22வது திருத்தச் சட்டமூலத்திற்கு எதிரான எழுத்துப்பூர்வ வாதங்களுக்கான காலக்கெடு நிறைவு!

Sri Lankan Peoples Law and Order 22nd Amendment

By Dhilak Sep 03, 2026 06:48 PM GMT

Dhilak

Report

இலங்கை அரசியலமைப்பின் 22வது திருத்தச் சட்டமூலத்தின் அரசியலமைப்புச் செல்லுபடியை சவாலுக்கு உட்படுத்தி தாக்கல் செய்யப்பட்ட மனுக்கள் தொடர்பான விசாரணைகள் நிறைவடைந்துள்ளன.

இதுகுறித்த எழுத்துப்பூர்வ வாதங்களைச் சமர்ப்பிப்பதற்கான காலக்கெடு இன்று பிற்பகல் 3.00 மணியுடன் முடிவடைந்ததாக கூறப்படுகிறது.

பிரதம நீதிபதி பிரீத்தி பத்மன் சுரசேனா தலைமையிலான ஐந்து நீதிபதிகள் கொண்ட அமர்வு முன் கடந்த செப்டம்பர் 1 அன்று இந்த மனுக்கள் பரிசீலனைக்கு எடுத்துக்கொள்ளப்பட்டன.

எழுத்துப்பூர்வ வாதங்கள்

அதன்போது, இவ்விவகாரத்தை ஒரு முழு அமர்வின் முன் விசாரிக்குமாறு மனுதாரர்கள் கோரிக்கை விடுத்தபோதிலும், அக்க கோரிக்கை எவ்வித காரணமும் குறிப்பிடப்படாமல் நிராகரிக்கப்பட்டது.

22வது திருத்தச் சட்டமூலத்திற்கு எதிரான எழுத்துப்பூர்வ வாதங்களுக்கான காலக்கெடு நிறைவு! | Hearings On 22Nd Amendment Bill Completed

இதனைத் தொடர்ந்து, இரண்டு நாட்கள் நடைபெற்ற இந்த விசாரணை நேற்று மாலையுடன் நிறைவடைந்தது. விசாரணையின் முடிவில், எழுத்துப்பூர்வ வாதங்களைச் சமர்ப்பிக்க இன்று பிற்பகல் 3.00 மணி வரை அவகாசம் அளிக்கப்பட்டிருந்தது.

இருப்பினும், இலங்கை சட்டத்தரணிகள் சங்கம் (BASL) உள்ளிட்ட பல மனுதாரர் தரப்பினர், தாம் எழுத்துப்பூர்வ வாதங்களைத் தாக்கல் செய்யப் போவதில்லை என மனுக்கள் மூலம் நீதிமன்றத்திற்குத் தெரிவித்துள்ளனர்.

நீதிபதிகள் அமர்வின் தீர்மானம்

அரசாங்க வழக்கறிஞர்களின் வாதங்களைத் தொடர்ந்து, அதற்கு வாய்மொழி மூலம் பதில் அளிக்க தமக்கு வாய்ப்பு கேட்கப்பட்டும் அது வழங்கப்படவில்லை என்றும், அதனால் அரசாங்கத்தின் கூற்றுகளுக்கு எதிர்வாதங்களை முன்வைக்க இயலாமல் போனதாகவும் மனுதாரர்கள் சுட்டிக்காட்டியுள்ளனர்.

இந்நிலையில், 22வது திருத்தச் சட்டமூலத்தை ஆதரித்தும் எதிர்த்தும் மொத்தம் 67 மனுக்கள் தாக்கல் செய்யப்பட்டுள்ள நிலையில், இச்சட்டமூலத்தின் அரசியலமைப்புச் செல்லுபடி குறித்த ஐந்து நீதிபதிகள் கொண்ட அமர்வின் தீர்மானம், உரிய நேரத்தில் ஜனாதிபதி மற்றும் நாடாளுமன்ற சபாநாயகருக்கு இரகசியமாகத் தெரிவிக்கப்படும் என எதிர்பார்க்கப்படுகிறது.