மேர்வின் சில்வாவின் கைதினைத் தொடர்ந்து பிரசன்ன ரணவீர தப்பியோட்டம்

CID - Sri Lanka Police Mervyn Silva Prasanna Ranaweera

By Sathangani Mar 08, 2025 08:18 AM GMT

Sathangani

Report

முன்னாள் அமைச்சர் பிரசன்ன ரணவீரவை (Prasanna Ranaweera) கைது செய்வதற்காக களனி பிரதேசத்தில் உள்ள அவரது வீட்டிற்குச் சென்ற போது அவர் அங்கிருந்து தப்பிச் சென்றுள்ளதாக குற்றப் புலனாய்வு திணைக்கள (CID) அதிகாரி ஒருவர் தெரிவித்துள்ளார்.

2010 ஆம் ஆண்டு போலி ஆவணங்களை தயாரித்து கிரிபத்கொடை (Kiribathgoda) பிரதேசத்தில் உள்ள அரச காணி ஒன்றை விற்பனை செய்த சம்பவம் தொடர்பில் பிரசன்ன ரணவீர கைது செய்யப்படவிருந்த நிலையிலேயே இவ்வாறு தப்பிச் சென்றுள்ளார்.

இது குறித்து மேலும் தெரியவருகையில், “குற்றப் புலனாய்வு திணைக்கள அதிகாரிகள் சிலர் முன்னாள் அமைச்சர் பிரசன்ன ரணவீரவை கைது செய்வதற்காக அவரது வீட்டிற்குச் சென்றுள்ளனர்.

வாக்குமூலம் பதிவு

இதன்போது குறித்த வீட்டினுள் பிரசன்ன ரணவீரவின் மனைவியும் ஏனைய குடும்பத்தினரும் மாத்திரமே இருந்துள்ள நிலையில் பிரசன்ன ரணவீரவின் மனைவி மற்றும் சாரதியிடம் இருந்து குற்றப் புலனாய்வு திணைக்கள அதிகாரிகள் வாக்குமூலம் பெற்றுக்கொண்டுள்ளனர்.

மேர்வின் சில்வாவின் கைதினைத் தொடர்ந்து பிரசன்ன ரணவீர தப்பியோட்டம் | Ex Minister Prasanna Ranaweera Escapes From Home

அத்துடன் தப்பிச் சென்ற பிரசன்ன ரணவீர தனது கையடக்கத் தொலைபேசியையும் துண்டித்துக்கொண்டுள்ளதாக குற்றப் புலனாய்வு திணைக்கள அதிகாரிகள் குறிப்பிட்டுள்ளனர்.

விளக்கமறியலில் வைக்கப்பட்டுள்ளனர்

போலி ஆவணங்களை தயாரித்து கிரிபத்கொடை பிரதேசத்தில் உள்ள அரச காணியை விற்பனை செய்த சம்பவம் தொடர்பில் முன்னாள் அமைச்சர் மேர்வின் சில்வா (Mervyn Silva) உட்பட மூவர் குற்றப்புலனாய்வு திணைக்கள அதிகாரிகளால் கைது செய்யப்பட்டு நீதிமன்றில் முன்னிலைப்படுத்தப்பட்ட பின்னர் விளக்கமறியலில் வைக்கப்பட்டுள்ளனர்.

இந்த நிலையில் குறித்த சம்பவத்துடன் தொடர்புடைய பிரசன்ன ரணவீர உட்பட 6 பேரை கைது செய்வதற்கு குற்றப் புலனாய்வு திணைக்கள அதிகாரிகள் நடவடிக்கை எடுத்து வருகின்றமை குறிப்பிடத்தக்கது.