எப்ஸ்டீன் சர்ச்சையைப் பயன்படுத்தி சவுதி அரேபியாவுக்கு எதிராக ஹவுதிகள் பிரசாரம்

அமெரிக்க பாலியல் குற்றவாளியான ஜெஃப்ரி எப்ஸ்டீன் தொடர்பான சர்ச்சைகளைப் பயன்படுத்தி, சவுதி அரேபியாவுக்கு எதிராக யேமனில் செயல்படும் ஹவுதி கிளர்ச்சியாளர்கள் சமூக வலைத்தளங்களில் பிரசாரங்களை முன்னெடுத்து வருவதாக சர்வதேச ஊடகங்கள் செய்தி வெளியிட்டுள்ளது. 

மக்காவில் அமைந்துள்ள இஸ்லாமியர்களின் புனிதத் தலமான கஃபாவின் மீது போர்த்தப்படும் புனிதத் துணிகள், சவுதி அரச குடும்பத்துடன் தொடர்புடையவர்களால் எப்ஸ்டீனின் தனியார் தீவுக்கு அனுப்பப்பட்டதாக வெளியாகியுள்ள தகவல்களை ஹவுதிகள் தமது பிரசாரத்தில் பயன்படுத்தி வருவதாகக் கூறப்படுகிறது.

இதன் மூலம் சவுதி தலைமையின் நற்பெயருக்குக் களங்கம் ஏற்படுத்த அவர்கள் முயற்சிப்பதாகத் தெரிவிக்கப்படுகிறது.

இந்தியாவில் அதிர்ச்சி சம்பவம்: இரண்டு மாத ஆண் குழந்தையின் வயிற்றில் கரு

இராணுவ நடவடிக்கைகள்

மக்கா மற்றும் மதீனா பகுதிகளைக் குறிவைத்து ஹவுதிகள் ட்ரோன் தாக்குதல்களை நடத்தியதாக சவுதி அரேபியா குற்றஞ்சாட்டியிருந்தது.

எனினும், இந்தக் குற்றச்சாட்டை ஹவுதிகள் மறுத்துள்ளனர். இதற்குப் பதிலளித்த ஹவுதி தலைவர் மஹ்தி அல்-மஷாத், கஃபாவின் புனிதத் துணிகளை எப்ஸ்டீனுக்கு வழங்கியவர்கள்தான் மக்காவைக் குறிவைப்பதாகக் குற்றஞ்சாட்டியுள்ளார்.

அவரது இந்தக் கருத்தும் சவுதி அரேபியாவுக்கு எதிரான பிரசாரத்தின் ஒரு பகுதியாகப் பார்க்கப்படுகிறது. ஹவுதிகளின் தகவல் தொடர்பு நடவடிக்கைகள் தற்போது தொலைக்காட்சி, இணையத்தளங்கள், வானொலி மற்றும் சமூக வலைத்தளங்களை உள்ளடக்கிய ஒழுங்கமைக்கப்பட்ட வலையமைப்பாக வளர்ச்சியடைந்துள்ளதாக யேமன் விவகார ஆய்வாளர் மொஹமட் அல்-பாஷா தெரிவித்துள்ளார்.

எப்ஸ்டீன் தொடர்பான ஆவணங்கள் மற்றும் சர்ச்சைகளைப் பயன்படுத்தி அமெரிக்கா, இஸ்ரேல் மற்றும் சவுதி தலைமைக்கு எதிரான கருத்துகளைப் பரப்புவதும் இந்தத் தகவல் பரப்பும் உத்தியின் ஒரு பகுதியாக இருப்பதாக ஆய்வாளர்கள் சுட்டிக்காட்டுகின்றனர்.

யேமன் அரசாங்கம்

2015ஆம் ஆண்டு முதல் யேமன் அரசாங்கத்துக்கு ஆதரவாக சவுதி அரேபியா தலைமையிலான கூட்டணி முன்னெடுத்த இராணுவ நடவடிக்கைகள், அந்நாட்டில் ஏற்பட்ட கடுமையான மனிதாபிமான நெருக்கடிக்குப் பங்களித்தன.

வன்முறை, பசி மற்றும் நோய்கள் உள்ளிட்ட காரணங்களால் நூறாயிரக்கணக்கானோர் உயிரிழந்துள்ளதாக மதிப்பிடப்பட்டுள்ளது.

இந்த மனிதாபிமான நெருக்கடி தொடர்பான விவகாரங்களையும் ஹவுதிகள் சவுதி அரேபியாவுக்கு எதிரான தமது பிரசாரங்களில் பயன்படுத்தி வருகின்றனர்.

மேலும், ஈரானுடன் தொடர்புடைய குழுக்கள் பயன்படுத்தும் தகவல் பரப்பும் உத்திகளையும் ஹவுதிகள் பின்பற்றுவதாக ஆய்வாளர்கள் தெரிவிக்கின்றனர்.

இதற்கிடையில், சவுதி அரேபியாவின் ஆதரவுடன் செயல்படும் யேமன் அரசாங்கத்தின் தகவல் தொடர்பு நடவடிக்கைகளில் ஒருங்கிணைப்பு குறைவாக இருப்பதும், ஹவுதிகளின் பிரசாரங்கள் பரவுவதற்கு வாய்ப்பளிப்பதாகக் கூறப்படுகிறது.

ஈராக்கிற்கு அருகே கடலில் தீப்பற்றிய கப்பல்: மர்மச் சம்பவத்தால் பதற்றம் - அவசர எச்சரிக்கை விடுத்த UKMTO

நாளை பாடசாலைகளுக்கு விடுமுறை: சாதாரண தர பரீட்சார்த்திகளுக்கு வெளியான அறிவிப்பு