தலையிட்டால் விளைவுகள் மோசமாகும்! ரஷ்யாவை கடும் தொனியில் எச்சரித்த அமெரிக்கா

ரஷ்ய அதிபர் விளாடிமின் புடினை (Vladimir Putin) அமெரிக்க அதிபர் ஜோ பைடன் (Joe Biden) கடுமையாக எச்சரித்துள்ளதாக சர்வதேச ஊடகங்கள் செய்தி வெளியிட்டுள்ளன.

அமெரிக்கா மற்றும் ரஷ்யாவுக்கு இடையே அண்மைக் காலங்களாக மோதல் வலுப்பெற்று வருகின்றது. கடந்த ஆண்டு ஜூன் மாதம் அமெரிக்க அதிபர் ஜோ பைடன் மற்றும் ரஷ்ய அதிபர் புடின் ஆகிய இருவரும் சுவிட்சர்லாந்து தலைநகர் ஜெனிவாவில் முதன் முறையாக நேரில் சந்தித்து பேசினார்.

இருந்தபோதிலும் இந்தச் சந்திப்பு இருதரப்பு உறவில் பெரிய அளவில் தாக்கத்தை ஏற்படுத்தவில்லை. இதனால் இரு நாடுகள் இடையிலான மோதல் போக்கு தொடர்ந்து வருகிறது.

இதற்கு தீர்வு காணும் வகையில் இருநாட்டுத் தலைவர்களும் இன்னும் சில நாட்களில் மீண்டும் ஜெனிவாவில் நேரில் சந்தித்து பேச உள்ளனர். இந்த நேரடி சந்திப்புக்கு முன்பாக ரஷ்ய அதிபர் புடினும் அமெரிக்க அதிபர் ஜோ பைடனும் நேற்று முன்தினம் தொலைபேசி வாயிலாக பேச்சுவார்த்தை நடத்தினர்.

இந்தப் பேச்சுவார்த்தை சுமார் 50 நிமிடங்கள் நீடித்தது. உக்ரைனை ஆக்கிரமிக்கும் விதமாக எல்லையில் ரஷ்யா படைகளை குவித்து வரும் விவகாரத்தில் அமெரிக்கா மற்றும் ரஷ்யா இடையே அதிகரித்து வரும் பதற்றத்துக்கு மத்தியில் இருநாட்டு தலைவர்கள் இடையே இந்த தொலைபேசி உரையாடல் நடைபெற்றுள்ளது.

இந்தப் பேச்சுவார்த்தை மிகவும் வெளிப்படையாக அமைந்ததாகவும், உக்ரைன் விவகாரத்தில் புடினுக்‌கு ஜோ பைடன் நேரடியாக எச்சரிகை விடுத்ததாகவும் வெள்ளை மாளிகை தெரிவித்துள்ளது.

வெள்ளை மாளிகையின் செய்தி தொடர்பாளர் ஜென் சாகி இது தொடர்பில் கருத்து வெளியிடுகையில், 

உக்ரைனுடனான பதற்றத்தை தணிக்க புடினை, ஜோ பைடன் அறிவுறுத்தினார். மேலும் ரஷ்யா உக்ரைனை மேலும் ஆக்கிரமித்தால் அமெரிக்காவும், அதன் நட்பு நாடுகளும் தீர்க்கமாக பதிலளிப்பார்கள் என்பதையும் அவர் தெளிவுபடுத்தினார்.

அதோடு, உக்ரைனுக்கு எதிராக மேலும் இராணுவ நடவடிக்கைகளை மேற்கொண்டால் ரஷ்யா மீது அமெரிக்கா புதிய பொருளாதார தடைகளை விதிக்கும் என கூறி புடினை ஜோ பைடன் நேரடியாக எச்சரித்துள்ளதாக அவர் மேலும் தெரிவித்துள்ளார்.

இவ்வாறு ஜென் சாகி (Jen Saki) கூறினார்.

இதனிடையே ஜோ பைடனின் எச்சரிக்கைக்கு புடின் காட்டமாக பதிலளித்ததாக புடினின் வெளியுறவு ஆலோசகர் யூரி உஷாகோவ் (Yuri Ushakov) தெரிவித்துள்ளார்.

பொருளாதார தடைகள் விதிக்கும் அமெரிக்காவின் முடிவு தவறானது என்று குறிப்பிட்ட புதின், இத்தகைய நடவடிக்கை இருநாடுகளுக்கு இடையிலான உறவை முற்றிலும் முறியடிக்க வழிவகை செய்யும் என எச்சரித்தார்.

அதோடு உக்ரைன் ஒருபோதும் நேட்டோவில் சேர அனுமதிக்கப்பட மாட்டாது என்ற எழுத்துப்பூர்வ உறுதிப்பாட்டை புதின் மீண்டும் வலியுறுத்தினார் என்றும் அவர் மேலும் தெரிவித்துள்ளார்.