ஹவாயை அச்சுறுத்தும் நோலோ சூறாவளி

ஹவாய் தீவுகளை நோக்கி நகர்ந்து வரும் நோலோ சூறாவளி காரணமாக, அங்கு கனமழை, வெள்ளப்பெருக்கு மற்றும் நிலச்சரிவு ஏற்படும் அபாயம் அதிகரித்துள்ளதாக சர்வதேச ஊடகங்கள் செய்தி வெளியிட்டுள்ளன.

இந்த ஆண்டின் வலுவான எல் நினோ தாக்கத்தால் பசிபிக் பகுதியில் அதிகரித்துள்ள வெப்பமண்டலப் புயல்களின் தொடர்ச்சியில் நோலோ சூறாவளியும் இணைந்துள்ளது.

கடந்த ஆறு வாரங்களில் ஹவாய் எதிர்கொள்ளும் மூன்றாவது குறிப்பிடத்தக்க சூறாவளித் தாக்கம் இதுவாகும்.

எல் நினோ தாக்கம்.., 6 மாதங்களில் 4.5 லட்சம் பேர் உயிரிழக்கும் அபாயம்

25 அங்குலம் வரை மழை

நோலோ சூறாவளி வெள்ளிக்கிழமை அதிகாலை வேகமாக வலுப்பெற்று வகை 1 சூறாவளியாக மாறியதுடன், ஹவாயின் பிக் ஐலண்ட் தீவுக்கு தெற்கே சுமார் 200 மைல் தொலைவில் இருந்து வடக்கு நோக்கி நகர்ந்து வந்தது.

சூறாவளி மேலும் வலுப்பெற்று வெள்ளிக்கிழமை பிற்பகல் முதல் சனிக்கிழமை வரை பிக் ஐலண்டை நெருங்கும் என எதிர்பார்க்கப்படுகிறது.

இதனால் கனமழை, பலத்த காற்று மற்றும் கடல் கொந்தளிப்பு ஏற்படக்கூடும் என எச்சரிக்கப்பட்டுள்ளது.

தேசிய சூறாவளி மையத்தின் முன்னறிவிப்பின்படி, பிக் ஐலண்டின் கிழக்கு மற்றும் தெற்குப் பகுதிகளில் ஞாயிற்றுக்கிழமை வரை 10 முதல் 15 அங்குலம் வரை மழை பெய்யக்கூடும்.

மலைப்பாங்கான பகுதிகளில் மழையளவு 25 அங்குலம் வரை அதிகரிக்கக்கூடும் என தெரிவிக்கப்பட்டுள்ளது. மௌய் தீவில் 4 முதல் 6 அங்குலம் வரையும், சில பகுதிகளில் 10 அங்குலம் வரையும் மழை பெய்யக்கூடும்.

எல் நினோ தாக்கத்துக்கு முன்னரே இலங்கையில் தீவிரமடையும் வறட்சி நிலை

அவசரநிலை பிரகடனம்

இதேவேளை, ஹவாயின் ஏனைய பிரதான தீவுகளில் 1 முதல் 3 அங்குலம் வரை மழை எதிர்பார்க்கப்படுகிறது.

பிக் ஐலண்டின் தெற்குப் பகுதிகளில் மணிக்கு 75 மைல்களுக்கு அதிகமான சூறாவளிக் காற்று வீசக்கூடும் எனவும் எச்சரிக்கப்பட்டுள்ளது.

நோலோ சூறாவளியின் தாக்கத்தை முன்னிட்டு ஹவாய் ஆளுநர் ஜோஷ் கிரீன் அவசரநிலையைப் பிரகடனப்படுத்தியுள்ளார். பிக் ஐலண்டில் மாநில மற்றும் மாவட்ட அலுவலகங்கள், பொதுப் பாடசாலைகள் மற்றும் ஹவாய் பல்கலைக்கழகம் ஆகியவை மூடப்பட்டுள்ளன.

மௌயிலும் வெள்ளிக்கிழமை அலுவலகங்கள் மற்றும் கல்வி நிறுவனங்கள் மூடப்பட்டுள்ளன. வெள்ளம் ஏற்படக்கூடிய பகுதிகளில் வசிப்பவர்கள் பாதுகாப்பான இடங்களுக்கு செல்லுமாறு அதிகாரிகள் அறிவுறுத்தியுள்ளதுடன், பிக் ஐலண்டில் பாதுகாப்பு மையங்களும் திறக்கப்பட்டுள்ளன.

இலங்கையில் எல் நினோ நிலைமையின் தாக்கம்...! விடுக்கப்பட்டுள்ள எச்சரிக்கை

சூறாவளித் தாக்கத்தில் சிக்கிய ஹவாய்

கடந்த ஆகஸ்ட் மாதத்தில் லாலா சூறாவளி பிக் ஐலண்டை நெருங்கிய பாதையில் கடந்து சென்று கடுமையான வெள்ளப்பெருக்கை ஏற்படுத்தியது.

செப்டம்பர் தொடக்கத்தில் லோவெல் சூறாவளி கவாய் மற்றும் நிஹாவ் தீவுகளை வகை 2 சூறாவளியாக தாக்கியது.

இந்த நிலையில், நோலோ சூறாவளி பிக் ஐலண்டை நெருங்கும்போது வகை 2 சூறாவளியின் வலுவான நிலை அல்லது வகை 3 பெரும் சூறாவளியாக வலுப்பெறக்கூடும் என எதிர்பார்க்கப்படுகிறது.

இதனிடையே, நோலோ, ஓடலிஸ் மற்றும் போலோ ஆகிய மூன்று சூறாவளிகள் ஒரே நேரத்தில் பசிபிக் பகுதியில் உருவாகியுள்ளன.

பசிபிக் பகுதியில் நிலவும் அதிக கடல் வெப்பநிலை உள்ளிட்ட காரணிகளால் இந்த ஆண்டு சக்திவாய்ந்த வெப்பமண்டலப் புயல்கள் உருவாகும் சூழல் அதிகரித்துள்ளதாக தெரிவிக்கப்பட்டுள்ளது.