ஹோர்முஸில் தொடர்ந்து மூழ்கடிக்கப்படும் கப்பல்கள்! தாக்குதலை தீவிரப்படுத்தியுள்ள ஈரான்

Iran World Strait of Hormuz

By Pavi Oct 15, 2026 07:35 AM GMT

Pavi

in கட்டுரை

Report

ஹோர்முஸ் நீரிணை வழியாகப் பயணிக்க முயற்சிக்கும் வர்த்தகக் கப்பல்கள் மீதான தாக்குதல்களை ஈரான் தீவிரப்படுத்தியுள்ளதாகத் தெரிவிக்கப்படுகிறது.

கடந்த நான்கு நாட்களில் இதுபோன்ற 12 சம்பவங்கள் பதிவாகியுள்ள நிலையில், இந்த முக்கிய கடல்வழிப் பாதையைக் கடக்கும் கப்பல்களுக்கு உயர் மட்ட எச்சரிக்கை விடுக்கப்பட்டுள்ளது.

பிரிட்டிஷ் ரோயல் கடற்படையின் கீழ் இயங்கும் ஐக்கிய இராச்சிய கடல்சார் வர்த்தக நடவடிக்கைகள் அமைப்பு (UKMTO), ஒக்டோபர் 14ஆம் திகதி ஹோர்முஸ் நீரிணையைக் கடந்து வெளியேறிக்கொண்டிருந்த 19,000 தொன் எடையுடைய கொள்கலன் கப்பலொன்று, அடையாளம் காணப்படாத எறிபொருளால் தாக்கப்பட்டதாகத் தெரிவித்துள்ளது.

ஈரான் ஆதரவு கவுதிப் படையினர்

எனினும், ஈரானின் இஸ்லாமியக் குடியரசு செய்தி நிறுவனம் (IRNA) வெளியிட்ட தகவலின்படி, 2,500 கொள்கலன்களை ஏற்றிச் சென்ற அந்தக் கப்பல் கடற்படையினரால் பயன்படுத்தப்படும் கண்ணிவெடியில் சிக்கியதைத் தொடர்ந்து வெடிப்பும் தீப்பரவலும் ஏற்பட்டுள்ளது.

ஹோர்முஸில் தொடர்ந்து மூழ்கடிக்கப்படும் கப்பல்கள்! தாக்குதலை தீவிரப்படுத்தியுள்ள ஈரான் | Iran Ramps Up Attacks On Ships In Strait Of Hormuz

இதனால் கப்பல் கடலில் மூழ்கியுள்ளதாக அந்தச் செய்தி நிறுவனம் தெரிவித்துள்ளது.

இந்தத் தாக்குதல் குறித்த செய்திகள் மற்றும் ஈரான் ஆதரவு கவுதிப் படையினர் சவூதி அரேபியாவில் நடத்திய தாக்குதல்கள் காரணமாக உலகச் சந்தையில் மசகு எண்ணெய் விலைகள் சற்றே அதிகரித்துள்ளன.

சவூதி அரேபியாவின் தஹ்ரானில் அமைந்துள்ள சவூதி அராம்கோ நிறுவனத்தின் நிர்வாகக் கட்டடமும் குறித்த தாக்குதல்களில் இலக்காகியதாகத் தெரிவிக்கப்பட்டுள்ளது.

அமெரிக்க மத்திய கட்டளைப் பிரிவு (CENTCOM), ஈரானியக் கப்பல்களுக்கு எதிரான கடற்படை முற்றுகையைத் தொடர்ந்து நடைமுறைப்படுத்தி வருவதாகக் கூறியுள்ளது.

அதேவேளை, ஹோர்முஸ் நீரிணையின் கட்டுப்பாடு தம்மிடமே இருப்பதாக ஈரானின் இஸ்லாமியப் புரட்சிகர பாதுகாப்புப் படை (IRGC) தெரிவித்துள்ளது.

IRGC கடற்படை

ஞாயிற்றுக்கிழமை இரவு வெளியிட்ட அறிக்கையில், நீரிணையில் பயணிக்கும் கப்பல்கள் தங்களது வழிசெலுத்தல் மற்றும் அடையாளம் காணும் முறைமைகளைச் செயலிழக்கச் செய்தால், அவற்றை விரோதக் கப்பல்களாகக் கருதி உறுதியான நடவடிக்கை எடுக்கப்படும் என IRGC கடற்படை எச்சரித்துள்ளது.

ஹோர்முஸ் நீரிணை நெருக்கடி தொடர்பான நிகழ்நேரத் தகவல்களைப் பதிவு செய்யும் கண்காணிப்புத் தளமொன்றின் தரவுகளின்படி, கடந்த 24 மணித்தியாலங்களில் ஒன்பது கப்பல்கள் மட்டுமே நீரிணையைக் கடந்துள்ளன.

