மலையக தமிழ்மக்களை சந்தித்த அமெரிக்க உயரதிகாரி

அமெரிக்க சென்ட் சபையின் உறுப்பினர் கிறிஸ் வான் ஹொலன், இலங்கை பொருளாதாரத்தின் முதுகெலும்பாக திகழும் மலையக தமிழ் மக்களை சந்தித்து கலந்துரையாடியுள்ளார்.

இதன்போது அவர்கள் எதிர்நோக்கும் சவால்கள் மற்றும் வரலாற்றுப் பின்னணிகள் குறித்து கேட்டறிந்துகொண்டதாக அமெரிக்க தூதுவர் ஜுலி சங் கூறியுள்ளார்.

இலங்கைக்கு விஜயம் செய்துள்ள அமெரிக்க செனட் சபையின் உறுப்பினர் கிறிஸ் வான் ஹொலன், இலங்கையின் பல்வேறு பகுதிகளுக்கு விஜயம் மேற்கொண்டு சந்திப்புக்களை மேற்கொண்டுவருகின்றார்.

அந்த வகையில் கண்டிக்கு விஜயம் செய்திருந்த செனட் சபை உறுப்பினர், அங்குள்ள அதிபரின் இல்லத்தில் ரணில் விக்ரமசிங்கவை சந்தித்துள்ளார். அனைவருக்கும் செழிப்பான நாட்டை நோக்கிய பயணத்தில் அமெரிக்கா இலங்கையுடன் இணைந்து தொடர்ந்து பணியாற்றுகிறது என இந்த சந்திப்பு தொடர்பாக எக்ஸ் பக்கத்தில் பதிவிட்டுள்ள ஜுலி சங் கூறியுள்ளார்.

அனைவரையும் உள்ளடக்கிய நிர்வாகத்தை ஊக்குவிப்பது மற்றும் மனித உரிமைகளை பாதுகாப்பதற்கான கூட்டாண்மைக்கான வாய்ப்புகள் மற்றும் சவால்கள் குறித்தும் விவாதித்ததாக அவர் குறிப்பிட்டுள்ளார்.

முதுகெலும்பாக உள்ள மலையக தமிழ் மக்களை

இந்த நிலையில் நாட்டின் பொருளாதாரத்திற்கு முதுகெலும்பாக உள்ள மலையக தமிழ் மக்களை கிறிஸ் வான் ஹொலன் சந்தித்துள்ளார். இந்த சந்திப்பு தொடர்பாக எக்ஸ் பக்கத்தில் பதிவிட்டுள்ள அமெரிக்க தூதுவர் ஜுலி சங்,

இலங்கையுடனான கடந்த 75 ஆண்டுகால இருதரப்பு உறவுகளில் மலையக தமிழர்களின் வாழ்க்கைத் தரத்தை மேம்படுத்த அமெரிக்கா ஆதரவளித்துள்ளது என கூறியுள்ளார்.

கண்டியிலுள்ள கலாசார பாரம்பரியமிக்க தலாதா மாளிகைக்கு சென்றிருந்த அமெரிக்க செனட் சபை உறுப்பினர் உள்ளிட்ட குழுவினர், எசல பெரஹராவையும் கண்டுகளித்துள்ளனர்.

சுற்றுலாவை மேம்படுத்தும் திட்டத்தையும்

செழிப்பான ஒரு நாடாக இலங்கையின் பாரம்பரியமானது மறக்கமுடியாத அனுபத்தை தந்ததாகவும் அமெரிக்க தூதுவர் தனது எக்ஸ் பக்கத்தில் பதிவிட்டுள்ளார்.

இன்று மலையகப் பகுதிகளுக்கு விஜயம் செய்திருந்த அமெரிக்க செனட் சபை உறுப்பினர் உள்ளிட்ட குழுவினர், சுற்றுலாவை மேம்படுத்தும் திட்டத்தையும் பார்வையிட்டுள்ளனர்.

மக்களின் வாழ்வாதாரத்திற்கு ஆதரவளிக்க

இந்த சுற்றுலா மேம்பாட்டு திட்டத்திற்கு சர்வதேச அபிவிருத்திக்கான அமெரிக்க முகவர் நிறுவனம் மற்றும் ஐரோப்பிய ஒன்றியம் ஆகியன நிதி உதவிகளை வழங்கிவருகின்றன.

குறித்த பகுதியில் வாழும் உள்ளூர் மக்களின் வாழ்வாதாரத்திற்கு ஆதரவளிக்கும் வகையிலும் சுற்றுலாவை ஊக்குவிக்கும் நோக்குடனும் இந்த மேம்பாட்டு திட்டம் முன்னெடுக்கப்பட்டுவருகின்றது.

இந்து ஆலயமொன்றுக்கும்

இந்த விஜயத்தின் போது இந்து ஆலயமொன்றுக்கும் பயணம் செய்த அமெரிக்க பிரதிநிதிகள் குழுவினர், மலையக தமிழ் சமூகத்தின் பண்டைய நம்பிக்கைகள் மற்றும் மரபுகளையும் பார்வையிட்டுள்ளனர்.