கோரிக்கைகள் புறக்கணிப்பு - ஹம்பாந்தோட்டையை நோக்கி வேகமாக நகரும் சீன கப்பல்

Sri Lanka China India China Ship In Sri Lanka

By Sumithiran Aug 09, 2022 06:35 PM GMT

Sumithiran

in அரசியல்

Report

இலங்கை நோக்கி வேகமாக நகரும் சீன கப்பல்

இந்தியாவின் ஆட்சேபனையையும், இலங்கையின் கோரிக்கையையும் புறக்கணித்து சீனாவின் ஆய்வுக் கப்பலான 'யுவான் வான் 05' இலங்கையை நோக்கி வேகமாக நகர்வதாக இந்திய ஊடகமொன்று தெரிவித்துள்ளது.

இந்தக் கப்பல் தற்போது இந்தோனேசியாவின் கடற்பரப்பில் இருந்து இலங்கையின் ஹம்பாந்தோட்டை துறைமுகத்திற்குச் சென்றுகொண்டிருப்பதாக இந்தியாவின் என்டிடிவி ஊடகம் தெரிவித்துள்ளது.

ஹம்பாந்தோட்டையை சென்றடையும்

ஹம்பாந்தோட்டை துறைமுகத்தை சென்றடைவதற்காக இந்த கப்பல் நிலைநிறுத்தப்பட்டு வருவதாகவும், அது வியாழக்கிழமை காலை 09.30 மணியளவில் ஹம்பாந்தோட்டையை சென்றடையும் எனவும் அந்த செய்தியில் குறிப்பிடப்பட்டுள்ளது.

கோரிக்கைகள் புறக்கணிப்பு - ஹம்பாந்தோட்டையை நோக்கி வேகமாக நகரும் சீன கப்பல் | Chinese Ship Moving Fast Towards Hambantota

செய்மதிகள் மற்றும் ஏவுகணைகளை கண்காணிக்க முடியுமான வசதிகள் கொண்ட இந்த கப்பல் இன்று பிற்பகல் இலங்கையில் இருந்து 680 கடல் மைல் தொலைவில் பயணித்துக்கொண்டிருந்தது. மணித்தியாலத்திற்கு 14 கடல் மைல் வேகத்தில் அந்நேரத்தில் கப்பல் பயணித்துக்கொண்டிருந்தது. இதற்கு முன்னர் இந்த கப்பல் மணித்தியாலத்திற்கு 10 முதல் 13 கடல் மைல் வேகத்தில் பயணித்துக்கொண்டிருந்தது.

இந்த கப்பல் ஹம்பாந்தோட்டை துறைமுகத்திற்கு வருகை தரவுள்ளதாக சீனா ஜூன் 28 ஆம் திகதி அறிவித்ததுடன், ஜூலை 12 ஆம் திகதி இலங்கை வௌிவிவகார அமைச்சு அனுமதி வழங்கியிருந்தது. அதன்படி, ஜூலை 14 ஆம் திகதி இந்த கப்பல் அங்கிருந்து புறப்பட்டுள்ளது.

கோரிக்கை மற்றும் ஆட்சேபனை புறக்கணிப்பு

கப்பல் இலங்கைக்கு வருவதற்கு இந்தியா கடும் எதிர்ப்பு தெரிவித்ததுடன், அதன்காரணமாக கப்பலின் பயணத்தை தாமதப்படுத்துமாறு சீன அரசாங்கத்திடம் இலங்கை வெளிவிவகார அமைச்சு நேற்று கோரிக்கை விடுத்திருந்தது.

ஆனால், சீனாவுக்கும் இலங்கைக்கும் இடையிலான உறவில் இந்தியா தலையிடக் கூடாது என்றும், அணிசேராக் கொள்கையின்படி தனக்கு விருப்பமான எந்த நாட்டையும் கையாள்வதற்கு இலங்கைக்கு உரிமை உண்டு என்றும் சீன வெளியுறவு அமைச்சகம் பதிலளித்துள்ளது.

மேலும் இது தொடர்பான செய்திகளைப் படிக்க இங்கே கிளிக் செய்யவும்