உலக வர்த்தக அமைப்பும் (WTO) இந்த நீரிணை ஊடான கப்பல் போக்குவரத்தைக் கண்காணிக்கும் தரவுத் தளமொன்றை நடத்தி வருகிறது.

எனினும், தானியங்கி அடையாள முறைமை (AIS) மூலம் அடையாளம் காணக்கூடிய கப்பல்களை மட்டுமே அந்தத் தளம் கண்காணிக்கிறது.

அதன் தரவுகளும் மிகக் குறைந்தளவிலான கப்பல் போக்குவரத்தையே காட்டுகின்றன.

AIS முறைமைகளைச் செயலிழக்கச் செய்தோ அல்லது அமெரிக்கக் கடற்படையின் பாதுகாப்புடன் பயணித்தோ எத்தனை மசகு எண்ணெய் கப்பல்கள் நீரிணையைக் கடந்துள்ளன என்பது தெளிவாகத் தெரியவில்லை.

அமெரிக்காவின் நியூயார்க் நகரத்தைத் தலைமையிடமாகக் கொண்டு செயல்படும் உலகின் முன்னணி நிதி, வணிகத் தரவு மற்றும் ஊடக நிறுவனமான புளூம்பெர்க் வெளியிட்ட தகவலின்படி, ஈரானின் எண்ணெய் ஏற்றுமதியைத் தவிர்த்து, மத்திய கிழக்கிலிருந்து வெளியேறும் மசகு எண்ணெய் போக்குவரத்து, போருக்கு முந்தைய நிலையின் 75 சதவீதமாகக் குறைந்துள்ளது.

ஹோர்முஸ் நீரிணை

இந்தக் கணக்கீட்டில் ஹோர்முஸ் நீரிணை வழியான போக்குவரத்துடன் மாற்றுப் பாதைகள் ஊடான போக்குவரத்தும் உள்ளடக்கப்பட்டுள்ளன. பெப்ரவரி 28ஆம் திகதிக்கு முன்னர், இந்த நீரிணை வழியாக நாளொன்றுக்கு சுமார் 150 கப்பல்கள் பயணித்தன.

உலகளாவிய கடல்வழி மசகு எண்ணெய் போக்குவரத்தில் மூன்றில் ஒரு பங்கும், உலகின் மொத்த எண்ணெய் விநியோகத்தில் 20 சதவீதம் வரையிலான அளவும் ஹோர்முஸ் நீரிணை வழியாகச் செல்வதால், அதன் மூடல் மசகு எண்ணெய் மற்றும் இரசாயனப் பொருள் சந்தைகளில் குறிப்பிடத்தக்க தாக்கத்தை ஏற்படுத்தியுள்ளது.

அதேவேளை, உலகளாவிய கொள்கலன் கப்பல் போக்குவரத்துத் திறனில் ஆண்டுதோறும் இரண்டு சதவீதத்திற்கும் குறைவான அளவே இந்த நீரிணை வழியாகச் செல்வதால், கொள்கலன் கப்பல் போக்குவரத்தில் இதன் தாக்கம் ஒப்பீட்டளவில் குறைவாக இருந்துள்ளது.

இருப்பினும், கப்பல்களுக்கான எரிபொருள் விலைகள் அதிகரித்ததன் காரணமாகக் கொள்கலன் போக்குவரத்துக் கட்டணங்கள் உயர்ந்துள்ளன. பெரும்பாலான இரசாயனப் பொருட்கள் திரவ வடிவில் தாங்கிக் கப்பல்களில் கொண்டு செல்லப்படுகின்றன.

எனினும், பாலிஎதிலீன் (PE), பாலிபுரொப்பிலீன் (PP) போன்ற பிளாஸ்டிக் மூலப்பொருட்கள் சிறு உருண்டை வடிவில் கொள்கலன் கப்பல்கள் மூலம் கொண்டு செல்லப்படுகின்றன. டைட்டானியம் டைஒக்சைட் (TiO₂) போன்ற பொருட்களும் இவ்வாறு அனுப்பப்படுகின்றன.

மேலும், திரவ இரசாயனப் பொருட்களும் விசேட திரவப் போக்குவரத்துக் கொள்கலன்கள் (Isotanks) மூலம் கொண்டு செல்லப்படுகின்றன.

இதனால், ஹோர்முஸ் நீரிணையில் நிலவும் நெருக்கடி இரசாயனத் தொழில்துறையின் விநியோகச் சங்கிலியிலும் தாக்கத்தை ஏற்படுத்தக்கூடும்.