பல சாதனைகளை மாற்றியமைத்த கோலி - முறியடிக்கப்பட்ட சாதனைகளின் பட்டியல் - இலங்கையுடனான ஒருநாள் தொடர்!

இலங்கை மற்றும் இந்திய அணிகளுக்கிடையிலான ஒருநாள் தொடர் நிறைவடைந்துள்ள நிலையில், குறித்த ஒருநாள் தொடரை 3 - 0 என இந்திய அணி கைப்பற்றியுள்ளது.

இந்த தொடரில் இரண்டு சதங்களை விளாசி அதிரடி காட்டிய இந்திய அணியின் நட்சத்திர வீரர் விராட்கோலி பல சாதனைகளை முறியடித்துள்ளார்.

விராட்கோலி முறியடித்த சாதனைகளையும், இதற்கு முன் இருந்த பழைய சாதனைகளையும் பார்க்கலாம்.

ஒரு அணிக்கு எதிராக அதிகூடிய சதம்

இலங்கை அணிக்கு எதிரான தொடரில் விராட்கோலி அடித்த இரண்டு சதங்களின் மூலம், ஒரு அணிக்கு எதிராக ஒரு வீரர் அடித்த அதிகூடிய சதங்கள் எனும் சாதனையை அவர் பெற்றுள்ளார்.

இதற்கு முன்னர் இந்த சாதனை சச்சின் மற்றும் விராட்கோலியிடம் இருந்தது.

இதற்கு முன்னர், சச்சின் ஆஸ்திரேலியாவுக்கு எதிராக அடித்த 9 சதங்கள் மற்றும் கோலி வெஸ்ட் இண்டீசுக்கு எதிராக அடித்த 9 சதங்கள் எனும் பழைய சாதனைகள் முறியடிக்கப்பட்டுள்ளது.

அதிகூடிய தடவை 150 க்கு மேல் ஓட்டங்கள்

அதிகூடிய தடவை 150 ஓட்டங்களுக்கு மேல் பெற்ற தொடக்க ஆட்டக்காரர் அல்லாத வீரர் என்ற சாதனையையும் அவர் படைத்துள்ளார்.

இதுவரை 5 தடவைகள் 150 ஓட்டங்களுக்கு மேல் கோலி பெற்றுள்ளார்.

அதிக ஆறு ஓட்டங்கள்

ஒருநாள் போட்டி ஒன்றில் விராட் கோலியால் அடிக்கப்பட்ட அதிக ஆறு ஓட்டங்கள் எனும் சாதனையை அவர் பெற்றுள்ளார்.

இதற்கு முன்னர் ஏழு ஆறு ஓட்டங்களே ஒரு போட்டியில் அவரால் அடிக்கப்பட்ட அதிகூடிய ஆறு ஓட்டங்களாக இருந்தது.

இலங்கைக்கு எதிரான இறுதி ஒருநாள் போட்டியில் அவர் அடித்த 8 ஆறு ஓட்டங்களின் மூலம் பழைய சாதனையை அவர் முந்தியுள்ளார்.

சொந்த மண்ணில் அதிகூடிய சதங்கள்

சொந்த மண்ணில் அதிகூடிய சதங்களை விளாசிய வீரராக சாதனை படைத்துள்ளார்.

இதற்கு முன்னர், இந்திய அணியின் முன்னாள் ஜாம்பவான் சச்சின் டெண்டுல்கர் 160 இன்னிங்ஸ்சில் அடித்த 20 சதங்கள் சாதனையாக இருந்தது.

இலங்கையுடனான தொடரில் கோலி அடித்த இரண்டு சதங்களின் மூலம், 101 இன்னிங்ஸ்சில் 21 சதங்களை சொந்த மண்ணில் அடித்து பழைய சாதனையை முறியடித்துள்ளார்.

அதிக ஓட்ட வித்தியாசத்தில் வெற்றி

இதேவேளை, அதிக ஓட்ட வித்தியாசத்தில் வெற்றி பெற்ற அணியாக இந்திய அணி சாதனை படைத்துள்ளது.

இலங்கைக்கு எதிரான மூன்றாவது ஒருநாள் போட்டியில் இந்திய அணி 317 ஓட்ட வித்தியாசத்தில் வெற்றி பெற்றிருந்தது.

இதற்கு முன்பு, 2008-ம் ஆண்டு அயர்லாந்தை 290 ஓட்டங்கள் வித்தியாசத்தில் நியூசிலாந்து அணி வீழ்த்தியதே சாதனையாக இருந்தது.