கொழும்பு துறைமுக மேற்கு முனையத் திட்டம் - அநுர அரசின் நிலை
இலங்கையுடனான இருதரப்பு உறவுகளை மேலும் விரிவுபடுத்த பிரான்ஸ் தயாராக இருப்பதாகவும் என இலங்கைக்கான பிரான்ஸ் தூதுவர் ரெமி லம்பேர்ட் (Remi Lambert) தெரிவித்துள்ளார்.
இந்தியப் பெருங்கடல் பிராந்தியத்தின் பிரதான மையமாக இலங்கை விளங்குவதால் பிரான்ஸிற்கு இது விசேட முக்கியத்துவம் வாய்ந்தது எனத் தூதுவர் ரெமி லம்பேர்ட் குறிப்பிட்டுள்ளார்.
இலங்கைக்கான பிரான்ஸ் தூதுவர் ரெமி லம்பேர்ட் மற்றும் துறைமுகங்கள், சிவில் விமானப் போக்குவரத்து அமைச்சர் அநுர கருணாதிலக்க, பிரதி அமைச்சர் ஜனித்த ருவன் கொடித்துவக்கு ஆகியோருக்கு இடையில் நடந்த விசேட சந்திப்பின் போதே அவர் இதனைத் தெரிவித்துள்ளார்.
பிரெஞ்சு சுற்றுலாப் பயணிகள்
டித்வா புயலினால் இலங்கைக்கு ஏற்பட்ட பாதிப்புகள் குறித்து கவலை தெரிவித்த தூதுவர், ஐரோப்பிய ஒன்றியத்துடன் இணைந்து மனிதாபிமான உதவிகளை வழங்க பிரான்ஸ் பங்களிப்பு செய்ததாகக் குறிப்பிட்டார்.
மேலும், பிரான்ஸ் அபிவிருத்தி முகவர் நிலையத்தின் (AFD) ஊடாக மறுசீரமைப்புப் பணிகளுக்கு ஆதரவு வழங்க பரிசீலிக்கப்படும் என்றும் தெரிவித்துள்ளார்.
ஆண்டுதோறும் ஒரு இலட்சத்திற்கும் அதிகமான பிரெஞ்சு சுற்றுலாப் பயணிகள் இலங்கைக்கு வருகை தருகின்றனர்.
புயலுக்கு பின்னரும் சுற்றுலாப் பயணிகளுக்கான பயண ஆலோசனைகளை சாதகமாகப் பேண பிரான்ஸ் நடவடிக்கை எடுத்துள்ளது.
ரேடார் மற்றும் விமானக் கட்டுப்பாட்டு
இலங்கையின் விமானப் போக்குவரத்தை மேம்படுத்த சிக்னல் அமைப்புகள், ரேடார் மற்றும் விமானக் கட்டுப்பாட்டு தொழில்நுட்பங்களில் பிரெஞ்சு நிறுவனங்களின் நிபுணத்துவத்தைப் பயன்படுத்த முடியும் எனத் தூதுவர் தெரிவித்தார்.
மத்தல விமான நிலையத்தில் பிரான்ஸின் எயார்பஸ் நிறுவனம் முதலீட்டுத் திட்டமொன்றை மேற்கொள்வது குறித்து பரிசீலிக்கலாம் எனத் தூதுவர் சுட்டிக்காட்டினார்.
அதேநேரம் கொழும்பு துறைமுகத்தின் மேற்கு முனையத் திட்டம் குறித்து, ஆசிய அபிவிருத்தி வங்கி மற்றும் உலக வங்கியின் சாத்தியக்கூறு அறிக்கைகள் கிடைத்தவுடன் பொருத்தமான முதலீட்டு மாதிரி குறித்து தீர்மானிக்கப்படும் என அமைச்சர் அநுர கருணாதிலக்க குறிப்பிட்டுள்ளார்.
இலங்கையின் மூலோபாய ரீதியான அமைவிடம் வான் மற்றும் கடல் ஆகிய இரு துறைகளுக்கும் மிகவும் முக்கியமானது எனச் சுட்டிக்காட்டிய அமைச்சர், பிரான்ஸுடன் இணைந்து செயற்பட அரசாங்கம் ஆர்வமாக உள்ளதாகத் தெரிவித்துள்ளார்.
| செய்திகளை உடனுக்குடன் தெரிந்து கொள்ள IBC தமிழ் WHATSAPP இல் இணைந்து கொள்ளுங்கள்...! |
கோண்டாவில் கிழக்கு, புத்தளம், Staten Island, New York, United States
11 Jun, 2026
மாவிட்டபுரம், மல்லாகம், Lewisham, United Kingdom, Harrow, United Kingdom
08 Jun, 2026
