாட்டில் 20 பேர் உட்பட 21 மாணவர்களை கைது செய்து காவல்துறையினர் நீதிமன்றத்தில் முற்படுத்தினர்.
வழக்கை ஆராய்ந்த நீதிபதி என்.ஹூசைன் சந்தேகநபர்களான மாணவர்கள் 21 பேரையும் எதிர்வரும் 26ஆம் திகதிவரை விளக்கமறியலில் வைக்குமாறு உத்தரவிட்டமை குறிப்பிடத்தக்கது.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்...! |