திருகோணமலையை பௌத்த மாவட்டமாக மாற்ற துரித நடவடிக்கை : அரச அதிகாரிகளும் துணையாம்
தமிழர் தாயகமான திருகோணமலையை பௌத்த மாவட்டமாக மாற்றுகின்ற நீண்டகாலத் திட்டம் மேற்கொள்ளப்படுவதாக தமிழ் தேசியக் கூட்டமைப்பின் நாடாளுமன்ற உறுப்பினர் எம்.ஏ.சுமந்திரன் குற்றஞ்சாட்டியுள்ளார்.
திருகோணமலை மாவட்ட இலங்கை தமிழரசுக் கட்சியின் பணிமனையில் மாவட்ட கிளைத் தலைவர் எஸ்.குகதாஸன் தலைமையில் இடம்பெற்ற பல்வேறுபட்ட சந்திப்புக்களின் பின்னர் ஊடகங்களுக்கு கருத்து தெரிவிக்கும் போது இவ்வாறு கூறிய அவர், சிறிலங்கா பாதுகாப்பு தரப்பினரின் ஒத்துழைப்புடன் தற்போது துரித கதியில் இந்த நடவடிக்கை மேற்கொள்ளப்படுவதாக அவர் குற்றஞ்சாட்டியுள்ளார்.
சிங்கள - பௌத்த மாவட்டமாக
இதன்போது மேலும் கருத்து வெளியிட்ட அவர், குச்சவெளி பிரதேச செயலக பிரிவிலே 30க்கு மேற்பட்ட புத்த சிலைகளையும், பௌத்த வணக்கஸ்தலங்களையும் உருவாக்குவதற்கான நடவடிக்கை இடம்பெற்று வருகிறது.
இதில் 23 இடங்களில் கட்டட வேலைகள் ஏற்கனவே ஆரம்பிக்கப்பட்டிருக்கின்றன.
பௌத்த சமயத்தவர்கள் எவரும் வாழாத, ஒருவர் கூட இல்லாத பிரதேசங்களில் இவ்வாறான நடவடிக்கைகள் இடம்பெறுகின்றன.
இதனை தடுப்பதற்கான உத்தரவுகள் ஆளுநர் மட்டத்தில் கொடுக்கப்பட்டிருந்தாலும், அதையும் பொருட்படுத்தாமல் பாதுகாப்பு படையினர் நேரடியாகவே இந்தக் கட்டிட வேலைகளில் ஈடுபடுகின்றார்கள்.
எந்தவிதமான சட்டபூர்வமான அதிகாரமும் இல்லாமல் - அனுமதியும் பெறாமல் எல்லாம் நடந்தேறிக் கொண்டிருக்கின்றன.
இதற்கு முக்கியமான காரணம் இந்த மாவட்டத்தை ஒரு சிங்கள பௌத்த மாவட்டமாக காண்பிப்பதற்கான பிரயத்தனம் எடுக்கப்பட்டிருக்கிறது.
ஆகவே இது சம்பந்தமாக ஒவ்வொரு கிராமத்தில் இருந்தும் மக்கள் எங்களுக்கு பல காலமாக முறைப்பாடுகளை செய்திருக்கிறார்கள். சில இடங்களில் நாங்கள் சட்ட நடவடிக்கைகளை எடுத்திருக்கிறோம். ஆனால் இதில் சட்டரீதியாக கையாள முடியாத சில விடயங்களும் இருக்கின்றன.
சமூகங்களுக்கு இடையிலே முறுகலை தோற்றுவிப்பதற்கான சந்தர்ப்பங்கள் வேண்டும் என்றே உருவாக்கப்படுவதனை காணக் கூடியதாக இருக்கிறது. இவை எல்லாம் உடனடியாக நிறுத்தப்பட வேண்டும். இதற்கான அரசியல் ரீதியான அழுத்தங்களை நாங்கள் தொடர்ந்தும் கொடுப்போம்.
அரச அதிகாரிகளின் அனுசரனை
இதிலே பிரதானமான குறைபாடு என்னவென்றால், அரச நிறுவனங்கள், அரச அதிகாரிகளின் அனுசரனையோடு நில அபகரிப்புகள் தொடர்ச்சியாக இடம்பெற்றுக்கொண்டிருக்கின்றன.
இது பல்வேறு பிரதேசங்களில் நடைபெறுகிறது. புதிதாக அண்மைக் காலத்தில் மூதூர் கங்குவெளி குளத்தை ஆக்கிரமித்து அந்தக் குளத்தினுள் வேற்று இனத்தவர்கள் விவசாயம் செய்கிறார்கள்.
இது சம்பந்தமாக பலதரப்பட்ட முறைப்பாடுகள் எழுத்திலே கொடுக்கப்பட்டிருக்கின்றன. ஆனால் எந்த விதமான நடவடிக்கைகளும் எடுக்கப்படவில்லை.
அதிகாரிகளிடம் முறையிடுமாறு காவல்துறையினர் கூறுகின்றார்கள். ஆனாலும் எவ்விதமான நடவடிக்கைகளும் எடுக்கப்படவில்லை.
அரச அதிகாரிகளின் அனுசரணையுடன் தான் திருகோணமலையில் நில ஆக்கிரமிப்பு இடம்பெற்று வருகிறது” என்றார்.
கேகாலை, யாழ்ப்பாணம், Herning, Denmark, Toronto, Canada
19 Sep, 2023
யாழ்ப்பாணம், மானிப்பாய், தொல்புரம், London, United Kingdom
12 Sep, 2024
